「真正重要的事，是眼睛看不見的」－《小王子》
唔知大家近日感唔感受到《小王子》電影的宣傳攻勢呢？我覺得真係太誇張，可能因為《小王子》本原作係我好鍾意嘅書之一，我不嬲都有關心佢啲周邊野，於是當佢一宣傳起上黎，我就中晒，完全係佢地 Target，所以感受奇深。除左有商場展覽、主題餐廳、電影周邊商品、優先場戲飛等等，仲有一樣好特別的紀念品－「個人化電影故事書」。
雖然我好關心《小王子》的動態，但老實說開頭都唔知有啲咁嘅紀念品，直至有一日，我收到一份「聖誕禮物」，一打開竟然是兩本《小王子》電影故事書，而且書中的女主角更係以我個名黎命名！我自己都送過《小王子》原作俾好幾個朋友，我以為送本中英法對照版俾人已經係好有誠意（方便大家扮偽文青，出 Quote 可以出法文 😛 係咪好貼心？），但呢本真係不得了！雖然本書個對象其實係小朋友，但 好似小王子一樣咁有童真嘅 我一樣咁鍾意。
後來朋友更同我講，原來除左今次為《小王子》度身訂造的電影故事書，亦都有其他童話內容，而每一個故事都係經過背後一個由香港人開發的人工智能系統砌出黎，包保你做到不同故事書的主角。雖然整本書一啲都唔平，但我諗小朋友收到一定會好似我咁開心。
以下冇《小王子》電影劇透，可以放心繼續睇
作為《小王子》的忠實粉絲，收到本書睇過電影大約內容之後，我點會錯過優先場呢？入場睇完套戲之後，我第一個感覺就係同《Inside Out》一樣，覺得呢套戲並唔係俾小朋友睇，而且有啲 Message 我覺得傳達得唔係咁好。《小王子》嘅原作故事係套戲入面的解讀唔多，其實有啲覺得佢係標題黨，所以就算你冇睇過本書入去係冇問題的～不過，套戲有一點同平時大家睇個啲 Let it Go 迪士尼動畫好唔同，就係佢有一種歐陸風情， 係美國人唔會拍到出來的，唔知點解我覺得好襯個電影故仔，好彩唔係迪士尼拍，哈哈！
最後，建議各位朋友，睇！法！文！版！唔係叫你扮文青，而係同場有太多 死?仔 充滿童真的小朋友，佢地 好噪 非常活潑，會 影響觀賞 不停重複講：「大人真係好奇怪～」。
電影：《小王子》
上映日期：12 月 24 日（香港勁遲上囉，人地台灣同大陸 10 月就上左喇）
