《你的名字》已經喺香港上咗畫兩個星期，港女有唔少朋友都有入場睇，約出嚟食飯見面嘅時候都會討論下劇情，講吓套戲啲周邊新聞：例如真係有人整咗隻 MyDiary App 出嚟，仲 Open Source 咁放咗上 GitHub 搵人幫手完成；又有人整咗啲（偽）口嚼酒出嚟放上網賣；而且因為動畫入面有好多場景都係實景，朋友仔都話想去現場睇吓喎。
P 到張相有新海誠畫風
新海誠嘅動畫出咗名每個畫面都畫得好細緻，而且好多時會喺動畫入面還原實景，令套戲感覺真實，更容易代入角色。最近，中國有個相片管理 App 「時光相冊」就推出咗一個「新海誠 Filter」，幫你啲相 P 到有新海誠嘅畫風。
用法好簡單，一係你就去佢個網頁版嘅 App 度 Up 相或影相，一係你就下載「時光相冊」呢個 App 落電話度試用，揀選你想落 filter 嘅相，工具就會自動將你張相加上「新海誠 Filter」。
▲ 網頁版介面，用手機的話可以直接啟用相機影相加 Filter。
▲ 下載 App 的話就要多幾個步驟啟用 Filter 喇。
語重心長嘅港女建議大家唔好下載佢個 App，想試嘅話，用網頁版 App 好喇。因為港女已經身先士卒，下載咗個 App 幫大家試，好鬼麻煩，又要電話號碼認證，又要好多 access 睇晒你啲相。講真，港女就唔係幾信得過中國開發嘅 App 嘅，好在港女有工作用電話及 SIM 卡，咁就可以避免佢讀取到我啲私隱。咁其實大家都係貪玩想試下啫，無謂 risk 自己啲個人資料吖，用 webapp up 幾張相試吓玩吓夠晒㗎喇。
遠景效果靚 人像核突 夜景出事
試用完之後，港女覺得個效果係不錯嘅，而如果你幅圖係山系風景相或遠景的話，效果就更好；城市、建築物嘅相都 OK 幾靚，但係人像就唔係幾得，可能因為我地本身唔係動畫人物，經過個 filter 處理完嘅人像係核突的，而且需時較長。
▲ 用返上次港女去日本影嘅相試，係幾靚嘅。
▲ 經常出現喺新海誠動畫入面的鐵路軌道畫面，「還原度」都幾高。
▲ 公司窗口影出去的建築物群，效果都幾靚㗎！
▲ 本地建築物景，可能係角度問題，港女就覺得麻麻地。
▲人像相的話大頭正面就真係核突，為免嚇親大家及被檢舉，港女出張背脊畀大家睇下算。人像無特別處理過，係光咗好多咁。
▲遠景真係靚㗎，睇唔到樣就靚㗎喇，哈哈哈！
就咁睇幾幅，我諗大家都 get 到，其實個 filter 主要係會重畫天空同雲，將張相光度推高，及將顏色調至粉色系。另外，filter 係分析唔到你張相係日頭、黃昏還是夜晚，會統一將啲相變晒做日頭，所以夜景落 filter 一定 fail，睇吓下面就知…
分享到 :
最新影片
