先達咁多手機舖死鬥爛鬥,賣手機已經鬥到冇乜肉食,較有財力的舖頭,都開始試賣其他 Gadget,開拓多個市場,於是鐵定在美國時間 4 月 3 日開售的 iPad,就成為先達的最新爭生意工具。
先達地下呢間手機舖,可以幫客代訂 4 月 3 日出的 Wi-Fi 版及 4 月底出的 Wi-Fi 加 3G 版 iPad,但有冇人訂就好難講。
之前搶先賣過 iPhone 同好多新款手機的舖頭 G-World,今次都一早講明會鬥快賣 iPad,老闆 Lo 哥勁有信心咁話已經訂了十幾部,預計最快 4 月 4 日下午就會運到開售。地下另一間較大規模的手機舖收到風後,又跟住貼出廣告,話提供代訂 iPad 服務,聲稱到貨時間同 G-World 差唔多。價錢方面,G-World 話未定價,地下間舖就好飄忽,唔同時間問唔同 Sales,銀碼都會唔同,大約係貴過蘋果定價 $100 至 $300。
其實在蘋果網站買機係冇乜難度,一般人根本冇需要幫襯先達。先達舖唯一吸引到買家的,就係最快有現貨到手,所以部機儘快運到係好緊要,早得一日得一日,遲少少都冇晒值價。通常散客向蘋果訂機,Delay 時間好少會超過一個禮拜,所以頭一星期就係先達賣 iPad 的黃金七日。之後部機會有咩人買?咪一 D 唔識上網的阿叔或者自由行囉,佢地唔知蘋果有得訂機先會幫襯o者!
連續三代 iPhone 都係由 G-World 最先在先達發售,今次佢都誓要做最快賣 iPad 的舖頭。
分享到 :
最新影片
![](https://cdn.unwire.hk/wp-content/uploads/2024/09/iphone16_d_web2-694x390.jpg)