HTC 早前在中國發佈了號稱今年旗下最強的旗艦手機 One M9+，本以為只是「中國限定」，誰不知轉個頭就宣佈會在香港推出！昨日 HTC 就舉行了 One M9+ 的發佈會，究竟初步用起來感覺係點？同 M9 又有咩唔同？而家就同大家介紹一下。
機身大啲都好揸手
相比 M9 的 5 吋熒幕，M9+ 採用了 5.2 吋熒幕，而由於兩機採用相同設計，加上 M9+ 底部多了個指紋辨識器，所以機身自然比 M9 大一點。不過在使用方面，M9+ 手感其實同 M9 差唔多，單手掌握或操控都唔見有咩問題。
▲從此圖大家可以見到 M9+（右）機身上確實比 M9（左）大少許。
▲採用 5 吋熒幕的 One M9，要單手操控自然無問題。
▲而採用 5.2 吋熒幕的 M9+，雖然機身是大一點，但亦不影響單手操控體驗。
▲另外從側面睇，M9+（下）的設計確實與 M9（上）相同。
終於有旗艦 2K 芒！
之前推出 M9，雖然手感係唔錯，但去到 2015 年旗艦機仲係用 1080p，售價又近 6k，又真係幾「責洗」。去到 M9+，HTC 終於俾番個 2K 芒俾大家，而且同之前推出的 E9+ 的 2K 芒相比，M9+ 的熒幕顯示質素更高，色溫亦更準（E9+ 始終有偏藍問題）。就算同之前推出的 LG G4 相比，M9+ 色準都更佳（G4 熒幕有輕微偏藍）。另外，亮度方面，正面去睇 M9+ 的熒幕比起 E9+ 甚至 LG G4 都要光，就呢一點確實令小編有點另眼相看；唯一係如果側少少睇，M9+ 亮度都有點暗，這是 IPS 2K LCD 的共同缺點。整體來講，M9+ 的 2K 熒幕，總算俾到大家「旗艦機」的感覺，呢一點係抵讚。
▲同 M9（左）比較，M9+ 的熒幕色準比較好，而 M9 有少許偏藍情況。
▲可視角度來講，M9+（下）同 M9（上）差唔多。
▲至於與 LG G4（左）比較，M9+（右）亦比較準確，沒有 G4 的偏藍情況。
▲至於可視角度來講，LG G4（上）與 M9+（下）是差不多，不過肉眼所睇兩部機都會比正面睇暗。
指紋辨識媲美 iPhone！
另外，M9+ 相比 M9 而言，另一點最大不同就係加入了指紋辨識功能。有別於之前 One Max 的指紋辨識器位於機背，而且需要由上而下輕掃的方式進行掃描，M9+ 的指紋辨識器就更似 S6 edge、iPhone 6 / 6 Plus 的操作方法，只需要一按即可解鎖，尤其是用係 M9+ 呢部擁有 5.2 吋大熒幕的機款來講，肯定方便好多。另外，用家亦可以在設定中選擇按下指紋直入 Home 介面，而無須先顯示解鎖畫面再進入，令解鎖速度大大加快，呢一點都係抵讚之處！
不過相比 iPhone 同埋 S6 系列的指紋可用作付款或者買 APPS 時作身份認證，HTC 的指紋辨識器就只能用於解鎖熒幕及當 Home 制使用，就連加入「私密模式」，容許用家將唔想人地見到的相片、影片、文件、APPS 等放進去呢樣功能都無，就真係單調咗啲囉！希望未來 HTC 可以加入，就算用唔到來俾錢，起碼個指紋功能都實用好多。
▲M9+（下方）與 M9（上方）的最大分別之一，是多了個指紋辨識器。
▲與 iPhone 6 / 6 Plus、S6 / S6 edge 一樣，設定時同樣要按下數次並輕微移動手指位置。
▲M9+ 的指紋解鎖比其他手機好的，是可以在設定中勾選「首頁快捷鍵」，這樣手指按下辨識器時，並不會進入解鎖介面，而是直接回到首頁。
Duo Camera 重現！但有點……
相比 M9，M9+ 另一項不同之處，就在於鏡頭。M9 只採用一個 2,000 萬像素的鏡頭，而係 M9+ 上，就綜合了 M8 及 M9 的鏡頭特點，推出了全新的 Duo Camera！不過！！！大家唔好太興奮住，因為小編上文講嘅「綜合」，HTC 就真係將兩個鏡頭合二為一而已，換言之用家一係就揀 M9 的「High-res 鏡頭」拍攝 2,000 萬像素的相片，一係就揀 M8 的「Duo 鏡頭」拍攝只有 400 萬像素的可後製設定景深的相片！這種設計，其實令本身已有點「雞肋」的 Duo Camera 更加「雞肋」，老實說如果俾我可以影到 2,000 萬像素的相片，為何我要選擇影 400 萬的？另外實在又有多少人會選擇在拍攝完回家後，才再調較景深？老實說，未必無，但小編身邊有用過 M8 的朋友，10 個有 9 個都話無用過。所以重新加入 Duo Camera，又影唔到像素提升的相片，Edward 覺得是有點多餘。
▲M9+（上方）明顯比 M9（下方）在主鏡頭上方多了一個小鏡頭，M8 年代的 Duo Camera 回歸了。
▲只要係相機介面左方點按「Switch to Duo」。
就可以進入 Duo Camera 模式。
▲相片拍攝後進入相簿，如以 Duo Camera 拍攝的相片，在左下角會有一個圖示。點按它再選擇 UFocus，就可以在相片選擇焦點，亦可以用右方的條狀操控設定景深深淺度。
▲不過 Duo Camera 拍攝出來的相片，只有 400 萬像素，但相片體積就因為內藏了計算景深的數據，所以體積大達 5MB 以上！
▲相反使用一般模式（16：9）拍照，像素為 1,600 萬像素，但相片體積只是 4MB 左右，相比之下較細。
還有的是，M9 在五月初推出的更新，其實加入了 RAW 相機模式，可讓用家調較不同的拍攝設定，又可以影無壓縮 RAW 相片。本以為新推出的 M9+ 自然會有此功能，但 Edward 遍尋亦看不見！所以在相機設計中，Edward 的結論只有一個字：唉……
▲在 3 個月前在香港發佈的 One M9，已在五月初的更新加入 RAW 相機功能。
▲但在昨日才發佈的 M9+ 上卻沒有了 RAW 相機功能，這一點令 Edward 十分費解……
換 U 不損流暢度
最後一項 M9+ 與 M9 不同之處，就在於硬件規格。M9+ 採用了 MTK MT6795T 2.2GHz 八核心處理器，可能大家會擔心：究竟相比 M9 採用的 Qualcomm Snapdragon 810 1.56GHz 八核心處理器，會唔會慢咗？Edward 就以安兔兔評測測試過，M9+ 的分數都高達 48,158 分，相比 M9 所獲得的 50,362 分，真係唔差好遠。而實際上用落，M9+ 始終都有 3GB RAM，順暢度都幾高，用落都唔覺有窒嘅情況出現，不過耗電情況同埋會唔會有 APP 撞，就真係要試一排先可以同大家報告了。
▲採用 Qualcomm Snapdragon 810 處理器的 One M9 在安兔兔評測獲得 50,362 分。
▲而採用 MTK MT6795T 處理器的 M9+，也獲得 48,158 分，大家就可見到兩機效能上其實相差不遠。
Edward：「咁至係旗艦！但唔該俾番 RAW 模式來……」
整體來講，HTC 今次推出的 One M9+，相比之前的 M9，真係可以話真正叫得做旗艦級數。而且 M9+ 的訂價與 M9 一樣，都係 $5,998，始終無破 6k，對於 Edward 來講都覺得唔算十分貴。不過 M9+ 的 Duo Camera 鏡頭，始終真係好雞肋，加上又重新抽起 RAW 模式，Edward 覺得始終都唔太明（因為 M9 都有……）。但整體來講，俾呢個價錢去買 M9+，點都比俾來買 M9 值好多。如果大家鍾意用金屬機身的 Android 手機，One M9+ 都算係唔錯嘅選擇。
售價：$5,998
查詢：HTC（3077 5588）
