Panasonic 的「攝神」手機 LUMIX CM1，今日正式在香港發佈，早前亦已同大家報過價。大抵上，香港版同之前測試過的日本水貨無乜分別，但小編就發現了發佈會現場有兩項過癮嘢：CM1 原來可以加鏡加 filter，而且有唔少配件陳列咗出來！而家就等 Edward 帶大家去睇睇！
可以換 / 加鏡頭？對！37mm 就得！
手機相機可以換鏡頭？無錯！係 CM1 上，只要係 37mm 口徑的鏡頭，都可以替換上去，而方法都好簡單：只要旋轉開 CM1 鏡頭上面的銀色蓋，再扭上鏡頭，完成！不過唔好以為係 module 替換個種，只係係本身個鏡頭上面，加多個鏡頭 only，所以影出來的效果唔會好似 Sony 的 QX 系列鏡頭咁好，好似 Edward 試用的 2X tele 鏡頭，影個時會有個黑色圈，但效果真係影遠咗，叫做 get the job done。對於完美主義者，well，都係用番相機本身個鏡頭好了。
▲要換鏡頭（其實應該係加鏡頭）好簡單，只要扭開上圖鏡頭邊呢個銀色蓋。
▲然後扭上鏡頭，得咗！
▲原本手機鏡頭影出來的效果。
▲小編扭了 2X tele 遠攝鏡頭上去，可以見到真係影得近咗好多，不過四周就有黑邊，得中間一個圓形位用得囉。
▲同埋扭咗鏡頭上去，如果遇上有電話打入來，都……幾奇怪。
▲基本上只要接口係 37mm 的鏡頭都用得著。
CM 1 可用配件巡禮
CM1 除了展出真機外，現場亦展示了一大堆配件，唔止有唔同顏色的皮袋、皮套之外，仲有第三方廠商提供的轉接器，可以加入唔同顏色的濾鏡，增加影相風格的自由度，真係搞到玩手機影相玩到好似相機咁 pro，勁！
▲除鏡頭外，現場亦展示出一大堆可以用係 CM1 上面的接環及配件。
▲小編最鍾意就係呢個轉接器，加了上去可以加入唔同顏色的濾鏡，搞到手機影相都可以好 pro！
▲另外一貫 Panasonic 出相機的特色，出手機都有一堆原廠皮套、皮袋，而且顏色仲要幾 sharp 幾靚添！
總結：玩相都可以好 pro！
整體來講，效能同埋影相表現今次就唔講啦，因為上次試水機個時都試咗唔少。而今次的香港發佈會，見到 CM1 唔止本身內建名廠鏡頭，仲可以加鏡頭，小編呢一刻先發現原來手機影相都可以玩得好 pro！CM1 可以講係令 Edward 大開眼界（雖然效果唔係完美……）。加上唔同吸引顏色的袋、套，真係有一刻令小編忘記了 CM1 其實是一部手機而唔係一部相機……
P.S.：下面張相係無用閃燈情況下用 CM1 影的，大家覺得靚嗎？
售價：$8,490
查詢：信興電器（2833 0955）
