前晚，我返左入數碼港參加香港創業界的新搞作【香港人撐香港品牌】，一去到俾個極度墟冚的場面嚇到！我做數碼港咁耐真係好少見有咁多人・平日・夜晚，一齊出席一個活動，足見搞手s 的號召力有幾強！本來係因為稍為認識活動搞手s，所以抱住捧場的心態入場，點知有驚喜，仲帶走左啲好野?！
【香港人撐香港品牌】主力由 7 位本地創業家搞起，當晚佢地亦都有分享自己建立事業時遇上的辛酸，佢地仲播左一條好有「銀行 Feel 」的短片，睇到我起晒雞皮，非常感嘆。但我諗好多人都同我一樣，覺得成晚入面，最正嘅就係施永青個短短 15 分鐘的分享，等我 Recap 少少俾大家睇下施永青講左啲咩啦。
一開始講創業家的條件時，施永青一語道破左平時創業家要有熱情的說法：「就係條氣唔順之嘛！」平時啲人成日講嘅熱情呀，興趣呀等等，都被施永青赤裸裸咁秒殺。
跟住講到經營之道的時候，佢分左兩個情況講，第一，如果你創辦的公司已經係 Market Leader 的時候，咁你唔使擔心，「就算係排隊去死，你都係排最後！」同時，市道唔好個陣，佢提醒大家應該追求的是「市場佔有率」，而不純粹是實際的數字增長。
第二個情況，如果你公司唔係龍頭，你就要學懂「集中兵力」，做「專業」，因為「你乜都做的話，你就乜都唔會做得好」。尤其經濟困難時，你更加要做好佢，當你成為專家，就會開始有客自己埋身。施永青以自己當年初做中原的時候做例，做唔到香港的龍頭唔緊要，我做「愉景灣」的龍頭，人地唔識個度的樓盤，我地好熟，已經贏左客的信心。
當日不少在場的老闆s 都慨嘆而家啲 90 後又難管，又麻煩，唔鬧得，薄皮…（利申：小妹係 90 後，我覺得自己比起好多人易管好多架喇 :P）施生對呢個話題又有獨特的見解。佢話自己有一套管理方法：「無掩雞籠，自出自入」意思係佢覺得大家的人生路上各自有各自的追求，佢唔會介意同事離開左公司之後，學成歸來，重投公司的懷抱。因為工作不像是拍拖，不應該以「好馬不吃回頭草」來決定去留，反而應該有一種「好草不怕回頭吃」的 Mindset。同事離開公司，出去見世面，唔等於係背叛自己，亦都唔應該要斷絕關係。如果佢出左去，叻左，學多左野，然後決定返黎，我地應該歡迎佢。
15 分鐘的分享，施生句句精警，雖然我唔係老闆，但我覺得學識從老闆的角度去睇公司的營運，都係一個方法令自己工作上進步的更快更多。Between，其實我仲想講下【香港人撐香港品牌】呢樣野，不過篇幅有限，下次再講～
延伸閱讀：
迷你倉玩串大數據
e-Banner 陳剛雄專訪
