香港時間昨日凌晨，Apple 就推出了全新的電腦作業系統 Mac OS X 10.11 El Capitan。雖然今次唔係好多新功能，但就有唔少用家一直要求的介面強化及補完。究竟用落係點？Edward 就係舊年買的 MacBook Air 11″ 上面裝咗 Developer beta 版，而家就同大家分享一下使用體驗啦。
新「蘋方」中文字體顯更清晰
之前在非Retina 熒幕的 MBA 11″ 上睇中文字，感覺有係有點辛苦，因為係 Yosemite 上中文字線條太幼，所以變得好難睇，中文字全部好似唔係好 sharp 咁。係 El Capitan，無論中文或英文預設都採用了粗體字，以後睇字就唔再覺得辛苦了。
另外，中文輸入方面，內建的拼音輸入法，準確度亦大為提升，而速成等輸入法的聯想字亦大大加強，例如：Edward 輸入「小心」兩字，已出現了「翼翼」這個聯想字，以後大家或許可以放棄奇摩輸入法，專心用番內建的中文輸入法了（除非 Windows 的速成字排字順序你已好似 Edward 咁記哂入腦，難以推倒重來……）。
Spotlight 功能未完善
今次 El Capitan 的一大重點，就係 Spotlight 功能大幅強化，唔止搜尋功能更強勁，而且亦加入建議功能，例如：輸入 Weather，可即時知道所在城市的天氣；輸入 NBA Golden States Warriors，可以知道最新一場 NBA 總決賽賽果。另外，Spotlight 視窗唔止可以係桌面四圍移動，亦可以放大縮細。不過 Edward 試用過 El Capitan 的第一版本 beta，就發現暫時未係咁完善，例如：天氣、賽果等等都未搜尋得到，希望下一版本可以加入吧，畢竟有咁既功能，Spotlight 終於變成「可用 able」，唔洗下下開 Safari 搜尋了。
▲Spotlight 視窗可以在桌面上隨意移動位置。
▲搜尋結果亦比以往更精準，範圍亦更廣泛。
▲用來計數都得！
▲視窗大小亦可按用家需要而自行設定。
▲不過搜尋賽果、天氣等功能，似乎在這個初版 El Capitan 中仍未加入。
此外，El Capitan 的搜尋功能亦更人性化，例如：當大家輸入日程中的地點時，如果輸入「Mong Kok」，系統就會列出一堆有關旺角的地點，供大家選擇。當然，大家仍然可以自行輸入相關地點名稱，但如果建議列表已有相關選項，大家就可以打少幾隻字，何樂而不為？
終於可以用盡大熒幕！
以往係 Mac，Edward 覺得只有買熒幕大、高解像度的機款先至用得盡成個桌面，但奈何預算有限，加上流動性對於記者來講先係「皇道」，所以最後都只係買 MBA 11″。不過問題來了：11″ MBA 熒幕細之餘，解像度又得 1,366 x 768，開親 APPS 都係疊住疊住咁放上去，要同時係兩個 APPS 之間就只能「善用」Command + Tab 呢個 shortcut，真係幾麻煩。今次 El Capitan 就加入了 Split Screens 功能，在每個桌面用家都可以同時放兩個 APPS，而且啟動都好簡單（雖然未至於簡單好似 Windows 咁將視窗 drag 去熒幕最左或最右就得……）仲可以調較兩個視窗的大細，同 Windows 的 Snap 一模一樣，咁就真係方便好多啦！
▲要使用 Split Screens 功能好簡單，只要按實視窗左上角的綠色按鍵。（當然大前提係大家的桌面要開啟多過一個 Finder 或者 APP 啦。）
▲然後拉到希望放置的位置就放手，就可以了。
▲而另一個 APP 或視窗就會自動以全熒幕模式放在熒幕另一邊。
▲要調位？同樣按實綠色制然後拉到熒幕另一邊就得。
▲拉動中間的黑色線，就可以調整兩邊 APPS 或視窗的大細。
不過 Edward 試過，有部分 APP，例如：郵件，就唔可以縮到得番用 1/3 個熒幕，最盡都只能縮到用一半熒幕，呢一點大家就要留意啦。
另外，桌面佈局方面，如果某個 APP 想用全熒幕模式，以前可能一定要禁左上角的全熒幕模式制，但而家只需要 3 隻手指係 TouchPad 向上一掃，再將 APP 拖拉去兩個桌面中間，就 ok 了，又係好方便的設計！
▲舉例，Edward 想用一整頁全熒幕模式用 iTunes。
▲只要用三指手勢在 TouchPad 向上一掃，然後將 iTunes 拉到兩個桌面中間的位置，然後放手。
▲iTunes 就會以全熒幕模式展示了，連綠色制都唔洗禁！
新 Safari 真係好好用！
另一個今次 El Capitan 的強化重點，就係 Safari（其實有邊個新 Mac OS 唔係用 Safari 做強化重點？！）。而今次的 Safari，強化的唔係新功能，而係使用體驗。Edward 最鍾意的就係佢新的 Pinned Sites 功能，可以將成日開的網頁拉到去分頁標籤最左方，就可以永久 bookmark 落去，而且 Edward 亦試過，就算關了電腦，再開個時 pinned 了的網頁都會繼續保留在相同位置，唔洗好似以前咁要放落書籤欄，要搵番個時要慢慢 look 番出來咁麻煩。
▲當開啟多過一個分頁時，只要禁住網站名稱的欄不放。
▲然後拉到最左方，就可以將常瀏覽網頁加入到 Pinned Sites。
▲想加入幾多 Pinned Sites 都無問題。
▲Edward 測試過，就算完全關閉了 Safari，再重開的時候，之前 Pinned 了的網站仍然會放在左上角，呢個方法比將常用網頁放係 bookmark 更方便！
另外，分享功能方面，在 Safari 右上角亦多了個分享制，俾大家禁兩下就可以將網站分享到唔同的社交網站、應用程式等，而 Edward 覺得就正的就係可以分享去 Reminder 或者備忘錄，呢一點真係超方便哩！
隨時關掉煩人自動播放影片音效
有時開緊會，要開個 Facebook 同同事分享啲嘢，但咁啱之前唔記得熄 Facebook 入面的 Video Auto-Play 功能，咁就好尷尬了。而係 El Capitan 的 Safari 入面，係網址欄最右方，如果該網站有發聲元素（音樂或影片）出現，就會出現喇叭圖示，只要點按它一下，就可以立即關掉該網站的音效，咁樣大家就算去到有聲音的網頁，既唔洗一嘢 mute 哂成部電腦的音效，亦唔洗慢慢搵聲音的來源啦。
▲在會發出聲音的網站，在網址欄右方會出現一個喇叭圖示。
▲只要點按它一下，就可以立即靜音。
更正 Mail APP 可開 Tab
另外，El Capitan 入面的郵箱 APP Mail 都有更新，除了加入新手勢操控（在郵件向右一掃變成未閱 / 已閱、向左一掃刪除郵件）外，最特別的係好似 Safari 瀏覽器咁加入 Tabbed 分頁功能，大家就算開幾多封新 mail，都會放係同一個視窗入面，當全熒幕模式使用 Mail APP 時，更會顯示係最底部。如果大家想將人地 send 俾你的相片傳送俾另一個朋友，更只需要係原郵件入面 drag 張相出來，然後拖拉去新郵件度就 ok，快捷方便！
▲當你收到一張靚相，想 forward 俾另一朋友欣賞，以往可能要先儲存到電腦，然後再開新電郵，然後將相片加入至附件然後傳送才可做到。El Capitan 的 Mail，當大家收到相片後，先開個新電郵然後縮到最小，它就會放置在最底部（在全熒幕模式下）。
▲然後用 drag-and-drop 模式，將相片拉到底部位置。
▲然後剛才收起的新電郵視窗就會彈出來，最後將相片放在內文空白位置，再輸入收件人的電郵及標題，就大功告成了！
▲新 Mail APP 更支援分頁功能，要同時間編撰數封 email 完全無難度！
▲加入全新手勢操控，可以簡易將郵件標示為已讀 / 未讀或刪除電郵。
Mail 仲有一項新功能，就係同其他 APP 之間會有連動，例如：有朋友 send email 約你某日某時間去邊食飯咁樣樣，然後係 email 度就會 pop-up 一句問你係咪自動係日曆度 mark 低個時段，如果你揀「加入」，就會彈出日曆的 pop-up，大家只要填入相關資料，之後揀「Add to Calendar」，就可以完成約會紀錄，真係超級好用。
▲當收到有時間的電郵時，在內文上方會出現詢問用家是否加入到日曆的查詢。如是就點按「加入」。
▲之後就好似平時係日曆咁，填入日程詳情，最後點按「Add To Calendar」就 okay 啦！
提起日曆，其實 El Capitan 都加入了 Time to Leave 的新功能，就係會因應交通情況，會提醒用家應該何時離家，以便準時到達約會地點。這項功能，雖然只是小功能，但都算係體貼哩！
備忘錄令人忘記 Evernote！
另一個令 Edward 印象深刻的 El Capitan 功能，就係備忘錄。以前 Edward 都無乜幾可會係 Mac OS 上面用備忘錄呢隻 APP，就算係 iPhone 上面都好少機會，通常都係用 Evernote，因為佢唔止可以記錄文字、相片，就連 voice、影片都得。今次 El Capitan 入面的備忘錄，就大幅「Evernote」化，唔止可以記字放相，就連網頁、影片、甚至錄音或音樂檔都可以放！如果配合已升級咗 iOS 9 的 iPhone、iPad，仲可以係備忘錄到睇到 iPhone、iPad 上面畫的圖畫（通過 iCloud 同步）。雖然佢未做到 Evernote 的 OCR 功能（辨識名片），但對於大部分人來講，都已經足夠令大家放棄 Evernote 了。Apple 透過 El Capitan，似乎又「成功爭取」消滅多個第三方軟件了……
▲全新的備忘錄，基本上是完全 Evernote 化（除了唔可以玩 OCR 之外），遇上喜歡的網頁，由網址欄將網頁拉到備忘錄就可以了，仲會儲存該網頁的 thumbnail 添！
▲禁個制，亦可以將文字變做 To-Do List。
▲而且連唔同的多媒體檔案，包括：相片、影片同埋音效檔都可以放入去！
Apple Maps 新版香港未有份
至於昨晚的一個 El Capitan 重點 Apple Maps，就加入了公共交通資訊，但 Edward 係 MBA 11″ 上安裝了 El Capitan 後，就發覺 Apple 果然仍未將香港的公共交通資訊納入到 Apple Maps 內，就連在 keynote 內提及的深圳、北京等城市，都一樣未有相關資訊俾大家睇，Edward 試過就只有美國、英國這些國家的 Apple Maps 係而家有得查公共交通資訊。所以除非大家去歐、美國家旅行，否則呢項新功能都係得物無所用。
▲El Capitan 的 Apple Maps 加入了公共交通資訊，但係香港仲未用得。
▲就連係 keynote 中宣佈有提供相關資訊的北京同埋深圳都用唔到住。
▲不過係歐美國家的城市，例如：三藩市、倫敦就無問題。
另外，今次安裝的初版 El Capitan OS 的 Apple Maps，文字顯示上，尤其是中文字上似乎也有亂碼的情況出現，在地圖上顯示的中文字唔少都出現問題，但按下景點的詳細資訊，又回復正常。看來 Apple 在正式推出 El Capitan 前，仍有唔少嘢要執哩！
通知中心加入「搵朋友」功能
有時，大家都想知朋友身在何處，或者去到一個地方時，有無朋友在附近，咁樣就可以搵佢地聚聚、或者食飯等等。El Capitan 就繼之前有 Find My iPhone、Find My Mac、Find My Watch 等之後，加入 Find My Friend「搵朋友」功能。只要在通知中心使用相關 Widget，就可以見到有無朋友係附近，又或者知道他們的位置。不過大前提係：佢地要開放 GPS 分享功能，大家先至睇得到。
更多新功能強化體驗
除了以上的功能外，其實 El Capitan 也有不少功能，是 Apple 未有昨晚在台上介紹，但也加入到新 OS 內的，以下就為大家簡列一下吧：
- 全新中文轉英文輸入快捷鍵
- 檔案複製回復
- 航班自動感應
- Spotlight 搜尋優先搜尋 Safari
- 全新硬碟工具程式介面
- 在 Finder 中複製檔案路徑
- 全新 color picker
- 自動隱藏目錄欄
- 建議聯絡人
- Photos APP 可加入編輯延伸功能
- 改善了的自動填滿功能
- 全新日文輸入法
- 辭典 APP 支援更多語言
- 全新設計 crayon picker
- AirPlay 無線播放影片（當然是傳送至接駁了 Apple TV 的電視播放啦！）
- 上次搜尋紀錄
- 從彈出目錄重新命名檔案
- 加入阿拉伯及希伯來語系語音辨識
- 可自訂 Safari Reader 中的字體
總結：更人性化的作業系統
整體來講，Edward 用了半日時間，試用了 Mac OS X 10.11 El Capitan 這個最新 Mac OS 電腦作業系統，老實說突破或令人驚豔的功能不多，好多都係細微細眼的改變，但 Edward 的感覺，係可以講每一個新加或者改善了的功能，都係從「人」、「應用」的角度出發，貫徹了 Apple 一貫「以人為本」的設計精神，所以用落覺得既簡單又舒服，唔係人去適應系統，而係系統適應用家的使用習慣，提供更方便的生活方案，這一點是抵讚的。
至於暢順度方面，可能 Edward 使用的 MBA 11″，是 Core i7 + 8GB RAM 版本，所以用落完全唔覺有窒的情況出現（其實以往係 Yosemite 都唔太覺，而運作「已瘦身」的 El Capitan，更暢順是常識吧！）。Edward 覺得 Apple 只要盡快完善 Apple Maps 的香港圖資，加上完美化 Spotlight 的搜尋結果，Mac OS X El Capitan 絕對稱得上係將推出的 Windows 10 的勁敵哩！
分享到 :
最新影片
