復活節唔少商場都主打小朋友活動，幾乎個個都話有機動遊戲又有充氣遊戲裝置。今日我依莉詩就介紹下荃新天地的「躍動獵蛋嘉年華」，睇下又啱唔啱你地的小朋友去放電。
今次呢個嘉年華的重點係 9米高巨型體感夾蛋機，足足有3層樓咁高，夠晒睇頭。只要用體感探測器前移動手掌控制巨臂去夾蛋。而禮物台上有好多隻超巨型七彩復活蛋，一隻有半個我咁大，就算夾到都拎唔到番屋企，好彩都有番份神秘禮品補數。不過呢個我諗未必啱小朋友玩，因為就算我有 150cm 都係同 D 蛋水平高度，根本睇唔到 D 蛋的位置，要搵個高 D 的人幫手睇下位先得。
夾到大蛋固然興奮，但小朋都都係玩番迷你版比較好。迷你版同樣用體感探測器控制，可以考考小朋友的肢體協調度。雖然唔知點解我唔係次次都夾到，不過眼見幾乎個個玩的小朋友都有收穫，我睇應該都唔太難。
▲ 獎品係一粒大藥丸，都幾得意架！
呢部鏟泥機出現過唔少次，不過都好受男孩子歡迎。小朋友可親身操縱桿控制轉向，以液壓系統作出伸縮、升降及以鐵鏟挖掘至卸下，以達到掘出所有巨蛋到籃中。因為佢從外觀到操作均依照原型挖泥機仿製，仿真度極高，所以都幾難控制，不過小朋友坐上郁下控制桿已經好開心，唔會計較掘唔攪掘到蛋啦。
小朋友最期待的都係充氣遊戲，呢度有 4個，一期中庭設有透明設計、直徑逾10米的「宇宙小巨蛋」，蛋內滿佈障礙物，而二期商場中庭，設有3個以深海、陸地及天空為主題的充氣遊戲，包括首次曝光 8米高以鯊魚造型的「深海奧秘」，以熱帶森林世界為主題的「奇幻森林世界」 同 比較細小朋友玩的「空中堡壘」，等佢地可以係入面盡情放電。
▲ 今次的充氣遊戲有「宇宙小巨蛋」、「
除此之外，仲有幾個小型攤位考小朋友眼界，例如「懸浮獵蛋」需要小朋友用弓射擊懸浮半空的復活蛋，十分有趣。
▲ 不過小型攤位都幾高，要去到水平線應該要 140以上。
其實大部份小朋友嘉年華都差唔多，不外乎充氣裝置同機動遊戲，而今次的遊戲都設計得比較高，我諗比較適合 5歲以上或者 120 cm以上 的小朋友，特別係 9米高的夾蛋機，連我都睇唔到 D 蛋的位置，有 D 悲哀。可取的是，嘉年華分佈係 2個商場，而且只有 9米高夾蛋機係室外，咁就唔怕落雨令小朋友失望，又或者小朋友玩完一樣又想玩另一樣，令父母大出血了。
必玩指數 ★★★★☆
躍動獵蛋嘉年華
日期︰2016年 3月19日 至 4月4日 (11:00am – 7:00pm)
地點︰荃新天地1期戶外花園廣場
票價︰每款$50或$10；另設$140優惠套票 (包括3款$50遊戲及 2款$10遊戲)
相關影片︰