Sony 今日正式係香港推出專為專業拍片用家而設的無反全片幅機款 A7S II，相比其他國家，香港算係比較快有的地區，呢一點令 Edward 覺得好驚喜。但究竟表現如何？手感如何？而家就等 Edward 同大家評一評。
機身紮實手柄揸手舒服
Sony 的 Alpha S 系機款，一向都係主打拍片，去年先推出了 A7S，今年推出第二代 A7S II，單係從外表睇就同上代好似分別唔大，因為兩部機都係採用鎂鋁合金金屬。但一拿上手 Edward 就感受到兩者的分別：A7S II 重咗好多！睇番規格，A7S 淨機重量都係 489g，但 A7S II 就重咗足足 138g，達到 627g！呢百幾 grams，自然一拿起就感受到分別。不過對於男性用家嘅筆者來講，機身重咗，配番今次新推出的 SELP28135G 恆定光圈遠攝變焦鏡頭，就無咗上代用重鏡個時頭重尾輕嘅感覺，成部機重量均勻番好多，影相拍片個時亦唔會咁易手震。另外，A7S II 的手柄係設計上同上代差唔多，拿係手度都幾舒服，整體感覺都好紮實，筆者都幾滿意。
▲新一代 A7S II 係手感上比上代重咗唔少，但如果用起重鏡，反而無咗頭重尾輕之感，機身重量平衡感覺比上代好咗。
▲手柄繼續沿用上代設計，揸手都算舒服。
拍片向主導低光發揮長處
今次 Sony 推出的 A7S II，唔止同上代一樣都係重視拍片性能，而且具備光學五軸影像防震技術，可以透過五軸偵測修正機身的搖晃情況，包括：使用遠攝鏡頭時較易發生的搖角（俯仰及偏航）；當拍攝放大倍率時最為顯得的搖移（隨著 X 及 Y 軸），及於晚間拍攝影響成像及影片情況的旋轉震動（滾動）。咁講好似好深？究竟實際效果係點？從以下影片大家應該會睇得到了。
另外，今次 A7S II 亦支援高達 ISO 409,600 超高光感度，同時間亦內置「高 ISO 雜訊消除」同埋「清除長曝雜訊」功能，令大家唔止可以係接近漆黑嘅環境下，都可以拍到清晰影片 / 相片，亦可以避免雜訊太多導致影響相片 / 影片品質。雖然大家可能話：上代都做到啦，咁有乜特別？不過今代係黑暗環境下由低光轉移至高光或較光場面時的焦點轉換，亦似乎較上代快咗唔少，令大家可以捕捉到一瞬間嘅精彩場面。從以下影片大家可以睇得到個效果。
▲最高支援感光度達到 ISO 409,600，真係幾誇張！
▲另外亦加入「消除長曝雜訊」同埋「高 ISO 雜訊消除」功能，方便用家係低光環境下拍片時，都可以影到「乾淨」的影片。
聽落就好似好勁啦，但究竟出來效果係點？Edward 就測試咗幾個高 ISO 設定下的影像顯示效果，大家可以參考一下。（不過提提大家，今次記者會既不容許記者插卡，只是透過相機直駁電視睇到 LiveView 見到的效果。加上所試的亦是非出街的 beta 機，所以同最終成像表現可能有一定落差。）
▲ISO 64000
▲ISO 64000（100% crop）
▲ISO 160000
▲ISO 160000（100% crop）
▲ISO 256000
▲ISO 256000（100% crop）
▲ISO 320000
▲ISO 320000（100% crop）
▲ISO 409600
▲ISO 409600（100% crop）
總結：ISO 256000 都仲可用
從上面簡單評測來睇，A7S II 去到 ISO 256000 都仲可以保留到一定程度嘅 detail 位，雖然暗位已經有明顯雜訊，但整體來講都仲屬於「可用」，對於要係夜間或較暗環境下拍片（現場光度其實只有 0.23 nits），真係好幫到手。但當然實際效果如何，就真係要真機到手先至幫大家試到了。而係未借到機之前，大家就睇睇官方展示低光環境下轉換 ISO 感光度的 4K 影片實際拍攝效果啦。
極多專業拍片元素加入
今次的 A7S II，既然稱之為專業拍片相機，Sony 自然加入了唔少專業拍片元素，除咗具備新伽瑪顯示輔助、強化斑馬功能、全高清 100fps 拍攝和 4 倍慢動作攝錄及全片幅格式的無像素合併全像素讀出外，仲加入了 S-Gamut3.Cine / S-Log 3 模式，呢個新模式同上代 A7S 的 S-Gamut3 / S-Log 2 模式相比，更著重低光環境下如何盡量保留最多高光位及暗位的 detail 數據，如果 layman 啲講即係類似影片的 RAW 格式，令剪片人員係進行後製工序個時，可以修改光度、對比度等之餘，亦不會失去太多高光位同暗位嘅 detail 位，令剪片成品展示上更具彈性。究竟出來效果會係點？以下就用官方影片同大家說明一下啦。
另外，A7S II 今日推出，自然亦支援 4K 影片拍攝，所採用的格式同之前推出的 A7R II 一樣，都係 XAVC S，所以提提大家，如果要拍攝 4K 影片，又或者全高清 100fps 拍攝和 4 倍慢動作攝錄影片，就記住要購買傳輸速度較快的 UHS-I SDHC 卡，而且重要買 64GB 或以上容量嘅卡種！
▲由於 A7S II 是較著重影片拍攝，所以相片像素會較 A7R II 低，但都有 1,200 萬。
▲影片方面自然支援 4K XAVC S 格式攝錄。
▲另外亦支援全高清 100fps 影片拍攝。
▲4 倍慢動作攝錄支援最高 30p 16M 設定。
▲A7S II 亦內置多個專為影片攝錄愛好者而設的設定，包括：強化斑馬功能及新伽瑪顯示輔助。
機身設計微轉•快門聲幾爽
當然，筆者覺得絕大部分用家都未必會買部相機番來專為拍片，如果真係咁不如買部攝錄機仲比較好啲添！咁 A7S II 係影相功能上又如何？當然，係連拍速度上一定比唔上同系其他 FF 機，但都算幾好，同上代一樣都有 5fps，應該都足夠一般用家使用。另外係快門聲上面，其實都幾爽，如果使用快速攝影優先模式嘅話，雖然未去到主打高速連拍相機個種「機關槍式」快門，但感覺都算唔錯。至於對焦方面，由於測試時間有限，所以筆者未有時間影到效果，但現場所見對焦速度都算快，而且都幾準，呢一點大家都唔洗太擔心。
一般連拍模式
快速攝影優先模式
▲機背仍然是維持 3 吋 LCD 熒幕，不過熒幕點數就由上代 921,000 提升至今代的 1,228,800。至於機身佈局就比上代有少許不同（頂部 Menu 鍵同 C3 鍵位置有少許斜位），但整體佈局都差唔多。今代亦多了一個 C4 快速鍵，令大家操控相機時更加就手。
▲機身左邊仍然係 HDMI 輸出、Micro USB、咪高峰同埋耳機插位，不過就由上代直排變為今代橫排設計。
▲今代仍然設有 Wi-Fi 及 NFC 無線接駁，而 SD 卡槽就由上代後開變為今代右側開。
▲機頂按鍵佈局唔算大變，不過 PASM 轉盤就中間多了粒鎖定鍵，以防不慎轉到。
▲A7S II 配備 NP-FW50 電池，據官方資料顯示充滿電後可拍攝 370 張相片，但上代的電池可以拍攝 380 張相片，變相係使用時間短咗。加上具備 4K 影片拍攝，會唔會好快就要差一次電？呢樣睇來要借到機先同大家試到了。
總結：又多部機可自製 4K 內容！
其實今時今日，好多人都話買部 4K 電視番屋企無乜用，因為根本都無乜 4K 內容好睇。但事實上，今時今日無論手機定係相機機仔，唔少旗艦機款都已經支援 4K 影片攝錄，而家連 Sony A7S II 呢部全片幅嘅無反都支援埋 4K 拍攝，如果影暗位真係好似官方講咁好，去旅行個時影埋影埋唔少片，要自製 4K 內容真係話都無咁易！而對於專業拍片嘅攝影師，想出外 hea 拍唔想拿住部大機，但又想保持番攝錄質素，A7S II 其實都係唔錯嘅選擇。當然，實際效果係咪真係咁好？真機一日未到手 Edward 都好難同大家 100% 講實係咪值得付出接近 4 皮嘢買部拍片為主嘅 FF 機番去。但初步睇來，A7S II 應該都可以滿足得到大多數嘅影片攝錄愛好者嘅！
分享到 :
最新影片
