[串哥報料] Nexus 7 行貨傳八月推出？香港行貨價售 $2,698?

最近 Google Nexus 7 水貨抵港，串哥身邊都有唔少 FD 想買，不過一見到成 5k 的價位，真係即刻唔洗諗。(不過 5k 嗰批貨已經沽清喇，買家是大陸人)。 最近有行家收到風，呢部「平霸」Google「親生仔」平板，好快喺香港有行貨賣，時間就大約八月左右啦，而推出嘅就唔係 Google，而係 Asus 自己出，情況就好似 Samsung 自己推 Galaxy Nexus 一樣。至於大家同串哥最關心嘅行貨價，嗰位行家就無講，叫我自己上網睇啦，但就肯定唔會 8GB 賣 US$199（約 HK$1,543）咁平囉！

大家都知我串哥一向八卦慣架啦，唔係點幫大家八到咁多正料？於是就根據個個行家俾嘅格價網上去睇睇啦，原來真係有間公司標咗個 Nexus 7 行貨價出來，寫明 $2,698，又話「快將推出，歡迎訂購」，仲話有「華碩一年國際保用」！不過聽番我舖頭入面嘅華碩 Sales 講，佢又話公司完全未有消息幾時有行貨喎。

所以我串哥都係咁話啦，呢啲路邊傳聞嘅嘢，大家都係唔好咁上心，認真你就肯定輸硬！要穩陣，等華碩宣布幾時出行貨，到時再決定買唔買啦，不過老老實實，呢部機來到香港，乜嘢 Google Music、Movie、Magazine 都用唔到，得番部剩機用，咁點解我唔寧願買番部 iPad，起碼我可以喺 iTunes 用 $38 買番隻 MJ 嘅精選碟？又或者用 $28 租番套《龍紋身的女孩》放假慢慢煲？遲啲仲話會出差唔多尺寸嘅 iPad Mini，又話售價都係 US$199！咁嘅樣，我買 iPad 唔好？大家話啱唔啱先？

來源：香港格價網