作為睇咗波尤其是英超（92 – 93 年球季前為英甲）接近 30 年的筆者來講，英超絕對係我每年必睇的歐洲比賽。昨日傳來消息，已經擁有香港英超轉播權 2 年幾的 NowTV，播埋今季完成合約後，轉播權將會易手，而「新東家」的身份更是令人意外，因為並非傳統免費或收費電視，而係大搞近年流行的互聯網電視平台的 LeTV！姑勿論呢個傳聞是否屬實，作為睇波多年的筆者，係呢一刻真係有啲嘢想同大家分享一下。
收費電視愈收愈貴仲要一比就 2 年錢
對於好多人來講，睇波，尤其是要睇歐洲聯賽、歐聯歐霸或者各大型足球賽事，例如：世界盃、歐洲國家盃等，通常都焗住要個個月俾最少百幾蚊、通常都要 3、400 蚊 join 收費電視 plan，而且一簽最少都要簽 12 個月，如果想月費較划算，多數都要簽 24 個月。萬一中途睇開的聯賽轉播權易手，咁個收費電視就真係放咗係度得個擺字。
不過呢樣都唔係最麻煩，呢十幾年如果大家要睇歐洲波，就以英超為例，每個月動輒都要俾 3、400 蚊，先至可以睇得哂咁多場，當然呢樣同通漲同埋轉播權費用愈 bid 愈貴，電視營運商抱住「羊毛出自羊身上」的心態，月費自然愈加愈貴有好大關係啦。但對於消費者來講，俾幾百蚊為咗睇波，真係幾肉痛。
當然，你可以話：「貴？唔睇咪得囉！」係架，理論上係，但睇波就好似會上癮咁，當你作為球迷，尤其是好似筆者呢種有心愛球隊廿幾年的真球迷來講，有一兩年突然無得睇波，直頭有種李香琴係《家有喜事》入面嘅感覺……
上網「非法」睇？唔穩定兼侵權
當然有唔少人嫌睇波月費貴，又唔介意齋睇畫面唔聽評述，就會上網搵非法 link 或者 Sopcast 睇。當然呢個都係一種方法，但筆者都試過體驗一次，其實唔少 source 都好唔穩定，成日都有機會斷線，咁啱斷線個時入波，駁得番個時比數已變，真係灰到震。另外，呢種始終係侵犯版權的做法，筆者自然唔支持啦！
4 唔 4K , Who Cares？
廠商梗係話而家手機熒幕都有 4K 解像度的年代，1080p out 晒喇，其實對我黎講 720p 睇到場波已經好開心，各位球迷說對不對？對上一次 2014 年巴西世界盃，賽會已經有提供 4K 足球賽事直播，香港都有戲院承包直播部分賽事，當時都成為城中熱話，不過之後咪又係無以為繼。
其實 4K 受惠的當然唔係我呢啲窮鬼球迷，4K 波當然係特大熒幕先係最有發揮，以後酒吧、商場、戲院等等就有一個真正清晰的波睇，以前出球員資料啲字係大熒幕拉到化晒睇得好辛苦，同埋有時遠鏡都睇唔到球員球衣 number ，而家超高清就睇到了。
英超方面，其實 BT Sport 係今個球季開始，都提供 4K 賽事直播，又睇下香港呢邊有無 4K 大芒商場 show 攪喇！
堅持 4K 無問題，但收貴幾多先係重點
對畫質有要求的 unwire 讀者，一定會話我 Edward 720P 睇壞眼，1080P 都唔夠之類，如果你真係睇過 4K 波番唔到轉頭的話，咁其實都唔使太擔心。香港現時好多屋村都已經光纖入屋，網速最少都有 100M，理論上同時睇 4K 直播、上網睇 forum 玩 Facebook、甚至玩埋 online game 都夠用，重點為係，供應商 Server 放係邊，如果係香港的話當然沒有問題，但要出海的話就未必做到流暢了，因為香港出海 bandwidth 實在有限唯一係如果俾 4K 直播大家睇，但月費加到 5、600 蚊一個月，大家又制唔制咁解唧（又係錢作怪）！
流動平台另一趨勢！穩定性好重要
另外，自從智能手機、平板愈來愈普及，好多收費電視都已經唔止俾客戶單係電視上面睇波，而係係手機、平板都睇得到。就好似 NowTV 之前都推出過「隨身睇」APP，俾客戶係手機或者平板登入戶口，隨時隨地欣賞球賽。不過始終有好多時接收都唔太穩定，就算係 Wi-Fi 環境下都會睇睇下突然「低清」起哂格，又或者不停斷線，有時質素仲衰過上網搵非法轉播 link 睇波。試問呢個情況，又點說服到大家繼續「科水」去支持呢？
「人」先係重要因素！
好啦，既然講到技術上唔係問題，係咪代表邊間公司只要提供到 4K 睇波享受，就一定可以擄獲球迷們的心而轉台？睇來係，但作為資深球迷的筆者，我可以好肯定同大家講：唔係咁簡單！科技固然可以解決好多視覺、聽覺上的問題，令大家可以有最高的現場感享受，但睇波最重要都係「人」！
當然我唔係講緊球員啦，而係評述員。其實之前無論係有線定係 NowTV 講英超，都不約而同有「人」的問題：評述員唔專業無做足功課、評述員好偏頗某隊球隊明明有犯規都話無問題、缺少陣容或戰術分析等等，講波時只係識得搞下爛 gag、炒熱氣氛、或者講埋啲同現場球賽無相關的話題，有時真係嬲嬲地寧願轉去聽英文現場旁述，又或者直接上網睇外國電視台講波好過！所以，筆者覺得，你搞到技術幾勁都無意思，如果請唔到一班有質素的球評員（例如：何輝），都係會預咗俾球迷們罵到狗血淋頭！
球迷建議俾新舊營運商
而家其實都仲未知究竟來季開始連續三年英超的轉播權，究竟係咪真係落入 LeTV 手上，定係繼續係有線、NowTV 兩間收費電視台之間「輪迴」、定還是有第四間公司殺出「程咬金」橫刀奪愛？呢一刻連筆者自己都唔可以 100% 肯定。但作為睇波多年的球迷，筆者真係有番啲建議俾番各 potential 新營運公司：
專業評述員
搵班專業評述員，舊個班有唔少真係 hea 做，又唔專業又偏頗，可以考慮好似當年有線咁搞個足球評述員訓練班，俾班有志入行的年青人接受培訓，培養新血接班好過啦。
4K不是重點，穩定流暢勝於一切
其實最終係咪 4K 睇波，筆者覺得都唔係重點，但如果真係要搞 4K，唔該請做好壓力測試，因為英超係香港係異常有吸引力，加上唔少酒樓、食肆、酒吧都會播，一有比賽肯定會扯走好大量頻寬。如果無一個好的分流網絡，到時俾你睇到 4K 質素球賽，但流暢度就好似睇緊幻燈片，盞搞！
收費要有彈性
月費太貴啦！幾百蚊一個月齋睇波，其實係百物騰貴嘅今日，唔係個個負擔得起。最好就倣效中國或者美國 NBA 咁，可以俾大家一次過俾一年月費買 Season Pass 又得，逐個月俾月費睇又得，甚至逐場按需要俾錢睇亦得，又或者我可以揀貴啲睇 4K，或者我負擔唔起俾平啲睇番 1080p 質素算。當付費變得有彈性，球迷們可按個人能力同埋喜好去選擇適合自己嘅睇波 plan，肯定比而家每個月硬掘幾百蚊吸引得多！
製作更多相關的節目
請有心製造多啲同足球知識有關的節目，因為搞睇波並唔係單純直播球賽咁簡單，平時製作每周精華、球評人 + 球迷吹水節目、足球知識節目、足球 + 旅遊相關節目等等，都可以令各位球迷係睇波之餘，增長多啲對該地聯賽的認識。當然，球賽前的戰術分析（並非投注賠率分析！！！）、球賽中活動各種新科技進行分析、甚至球後請來本地、甚至外國著名前球星來進行點評，都係令球賽直播加分的重點。
要用香港人慣聽的用語
其實邊間搞都無問題，球評夠專業就得！不過唔該，唔好俾各位香港球迷聽到咩吉魯呀、厄齊爾呀、咩「好球」、「點球」呢啲非香港人口吻評述字眼囉，PLEASE！！
唔好夾硬要大家用某某品牌的電視、手機先可以睇得到，當然筆者明白如果有公司以高價投得英超轉播權，一定會用盡方法去宣傳自己公司的產品，但如果只限自己品牌產品先可以睇到，係香港市場會形同趕客！最好就係：想買電視嘅可以買佢嘅電視來睇、唔想買電視嘅又可以買電視盒駁住自己本身部電視欣賞、想係手機睇波嘅又可以揀用手機睇直播，而且咩牌子都得，咁就最 perfect 池啦！
分享到 :
最新影片
