尋日落雞亞搞左發佈會，推出玩款味道較重o既六色推蓋機 6700 slide，但原來近排佢仲有一部疑似新機到左先達，就係一樣係 6 字頭、一樣係玩推o既 6760 slide 水貨。點解話佢係疑似新機？係咁既，雖然佢打橫推出 QWERTY 鍵盤個 look 幾新鮮，但我硬係覺得佢個型號熟口熟面，問番先達中人，先醒起佢其實一早到過香港，仲要係幾個月之前，精明的消費者又點會上當?
話時話部機o係上年 10 月已o係外國出左，但直到上年 12 月，先達至有一、兩間舖入黎賣，仲要係賣完一、兩部就算果隻，唔好話大家，就連好多先達友都唔知有過呢部新機。跟住過多四個月，即係到左近排，終於再有幾間手機舖入貨賣佢，佢o地就當正部機係新機咁賣，同 D 客講係新，連開價都係新機價。點解咁講？因為四個月前果一、兩間手機舖開價 $2,080 至 $2,280，而家 D 舖頭又係賣番 $1,980 至 $2,180，冇乜因過左咁耐而跌價。
其實部機o既賣點主要都係 S60、GPS、3.5G、320 萬像素鏡頭（仲要冇自動對焦！）呢 D 基本野，就算加埋有原裝簡體介面同輸入法呢個優點，最多都只值一千中間，賣到 $2,000 根本唔多吸引，呢個就係咁耐都冇人入大貨番香港賣o既主因。今次部機「復出」，仲要撞正 iPad 登場，上星期所有人行入先達都掛住睇 iPad，冇人得閒理佢，令佢成為第二次受忽視o既「新機」，唔知下次 D 舖再賣佢時，會唔會又當佢係新機賣呢？
