之前都介紹過 Sanrio 一年一度既盛事將會於 8 月 6 日至 8 月 23 日係九龍灣國際展貿中心舉行。而我依莉詩今日就率先到左現場向 7 大 Sanrio 遊戲大師請教，務求令各位 wire民都可以一 take 過挑戰成功！
7大遊戲關卡
Sanrio Game Master 內有 7大遊戲關卡，分別由 7位遊戲大師 Hello Kitty、My Melody 、 Kuromi、Little Twin Stars、蛋黃哥、XO、馬騮仔 同 Patty & Jimmy 掌管。每次挑戰都需要一張遊戲券，成功的話就可以得到一個徽章同一次擲骰機會，每獲得 4個徽章就可以得到小寶藏。如果成功挑戰全部關卡又可以額外得到一個小寶藏。
▲ 係未入去之前會先係起點聽 3-4分鐘既遊戲講解。
▲ 之後你就可以選擇到遊戲百寶店買一套 $80 既新手包，包括攻略手冊、手冊封同 4 張遊戲券，準備出發！
▲ 另外，亦可以用 $30 購買一套三張既神奇法寶，以借助遊戲智者們既力量提高勝算！
1) My Melody 大師
講左咁多係時候開始啦！去到由 My Melody 掌管既積木城，除左影相之外，佢仲準備左結合砌積木同尋寶遊戲於一身既「積木拼拼樂」同大家玩。
玩法：係 15秒內係積木埋中找出 6個印有 Melody 圖案既大積木，然後砌出 Melody 圖案。
心得：找出木色既大積木，然後張有黑色既面面向自己，再砌就可以。不過因為枱比較高，小朋友要玩可能要大人全程抱起。
難度：★☆☆☆☆
2) Little Twin Stars 大師
Little Twin Stars 掌管既夢幻棋園以星形波子棋做主題，非常夢幻。聽說 Kiki 大師玩星星過三關時會揹著星星飛行，能隨心所欲擲向目標，百法百中，大師寶座實至名歸。而 Lala 大師手上既魔法棒能辨別方向，令挑戰者難以捉摸。
玩法：係 30秒內將 5個豆代拋出，擊中連續 3個圓圈就勝出。
心得：先擊中中間會更易成功過三關，而小編發覺行後兩步拋會比較容易中呢！
難度：★★★★☆
▲ 巨型既 Little Twin Stars 波子棋十分可愛，粒粒都有 Kiki 同 Lala 既圖案。
3) Bad Badtz-Maru(XO)大師
XO 大師變身成為街機主角，你都可以入去同佢對打一番啊！
玩法：連續按下按鈕，令 XO 既 3條頭髮同時吹起就成功。
心得：3個按鈕同時連續按，要快同唔可以停啊！
難度：★★☆☆☆
4) Osaru No Monkichi 大師
馬騮仔能在機關重重既迷宮中運用無窮既力量同機智的頭腦活動自如，如果自問能力同佢一樣高的話，可以拜訪一下。
玩法：將彈珠由起點走到迷宮終點，中途唔可以跌入洞。
心得：一開始認清終點同規劃好路線先好行。
難度：★★★☆☆
▲ 馬騮仔既關卡非常時尚，好有彈珠台既感覺。
5) Patty & Jimmy 大師
運動大 ,Patty & Jimmy 精通所有運動，你敢同佢地來一場保齡球大戰嗎？
玩法：將 3個膠保齡球推倒保齡球樽。
心得：膠既保齡球比保齡球樽輕，以推既方法比起用平時打保齡球既手法會較就手推倒目標。
難度：★★☆☆☆
6) Kuromi 大師
原來平時古靈精怪既 Kuromi 大師係一個非常好定力既大師。今次佢就坐鎮難度十足既扭計迷城，等你來挑戰！
玩法：係 15秒內，將電捧穩定穿過心型迷宮，途中唔可以碰到外圍。
心得：手要定，最好用手臂移動而非手腕。
難度：★★★☆☆
7) Gudetama(梳乎蛋)大師
蛋黃哥無論幾時都係懶洋洋，就算去到廚房，俾人煮緊都一樣唔願意郁呢！
玩法：係 30秒內令兩隻反轉既蛋黃哥面向自己。
心得：先將蛋黃哥移到最頂，再用雙手拋鑊，用貼近手柄位置接住。
難度：★★★☆☆
▲ 蛋黃哥廚房整到好似一個微波爐呢！
終極遊戲大師 Hello Kitty
當挑戰完 7個遊戲大師就可以去扭蛋殿堂拜見終極遊戲大師 Hello Kitty。入面會有多部扭蛋機等係解開封印左既神秘小寶藏。不過小編去既時候仲未有小寶藏係入面，所以都未知係咩。
3 大主題攝影區
除左玩唔同既攤位之外，場內仲有 3大主題攝影區。其中以位置會場中間既「Hello Kitty玩具屋」最大，其後就係「Tuxedo Sam 模型店」同「PomPomPurin 神奇畫廊」，可以比你瘋狂自拍。
Hello Kitty 玩具屋
小時候玩既 Hello Kitty 玩具屋放大到你都可以走入去，仲要係兩層咁多，小編都忍唔住走入去成為玩具屋既一部份呢！
▲ 會場中間既「Hello Kitty玩具屋」就好似小時候既玩具屋一樣，有著各種 Kitty 既家俬。
Tuxedo Sam 模型店
由店長 Tuxedo Sam 看管既模型店內展出左 My Melody 同 Little Twin Stars 既模型盒。你仲可以走入去成為模型既一部份添！另外，模型店出面更有巨型 Hello Kitty 機械人模型幫手睇鋪啊！
▲ KiKi 同 LaLa 都同豆腐人合體，令塊面變左方形。
PomPomPurin(布甸狗) 神奇畫廊
巨型的布甸狗神奇畫板非常搞笑，等你可以走埋去重溫兒時既回憶。
棋子大合照
去到終點，Kitty 、Melody 同 Little Twin Stars 化身成棋子同大家合照。
▲ 只要俾 $80，就有專人同大家影相，仲有埋個靚靚相框可以拎走。
遊戲大師期間限定店
嚟得呢 D 地方，都預左會有大量會場限定商品俾大家購買，總之無論你挑戰係咪成功，都唔會空手而回。
▲ 多用途牛仔布手提包 $280。
▲ 茶杯連立體造型杯蓋 $180
▲ 文件夾 $70/2個
▲ 海綿貼紙套裝 $80
依莉詩後記
展覽年年都係九展搞，本來就已經無乜新意，都係一班 Kitty 鐵粉先會去。好彩今年加左 7個唔同既 Sanrio 卡通，特別係蛋黃哥就可以引來其他既 Sanrio 粉絲出席。整體上，今次既影相位都幾多，好多都好精細，相信粉絲們都會願意俾百幾蚊入場影下相，起碼唔洗去商場同人逼。不過 D 攤位遊戲就 set 得比較高，要小朋友玩就好唔就手，大人要下下抱起佢應該都幾辛苦。
分享到 :
最新影片
