好多人都覺得自己嘅失敗經歷不堪回首，但常言道：「失敗乃成功之母」，唔衰過又點知咩係啱咩係錯吖！瑞典一位心理學家 Dr. Samuel West 研究咗「失敗及成功」 7 年咁耐，佢接受外國傳媒訪問嘅時候話，自己已經厭倦咗社會大眾只係對「成功」予以肯定，因為做同創意有關的工作，有八、九成都會失敗告終。為咗同呢個只著眼成功的社會抗衡，佢於是收集失敗產品，並將會於 6 月喺瑞典的 Helsingborg 開設「失敗博物館」，展出唔同行業嘅失敗品。
▲ 瑞典心理學家 Dr. Samuel West（圖片來源：Rock 95）
Samuel 話電子失敗品佔博物館一個好大嘅部分，仲講笑咁話多到可以整間「失敗 Smartphone 博物館」。我地一齊睇睇過往有啲咩科技失敗品將會展出：
Apple Newton MessagePad
唔好以為科技巨頭公司就一定成功，佢地都經歷過低潮。1993 年製造嘅 Apple Newton 就係其中一個失敗展品。
Google Glass
Google 都無例外，Google Glass 雖然都只係 3 年前開售，但不消一年就講咗拜拜，難怪被納入失敗品之列。
Nokia N-Gage
唔知有冇讀者曾經擁有過呢？呢部機喺 2003 年發行，結合電話同遊戲機，聽講當年整出嚟係為咗打任天堂嘅 Gameboy，不過由於設計不良，出現一年又講拜拜。
TwitterPeek 發帖器
Rejuvenique 電能面膜
呢個咁恐怖嘅面具係 1999 年出產，故名思義就係電你塊面，可以緊緻面部皮膚咁話。如果而家有公司整部咁嘅嘢出嚟俾啲美容 KOL 試，可能會好啲，哈哈哈～
Segway 代步車
對於 Segway 係失敗展品之一，Samuel 都覺得幾驚訝，因為佢都覺得代步車真係可以改變到大眾出行嘅方式。港女就唔驚訝喇，你睇香港，法例咁多年都無與時並進就知啦～
其他失敗品…
而除咗科技/電子失敗品之外，仲有展出其他行業嘅失敗品，例如高露潔出嘅急凍食品、可口可樂出嘅咖啡味可樂及 New Coke、Donald Trump 出嘅桌遊 Trump: The Game 等等。Samuel 就話部分失敗展品其實有幫間公司更上一層樓，等佢地認清市場及改良產品。佢希望參觀者去完佢個博物館，恥笑 了解咗啲失敗品，唔會再害怕失敗，並從失敗中學習。
港女有機會再去瑞典嘅話都想去睇下個博物館呀！話時話，你地又覺得有咩產品可以放入去展出呢？?
資料來源：Museum of Failure
