相信唔少讀者都收到風，風靡美國的大型盛夏派對《SlideTheCity》會在 8月22日至24日(星期六至星期一) 首度「瀡」到香港。不過地點一直保持神秘，更有不少網民建議在彌敦道舉行。今日官方終於正式宣佈滑梯將會在啟德郵輪碼頭停泊區出現，好讓大家可以邊瀡邊欣賞維港景色。
瀡滑梯到底有無水？
相信有很多讀者都同小編有同樣的疑問，到底 1000呎 (約 300米)的滑梯應該點瀡。今日主辦單位就率先興建一條五十呎迷你滑梯，並請來 Model 示範。就小編所見，原來滑梯真係有水！不過唔多，只能有少量的衝力，Model 瀡到一半就已經停下來了 。而《SlideTheCity HK》香港區代表 Carvin Chan 表示「滑梯用的水極少，相比泳池每日用十加侖水，滑梯只會用兩加侖，為確保衝力，1000呎中將會有 3/4 的長度是斜台，而斜台會高 16.5 至 19.8 呎。」
點先可以一瀡到尾？
雖然話好技術的人一分鐘可以滑到尾，但其實都未必個個可以一瀡到底。眼見數位 Model 只有一兩個可以瀡得遠一點， Carvin 就教導大家幾個重點。首先一定要用水泡，然後要助跑，再衝出去。記得瀡的時候要重心向前，四肢盡量保持在水泡內。不過，就算未能一瀡到底都唔怕，到時每 10-15米會有一個工作人員，協助各位繼續向前。
▲ 這位 Model 就係錯誤示範，瀡的時候手腳記得離開滑梯，減低阻力！
▲ 有需要的時候可以用手輕推滑梯邊，增加衝力。
▲ 坐在滑梯上，四肢向上就係最正確的玩法了！
瀡足一日滑梯都唔悶？
講明 Party ，當然唔止滑梯咁簡單。到時仲會有餐飲專區，讓三五知己體驗千呎大型滑梯後好好享受。另外，每日下午 3時開始，連續 7小時每小時於室外大型充氣的帳篷內都會舉行每節 45分鐘的DJ Party。此外，場地內亦設有十多個體驗攤位，大家可於攤位內參加有獎小遊戲，贏個新水泡再瀡過。
全日會唔會瀡得幾次？
Carvin 表示 早前登記購買「早鳥門票」的人超過 4萬人，將會抽出 2萬人率先試玩，可見反應都好勇躍。雖然香港人好鍾意排隊，但為免大家排隊的時間多過瀡滑梯的時間，主辦單位每日限制了 6000人入場，係無得 Walk in 入去啊，所以要 8月22至 24日入到場的話，大家要盡快上網買定飛啦！
點先係最抵玩？
主辦單位設有 3種門票，正價門票在本月22日發售，日間無限次任玩售 480元，而單次及三次體驗，分別售 150及 320元。如果怕唔知點揀，其實都唔怕 Carvin 表示購買單次門票的人，如果唔夠喉可以即日升級做日間無限次體驗，而且日間無限次體驗可以直玩到夜晚，所以到時先揀都唔怕啦！
| 售價 | ||||
| 票種 | 早鳥門票 | 正價門票 | 體驗時間 | 套票贈品 |
| 日間無限次體驗 | 港幣420元 | 港幣480元 | 早上10時至傍晚6時(入場時間:早上9時30分) |
|
| 晚間無限次體驗 | 港幣420元 | 港幣480元 | 傍晚5時至晚上10時(入場時間:下午4時正) |
|
| 單次體驗 | 港幣120元 | 港幣150元 | 早上11時至傍晚5時(入場時間:早上10時30分) |
|
| 三次體驗 | 港幣280元 | 港幣320元 | 早上11時至傍晚5時(入場時間:早上10時30分) |
|
