相信大家係呢幾日，都係不停咁俾身邊o既朋友、親戚左一句 iPhone 4 右一句iPhone 4，我先之達人都唔例外，日日俾電話轟炸，打黎問收緊幾錢，我亦勉為其難，日日都去先達問價。不過今日我行先達時真係嚇一嚇，因為一路行，一路聽到好多人講以下類似說話：「喂！你尋日報個價唔係咁過喎！」「嘩！個價有冇咁低呀！仲話高價收機！」「唔收！唔收iPhone 4住！」究竟發生咩事？
我捉左個手機舖朋友仔了解o下咩事，原來其中一個原因係大陸水貨客停止收機，相信係因為行貨 iPhone 4 比想像中多，大陸市場仲未消化得切。始終過萬蚊一部電話，唔係真係個個捨得買，如果套唔到現，自然唔會再收機啦！
另一個原因就係 iPhone 4 可以 Jailbreak 到，相信呢樣係令大家高興o既事，但對先達班炒家就係一個惡夢！事關 Jailbreak o既下一步就係解鎖，就o黎有解鎖軟件去解美版 iPhone 4 o既消息，尋日o係先達吹到好行，咁就出事勒！始終美版返貨比港版平勁多嘛，而且仲有好多其他國家既水貨選擇。就係呢兩個原因，搞到 16GB 行貨回收價o係 4 日內由高峰 $9,100 直插落 $7,400，恆生指數都冇變得咁勁，仲有好多舖頭仲試過封盤唔收機添，簡直係跌到停板呀！
由於班大陸水貨客唔收機，先達班炒家為左散貨，都開始平賣 iPhone 4。不過大家唔好諗住係 D 咩 $4,988 之類o既價喎！「平賣」極都要成 $8,600 架，仍然係專攻大陸客！始終香港客唔會o係先達買 iPhone 4，全部上台買或者等 Apple Store 出貨啦！班炒家仲諗住好似 iPad 咁賺到笑（iPad 行貨到而家仲炒緊），嘿！今勻真係損手爛腳啦！
30/7-2/8 iPhone 4 收機價
16GB/32GB
30/7 $9,100/$9,800
31/7 $8,500/$9,300
1/8 $8,300/$9,000
2/8 $7,400/$8,500
