相信到今時今日，好多人買手機，最重視嘅其中一項功能，肯定係影相！而對於女仔來講，前置鏡頭影自拍靚唔靚，更加係最重要嘅買機考慮因素！究竟今次兩部新 iPhone：iPhone 6s 同埋 6s Plus，係影相方面又表現成點？而家就同大家講講啦。
終於升像素至 1,200 萬
今次無論係 iPhone 6s 定係 6s Plus，鏡頭像素都升級至 1,200 萬，終於擺脫多代停留係 800 萬像素嘅情況。另外，今次 iPhone 6s / 6s Plus 都新增支援 4K 拍片，令佢終於可以同其他品牌手機廠嘅旗艦手機睇齊。不過大家要留意，今代 iPhone 6s 同埋 6s Plus，同上代 iPhone 6 同 6 Plus 之間嘅分別係一樣嘅，就係只有 iPhone 6s Plus 嘅鏡頭有 OIS 光學防手震功能，所以當係夜間或較暗地方影相，又或者手持邊行邊拍片，iPhone 6s Plus 都會比 iPhone 6s 有更好表現。
▲從以 iPhone 6s Plus 嘅相片大家睇到，相片解像度為 4,032 x 3,024，亦即係 1,200 萬像素。
▲至於拍片方面，預設係 1080p HD 30fps 質素，如果想轉為 4K 拍片，就要進入設定入面嘅相片與相機，再係「相機」嘅「錄製影片」選項入面，選擇 4K 就可以了。
▲iPhone 6s 雖然鏡頭像素同 iPhone 6s Plus 一樣，但後者就獨有光學防手震功能。大家可以見到呢張用 iPhone 6s 影嘅相，路牌上面文字係比較朦嘅。
▲但換上 iPhone 6s Plus 係同一位置拍攝，多得光學防手震 OIS 功能，相片係低光環境下拍攝沒有震動，銳利好多。
▲再放大相片 100% 俾大家睇下分別，左邊係用 iPhone 6s 影，而右邊係用 iPhone 6s Plus 影。
▲夠光環境下影又如何？呢張係用 iPhone 6s 影嘅。
▲而呢張就係用 iPhone 6s Plus 影嘅。
▲兩者放大相片 100% 再比較，如果環境夠光的話，OIS的作用就不大
▲至於拍片方面，有 OIS 有咩好處？小編就將兩部機好似咁痴住係塊紙版上面，然後拿住一路行一路拍片，而解像度就為 1080p 60fps。
拍片 iPhone 6s Plus OIS 效果 vs iPhone 6s
我地 unwire 將兩條片併在一起，各位可以看到 iPhone 6 Plus 的 OIS 在夠光時一樣能運作穩定影像，可以看到右則的畫面比較穩定
影片 Loading 中請耐心稍候..
相關文章:
【評測】MacBook Pro M4 2024 詳細效能評測 + 選購指南分析 7 大要點 【評測】Mac mini M4 2024：進階用家最應該買的 Apple 電腦 效能、日常應用詳細評測分析 【教學】iOS 18.1 如何用 Apple Intelligence 只需 2 個設定 + 香港免 VPN 也可用
4K 拍片體驗
不過筆者發覺 iPhone 6s 系列嘅 4K 拍片有樣好唔 user-friendly 嘅地方，就係一定要透過 iMovie 編輯影片，然後再以入面嘅上載功能上載影片去支援 4K 播片嘅平台（例如：YouTube），其他人先可以睇到你用 iPhone 拍嘅 4K 片，唔似得 Android 手機咁，拍完之後抄去電腦，就可以直接上載去 YouTube，人哋就已經睇到 4K 片咁簡單。如果直接將影片透過照片程式輸入去電腦，再係電腦上載，就只會得番 720p 解像度。所以如果大家真係打算拍 4K 片，記住一定要裝 iMovie 去上載。但呢種模式真係好麻煩，限制咗用家用來剪輯影片嘅工具，還望 Apple 未來可以改善吧？
▲用 iPhone 6s Plus 拍攝嘅 4K 影片，係 Mac OS X 入面用照片 APP 睇明明都仲係 3,840 x 2,160 嘅 4K 解像度。
▲但一從照片 APP 抄出來，體積就即刻細好多，而且解像度得番 1,280 x 720！所以，係唔可以用呢種方法上載 4K 影片去 YouTube。
▲而唯一方法就係透過 iPhone 入面安裝 iMovie，剪輯後直接透過入面嘅上載工具上載去 YouTube，咁人哋就睇到個效果了。
▲呢個就係用 iPhone 6s Plus 拍攝 4K 影片嘅效果，大家可以睇到畫面好細緻，而且好流暢，就算有人快速係身邊行過，都可以睇到佢哋個樣。另外色彩方面都好自然，整體感覺唔錯。
前置鏡頭升像素 + 有 Retina 閃燈補光比併
至於前置鏡頭方面，今代亦終於升級至 500 萬像素，同唔少其他品牌嘅智能手機睇齊。而今時今日好多主打自拍嘅手機，都新增前置鏡頭補光燈，而今次 iPhone 6s / 6s Plus，就偏偏反其道而行，利用熒幕作為前置補光燈，閃出 iPhone 機背嘅 True Tone 顏色光線，達到補光效果。筆者都搵來同事 Bowl 測試一下，發覺係未至於好暗，但光線都唔算充足嘅環境下，都已經有好明顯效果，唔止臉部唔會因為黃光而搞到「面黃」，整體清晰度亦提高唔少。如果大家鍾意 selfie，但又擔心係較暗環境下會影到「口黑面黑」嘅話，就真係要考慮下善用呢項新功能啦。
▲今次 iPhone 6s / 6s Plus 前置鏡頭像素都提升去到 500 萬像素。
▲從上面影片大家可以見到，如果係開前置鏡頭個時開著咗閃光燈，熒幕係按下快門制個時就會快閃兩下唔同顏色嘅光，作為補光之用。
▲大家可以睇到未用 True Tone 閃光燈之前，人臉比較暗
▲但用咗之後成個人塊面有補光，而且補得幾自然。
▲再將兩張相放大 100% 並比較臉孔，大家就更清楚睇到開啟 True Tone 閃光燈前後嘅分別啦。
Live Photo 幾好玩仲可以做 wallpaper
另外，今次 iPhone 6s / 6s Plus，仲新增一項名為 Live Photo 嘅功能。可能好多人會覺得：唓！咪即係 HTC 之前出嘅 Zoe！有咩咁特別呢？確實，兩者真係幾似，不過 iPhone 6s / 6s Plus 嘅 Live Photo 就前後鏡頭都用得到。影相個時佢會 capture 埋禁影相制前後少少時間嘅畫面，然後串連埋幾張相，變成一條 .m4v 格式嘅 3 秒影片。另外，同時 iPhone 亦會將按下快門制個時嘅畫面儲存下來當做相片，簡單來講用家就會有 .jpg 相片 x .m4v 影片各一嘅檔案。而當係 iPhone 睇相個時，只要操控 3D Touch 熒幕嘅 Peek 方法，輕按熒幕就可以睇到效果。至於分享個陣，如果平台支援 Live Photo，佢就會直頭上載張 Live Photo 相上去，朋友就可以睇得到；但如果平台唔支援 Live Photo 嘅話，就會變咗分享 .m4v 影片，令其他人一樣睇到 Live Photo 嘅效果。
▲只要係影相前，點按左方或頂部中間嘅黃色圓形按鍵，當出現「LIVE」字眼，就代表開啟咗 Live Photo 功能了。
▲如果玩 Live Photo，可以見到 iPhone 會儲存兩個檔案，一個係 .jpg 相片檔，而另一個就係 .m4v 影片檔。
▲相片檔係 full resolution 解像度，達到 4,032 x 3,024 pixels 即係 1,200 萬像素。
▲而影片方面解像度就低啲啦，只有 960 x 720 pixels。
▲至於效果方面，大家可以見到全像素相片質素仍然好好，呢個就係按下快門的一刻拍攝嘅照片。
▲大家可以見到 Live Photo 唔止會影下 3 秒左右嘅影像，仲會錄埋音，令相片變得更生動。
▲如果係手機度睇又係點？大家可以睇到如果係 LIVE 相片，當移到去個張相個一刻會郁一郁嘅，之後再用 3D Touch 嘅 Peek 操控輕按熒幕，就可以睇到 Live Photo 效果㗎啦。
不過要留意嘅係，Live Photo 如果係 .jpg 相片，就可以保留原相 1,200 萬像素，但 Live Photo 影片方面，就只有 960 x 720 解像度，可以講連高清都未算去得到。呢點大家就要留意啦。
至於 Live Photo 影來有咩用？除咗可以同朋友分享更有動感嘅相片之外，仲可以設定做 wallpaper，因為 iPhone 6s / 6s Plus 終於支援動態牆紙，大家可以將拍到嘅 Live Photo 變做 wallpaper，當要睇到郁動效果個時，利用手機嘅 3D Touch 熒幕操控輕按下去，就會見到 Live Photo 效果。咁就既可以唔洗驚太哂電，亦可以令手機睇上去背景更靚啦！
▲如果大家想將 Live Photo 設定為牆紙，首先選好相片，然後按下分享鍵，再選擇「作為背景圖片」。
▲之後就選擇 Live Photo。
▲然後移動及縮放相片，直至選好希望展示嘅畫面，然後選擇「設定」。
▲最後選擇係只用於鎖定畫面、主畫面定係兩個都用，筆者就選擇咗「設定鎖定畫面」。
▲呢個就係實際效果，大家覺得靚唔靚呢？
相關文章:
【評測】MacBook Pro M4 2024 詳細效能評測 + 選購指南分析 7 大要點 【評測】Mac mini M4 2024：進階用家最應該買的 Apple 電腦 效能、日常應用詳細評測分析 【教學】iOS 18.1 如何用 Apple Intelligence 只需 2 個設定 + 香港免 VPN 也可用
更多試相
iPhone 6s
iPhone 6s Plus
總結：升像素最實際！自拍效果更佳
整體來講，iPhone 6s / 6s Plus 嘅影相功能，最大突破肯定係後 / 前置鏡頭像素上終於肯升級，雖則像素提升同相質提升未必有同等必然嘅關係，但今時今日作為旗艦手機，後置鏡頭仲係得 800 萬，前置鏡頭仲係得 130 萬，點都講唔過去掛？所以對於一般用家來講，就算再多功能，新 iPhone 肯升像素，相信係佢哋最大換機誘因。至於女士方面，全新嘅 Retina 閃光燈，利用熒幕充當 True Tone 補光燈補光，相信都係非常吸引嘅賣點。畢竟愛美嘅女士，總唔鍾意 selfie 到口黑面黑掛？
相關文章:
【評測】MacBook Pro M4 2024 詳細效能評測 + 選購指南分析 7 大要點 【評測】Mac mini M4 2024：進階用家最應該買的 Apple 電腦 效能、日常應用詳細評測分析 【教學】iOS 18.1 如何用 Apple Intelligence 只需 2 個設定 + 香港免 VPN 也可用
分享到 :
最新影片
