IQ 博士不經不覺間已經陪伴 35 個年頭，不過動畫中嘅無厘頭情段到依家都仍然帶俾人唔少歡樂。今個聖誕小雲、小吉同 IQ博士就去咗 The One 開生日 Party ，仲唔快啲唱返首「小雲同小吉，好重要」！
大量角色參加派對
今次小雲嘅生日 Party 係 UG2 中庭舉行，巨型小雲帽子中間準備咗一個印有「35」數字嘅生日蛋糕，兩旁有三層高嘅小舞台聚集咗小吉、博士同一眾好友以最強陣容齊齊慶生辰。無論立體裝飾定紙牌人，動畫內嘅角色幾乎都齊晒，非常熱鬧呢！
▲ 動畫內嘅角色幾乎都齊晒，非常熱鬧呢！
▲ 小吉仲帶咗屎屎嚟幫蛋糕加料添！
▲ 小雲同小寶寶坐係由200 隻可愛度爆燈的小吉毛公仔來堆砌而成嘅聖誕樹下，好溫馨呢！
▲ 要數經典場面，點可以唔提天神村嘅茶壺屋同 UFO 呢？「吃了酸梅乾會變超人」嘅傻瓜超人、「鍾意踏單車」嘅草菇 同 宇宙大王都企係 UFO 前面，等待大家同佢地合照。
▲ 咖啡壺裡面原來別有洞天小雲、小吉 同 粉紅色屎屎正品嚐由小茜親自沖調嘅咖啡。
▲ 雖然大部份角色都係紙牌人，不過堆埋一齊都好震撼架！
飄雪散落 3.5 米高巨型小雲
參加完生日 party，記得去埋露天廣場打卡啊！ 3.5 米高巨型小雲同表情多多嘅屎屎係冰天雪地上奔馳。逢星期六、日及公眾假期 10am – 11pm 每半個鐘仲會有噴出飄雪，為煩囂嘅鬧市增添一份浪漫。
▲ 天氣凍咗，小雲變大咗。
▲ 舊舊屎屎都有唔同表情架！
玩遊戲換名信片
單單影相又點滿足到一眾粉絲，L2 仲有主題遊戲，只要係限時內操控手中嘅電流棒通過 “Merry Christmas” 字樣，就可以免費得到 聖誕掛飾兼名信片一套。另外，只要係商場消費滿指定金額就可以換購 IQ 博士 音樂盒、2017 月曆 或 隔熱玻璃杯，都幾吸引架！
▲ 只要係限時內操控手中嘅電流棒通過 “Merry Christmas” 字樣，就可以免費得到 聖誕掛飾兼名信片一套。
▲ 屎屎名信片超正呢！
▲ 只要係 11 月 12 日起消費滿 $2,000 就可以免費換領 IQ 博士 音樂盒，11 月 19 日起消費滿 $600 就可以免費換領 IQ 博士 2017 月曆，以及 12 月 1 日起消費滿 $1,200 就可以免費換領 IQ 博士 隔熱玻璃杯，每樣都係限量換領，想要就快手啦！
IQ 博士限定店
IQ 博士嘅精品平時唔多地方有得賣，限定店一定係粉絲們最期待嘅樂園，多款由日本空運到港嘅 IQ 博士 35 週年限定主題精品，包括獨家香港限定嘅公仔、攬枕、帽子、毛巾、杯及文件套等都有得賣，更有限定甜品、卷蛋同馬卡龍，保證粉絲們定必滿載而歸！
▲ L2 嘅限定店售賣多款由日本空運到港嘅 IQ 博士 35 週年限定主題精品。
▲ 印有 IQ 博士圖案嘅卷蛋同蛋糕咁靚，你又捨唔捨得食呢？
▲ 只要係 商場消費滿 $300 就可以用優惠價 $19 (原價 $38) 換購西餅一件 或 以 $168(原價 HK$230)換購生日蛋糕(1 磅裝)一個。
▲ 山下菓子 x Dr Slump 意式果蓉馬卡龍粒粒都案有公仔，今次仲唔係食…。
▲ 限定店旁邊仲有得俾你坐係度慢慢嘆呢！
▲ 小雲同小寶寶嘅音樂盒好得意呢！
▲ 小雲公仔咁可愛，粉絲們一定要把握機會入手呢！
依莉詩點評
雖然有部份係紙牌人，但一個商場佈置有咁多個角色真係好少見呢！幾乎成套動畫嘅角色都係晒度，粉絲見到仲唔尖叫！露天廣場嘅飄雪唔算大，不過有咁大嘅小雲同屎屎又點可以唔自拍下！就算 The One 中庭唔算大，但勝在係尖沙咀，一次過去齊幾個商場打卡，得咗！精品平時唔多地方有得賣，而且大部份由日本空運到港，一定係粉絲們最期待嘅樂園。
聖誕氣氛 ★★★★☆
必影指數 ★★★★☆
必買指數 ★★★★☆
日期: 2016年 11 月 19 日至 2017 年 1 月 2 日
時間：逢星期一至五：下午 2 時至晚上 9 時，逢星期六、日及公眾假期：中午 12 時至晚上 10 時)
地點：The ONE 地下露天廣場、UG2、L2
分享到 :
最新影片
