最近港女幫屋企人買咗張日本床墊,話生產過程結合咗高科技研發嘅技術,所以寧舍舒服,仲有好多運動員會帶住佢出去比賽添。講到咁犀利,港女都試瞓咗幾晚,發現床墊有分保暖同清爽兩面,呢啲忽冷忽熱嘅天氣就最啱喇,早兩日又暖又濕就反去清爽嗰面瞓,呢幾日又返風就反去另一面保暖,都真係幾舒服。上網一查仲發現呢個床墊品牌有出手機 App,用來做睡眠質素分析,好奇嘅港女梗係即刻下載隻 App 試用下啦。
▲「清爽」嗰面嘅布面有好多透氣窿窿,瞓落去真係有一陣涼浸浸嘅感覺。佢個圖示箭咀就表示頭嘅瞓覺方向,上面三分一左右就軟啲方便轉身,其他部分就正常硬度。
▲反轉就係「保暖」,係絨面布料,難怪可以保暖(港女張被都有絨面所以好暖,哈哈)。正反面嘅上三分一都係一樣軟身啲嘅。
坊間其實都有唔少呢個類型嘅 App,通常都係要配合智能手帶偵測心跳同身體嘅郁動,而呢個 App 就唔使用手帶,就咁將手機放喺枕頭旁就得㗎喇。港女起初懶醒咁以為個 App 咁神奇,可以配合到床墊,分析我個睡眠姿勢、身體嘅溫度、移動等,推斷我有幾多深層及淺層睡眠。點知原來係港女想像力太豐富,高估咗呢個 App 嘅科技元素。
個 App 真係只係放喺度㗎咋,唔會同張床墊互動㗎?。
▲下載咗個 App 之後(圖一),可先睇一睇說明:叫你開著個 App,差住電放枕頭旁(圖二);App 入面有得設定鬧鐘(圖三)及選填你嘅睡前活動(圖四)。
不過,佢都有為你的睡眠大致做個分析,包括有長度、深度、效率等,可以俾你大約知道你瞓成點。不過,港女就覺得個 App 未必偵測到細幅度嘅身體動作,而就算身體郁都未必係代表你瞓得唔「冧」。港女反而覺得,如果呢個品牌有意喺呢方面發展,可以投資下啲腦電波技術,咁樣應該真係會準確啲喇。
▲圖左係佢個示範睡眠分析(港女心想,也睡得太差了吧?!);圖中係港女試用時嘅睡眠情況,連續幾日試用個 graph 都係咁,名乎其實「瞓到死咗」;圖右就係睡眠分析
分享到 :
最新影片
![](https://cdn.unwire.hk/wp-content/uploads/2024/09/iphone16_d_web2-694x390.jpg)