近排有唔少朋友就話香港嘅法例已經過時，完全配合唔到科技發展帶嚟嘅方便。其實呢樣野都講咗好多年啦，好似電動滑板車咁，成廿年前已經有人諗過引入香港，不過法例就唔許可喇，到咗今時今日都仲係唔俾玩。最近呢個月 Unwire 就已經報導咗最少 3 款電動滑板車（STARY 電動滑板、VOMO 電動滑板車及 WalkCar 電動滑板），佢地全部都喺網上集資緊，一睇就知佢地嘅市場潛力啦，不過各位香港友就冇得玩，上網睇 youtube 好喇…
歐美市場非常成熟
電動滑板車喺外國或者大陸都已經流行咗好一段時間架喇，喺外國，佢地仲幫呢 D電動滑板車改咗個好有型嘅名叫 Personal Electric Transporter （PET）添，佢地嘅賣點係電動、慳位同埋夠晒靈活。呢種代步工具喺歐美國家都有唔少上班一族用緊，而且連大陸都有唔少人玩到出神入化（自己搵 youtube 睇啦）。據稱香港都曾經試過有代理商想引入電動滑板車，不過好可惜賣得唔好，最主要係因為法例並唔容許喺公眾地方玩，要玩就一定要攞正牌先得。
香港要玩限制多
話就話香港唔俾玩電動滑板車，但坊間實在太容易買到喇，隨便上淘寶亂 Click，千零蚊就可以送到府上。有時小編夜晚落街跑步都見到唔少人偷雞玩，喺公園入面「風馳電掣」玩花式，夏天玩仲可以吹吓風，諗起都覺得幾爽！不過點都好，香港法律唔俾玩小編就覺得情有可原嘅，始終香港地方太細，人多車多路又窄，行街都成日「塞人」添啦，根本就冇空間俾你踩滑板車，唔通吓吓拎埋架車去荒山野嶺玩咩？我地唔似得外國地方咁空曠，係需要一 D 方便攜帶嘅代步工具慳返時間嘅。
▲ 只要打「電動滑板車」，平嘅貴嘅即刻出晒嚟！
▲ 唔使上網慢慢搵，啱啱喺灣仔舉行嘅電腦展都有擺出黎賣
冇保險分分鐘比人告
另外就係最令人頭痛嘅問題－保險！電動滑板車喺香港出唔到牌嘅話，就連第三者保險都買唔到，萬一自己炒車或者撞到人都冇得賠，冇保險出事後果可大可小，有咩意外果陣真係可以好嚴重架，仲有可能比人告，何必呢～
法例要與時並進
其實電動滑板車好處真係好多，既可以代步，而且零排放好環保，照計要推行嘅話亦都好合理。政府係咪又應該與時並進，考慮一吓沿用咗幾廿年嘅法律係咪要修訂一吓呢？不過小編都係勸大家如果想喺路上面吹吹風，大家都係疊埋心水踩單車或者跑步啦！
＊小知識：如果想合法係公眾地方用電動滑板車要點做
根據香港法例第 374 章《道路交通條例》:
1．如果你架電動車係由「機械驅動」，無論係幾多個轆，都已經當係汽車，而身為車主的你需要將電動車送去運輸處攞牌
2．之後你就要幫架電動車購買第三者保險
3．當然仲要考返個電單車駕駛執照
4．如果咁幸運上面嘅條件符合晒，喺出車嘅時候當然要威威咁戴返個電單車頭盔啦！
分享到 :
最新影片
