「完了吧，如無意外～」暑假終於都告一段落，學生哥又係時候重返校園喇！每年 unwire 都會幫同學做定開學準備功夫，之前有同事介紹咗各大院校的 Notebook 優惠，今次小編係呢度就同大家分享 5 個學生開學必備 Apps 啦！
1．Google Drive （包括 Docs、Sheets、Slides）
無論之前已經有幾多人講過都好，小編都要再提提大家一定要裝呢個 Group Project 必備程式！Google Drive 最犀利嘅地方係除左可以比你 Share 文件之外，仲可以比多人同時編輯，邊個做緊邊個部分都可以一清二楚。雖然未必可以杜絕 Freerider 出現，但起碼容易 D 跟進度，而且大家齊齊編輯同一份文件就可以慳返好多傳黎傳去嘅時間，亦都冇晒藉口話冇時間出黎傾，又做唔到啦，而最重要嘅係肯定唔會攪錯邊一份先係 Final version，唔會交錯功課喇！除左文字報告之外，做口頭匯報嗰陣，你亦只需要拎住手機做 presentation，唔駛吓吓望實部電腦，睇起上黎夠自然又 Pro D，分數都自然高Ｄ啦！
2．Pushbullet
咁大班同學入面肯定有人用 iPhone， 有人用 Android 手機；有人用 Windows，有人用 Mac，甚至有唔同 OS 的 Tablet 添！（媽呀，好亂呀）；即使係你自己都可能用緊唔同系統嘅電子產品，而呢隻 Pushbullet 就可以幫你快速跨平台咁傳送文字、Link、相片或者檔案，輕輕鬆鬆就可以將唔同嘅裝置連接起黎，非常方便喇。小編成日都會用手機記事，但就發現要將電話入面嘅文字或者檔案過入電腦再 show 出黎真係非常麻煩，成日要諗計點先可以 share 去電腦。有咗 Pushbullet 就可以好方便咁 share 野喇。
3．EasyBib
做過 paper 嘅人都實知道（未做過宜家話你知！），最難並唔係搵料、分析整理、被 advisor 疲勞轟炸… 而係用特定格式整理參考資料！EasyBib 真係勁方便，只要掃描書上嘅 ISBN 條碼，佢就會自動幫你嘅資料轉換成標準格式，仲有好多款唔同格式俾你揀（最經典嘅 APA、Chicago 同埋 MLA 已經 default 置頂，唔使慢慢碌），梗有一款啱你 Professor 嘅要求。除左書同埋論文，仲可以幫你整理埋新聞、網上資料等等嘅 citation，咁就唔使驚用錯格式比人扣分啦！
4．Scribd
中大校長沈祖堯兩年前喺開學禮上建議同學：「每個月讀一本書，一本同你主修科目無關嘅書、同你專業無關嘅書，一本讀完都唔會拉高你 GPA 嘅書。」小編深表認同，因為書可以幫你睇到更大嘅世界，學到更多唔同嘅知識，所以就特登推介呢隻 App 俾各位同學啦。Scribd 透過用戶共享資料，號稱世界上最大嘅網上圖書館，你可以係 app 入面建立自己嘅 booklist，用唔同分類整理好。個 App 以英文書為主，而且仲有好多新書，冇宿舍住又唔想特登返去圖書館借書嘅話，呢隻 app 就肯定可以幫到你手啦！
5．FireChat
我諗大家對 FireChat 都唔會太陌生，之前雨傘運動期間已經爆紅過一次，宜家重推多一次俾同學先。如果大家有上過堂，就一定知道好多 Lecture Theaters 有好多死位收唔到訊號、4G 跌 3G、3G 跌 2G，而且學校 WiFi 好多時都唔穩定，想同坐角落頭嘅同學傾計就唯有等落堂先得啦。不過 FireChat 用左藍芽技術，無訊號、無Data、無WiFi， 通通無問題，一樣可以照傾計、send 相，而且方圓 200 呎內都收得到，想識新朋友嘅話… 機會黎喇，飛雲！
分享到 :
最新影片
