專出電池手機殼既廠商 Mophie 又有新搞作，今次名叫 JUICE PACK H2PRO for iPhone 6/6s，顧名思義，當然係玩防水啦，不過又豈止防水咁簡單？佢仲防塵 防撞擊，係名乎其實的三防殼。Unwire 今日就率先為你試驗佢的防護性能，等你唔使拎自己既 iPhone 6 較飛！
等我教教各位點安裝呢個 Case 先 , .一放落去發覺好 fit ，而且一啲虛位都無喎。至於點解會比較厚呢？因為佢本身係舊電，擁有 2750 mAH 電量，足足係多一部 iPhone 6嘅電量！實際上，即係大概可多玩 10 小時 (以上網用途計) 。
講到佢叉電，好多人都會問，如果一插落去就叉電，咁我想用個陣咪無晒？唔使擔心，事關佢機背其實係有一個按鍵，一邊係按黎顯示電量，另一邊一按就會開始幫你叉電，咁咪唔使擔心電量無晒囉！最尾一提由於佢好防水既關係，所以要拆佢個殼都要少少技巧，要係機身右下角個個位用個銀仔扭一扭，個殼就會自然鬆開，唔使用蠻力既。
Mophie一貫作風係出有尿袋功能既保護殼，等用家可以唔使帶另一個尿袋之餘亦可以享用更高續航力。而今次呢個 JUICE PACK H2PRO，佢聲稱IP68，達到超高既防水防塵既規格，而且仲承受到1.2米高跌落嚟既撞擊，為此，小編特意準備左幾種唔同既物質，分別係粗糙既沙粒、木碎，以至非常幼細既泥、麵粉、同埋手機最驚既液體，包括豉油同水。而經過小編地獄式既測試，證實 JUICE PACK H2PRO 的確能夠抵擋幼細微粒同埋粗糙沙粒以及液體既攻擊，而且清潔都非常簡單，只需用清水就沖走晒上面既污糟野，可謂非常方便。不過首先，記得要冚實啲蓋。
選用三防機殼的人士，當然都係錫機之人。但小編都有個疑問，包到實一實會唔會用唔到，Touch ID同按唔到個Mon？但答案係，唔會！就算佢封到實晒都好，Touch ID都依然感應到，用其他Apps感覺都好順暢唔會有啜手感覺。至於手感方面，三防殼之中佢都算好輕身，唔好忘記佢仲有一舊電係後面，因此佢厚度同重量都控制得相當好，完全唔會出現太重又太大舊既情況。
建議零售價：$1,048
查詢：TOWERVISION (2553 1151)
