iPhone 5S 新增指紋認證功能，指紋感應器部分相當高科技，圓形金屬圈用來偵測生物特徵，斬手指都唔可以過到認證。外國較早前找來了一樣是生物的「貓星人」做測試，結果真係得！unwire 編輯部取得真機後，亦找來編輯部吉祥貓「肥仔豆」做測試！
成功登記指紋！
要做到指紋解鎖，就要先登記機主的手指指紋先，最多可以登記 5 個。而為左測試貓掌是否可行，編輯部的 iPhone 5S 就將其中一組留俾肥仔豆的右手。
登記過程發現相當唔容易，因為貓掌劃分為幾個肉球區域，而登記過程又要認完收起，又放返落去好幾回，貓本身坐唔定，令登記極為高難度。結果小編要指定中央肉球，每次命中同一位置玩了 3 分鐘才成功，要哄又要獎罐罐，不過肥仔豆咁叻仔，你應得的！
實測影片
至於登記到，又代唔代表真係解到鎖？編輯部拍低了以下影片。結果發現：用登記的右手只要拍下去時命中中央肉球，果然可以解到鎖；相反，用左手時試晒所有肉球都唔成功，果然 iPhone 5S 識認住貓星人貓掌肉球獨特紋理。大家可以考慮下要趕功或溫書時，用呢招令自己好難先用到手機，提升自己專注度喔~
分享到 :
最新影片
