世界變啦！依家港女的 taste 愈變愈重口味，連樣衰衰的醜比頭都有市場，仲由4月1日起繼蛋黃哥同 Little Twin Star 之後登陸 DIM SUM ICON ，成為「醜比頭小精靈 」Pop-up Cafe 添！今日我依莉詩就同 Summer 去咗中環店率先試食啦！
必食！點心、甜心夠晒醜
雖然第一眼望見醜比頭覺得好樣衰，不過愈望愈順眼，甚至想食埋佢落肚。今次「醜比頭小精靈」，包括粉屁桃、紅魔菇、赤羽佛、黑羽煞、小花頭、奶奶頭、黃金寶、綠羽仙就化身成 18款點心、7款創意甜品 同 4款特色飲料，等你盡情吞咗佢。款式之多，食完會唔會變醜就唔知，不過食完銀包肯定會受傷，為咗呃 like 呃盡 D，所以我地就揀出幾款必食之選，等你食得 happy D。
▲粉屁桃鮮奶流沙包 $49
DIM SUM ICON 一向以流沙包作賣點，之前的「蛋黃哥便便」包唔知大家試咗未，而今次的「粉屁桃嘔奶包」同樣非常吸睛。粉紅色的包貼上彩色粉屁桃面，一篤個口就有以日本 3.6牛乳、蛋白同白砂糖打成的流沙，加倍嘔心。
▲ 黃金寶炸饅頭 $39
第二樣呃 like 必點的一定是這個「便便饅頭」，單睇個樣已經夠抵死，而且以燕麥混合麵粉搓成，非常健康。不過便便下面的似乎是旺旺雪米餅，有點扣分。
▲ 醜比頭燕麥蛋黃流沙包 $49
呢籠同樣是流沙包，以燕麥同麵粉搓成圓形、心形 同 長條形，每一個都印有不同精靈，同樣可愛，如果唔想食鮮奶流沙包可以揀呢個。
▲ 醜比頭蝦餃 $59、小花頭燒賣 $59、紅魔菇黑松露野菌餃 $49、
另外， 小花頭燒賣、綠羽仙鹹水角 同 醜比頭蝦餃 3款點心都不錯，每隻蝦餃都係唔同形狀，上面的食用米紙印有粉屁桃、赤羽佛、奶奶頭，十分可愛，而燒賣上放有由紅菜頭汁混麵粉而成的小花，超級可愛，至於野菌餃外型雖然唔多特別，不過餡料有雞脾菇、蟹味菇 同 翠玉瓜，口感十足，而且水晶皮夠薄，值得一試。
▲ 粉屁桃士多啤梨奶凍 $39、紅魔菇摩卡咖啡蛋糕 $39、黑羽煞 60%純朱古力蛋糕 $49、赤羽佛芝士蛋糕 $49
講完點心，講下甜品先！可能醜比頭太過曳，部份的甜品已經偷步係 3月 17號已經同左大家見面。當中最受歡迎最可愛的粉屁桃隱身於甜蜜夢幻的士多啤梨奶凍中，粉屁桃士多啤梨奶凍分別以三層奶凍做成，最上層用上士多啤梨啫喱，中層雲呢拿子奶凍，最底層士多啤梨奶凍。
▲ 粉屁桃大福 $29、粉屁桃特飲（粉紅色）$39
如果鍾意食水果類的甜品，可以選擇大福，粉紅色的椰汁大福皮包住豆沙同大大粒士多啤梨，酸酸甜甜，而特飲包括蜜桃肉，蜜桃汁混入梳打， 口感清爽。
▲ 粉屁桃燉奶椰皇(冷/熱) $59
椰皇燉奶平時食得多，呢個除咗有可愛的粉屁桃加持外，入面的燉奶以日本的雞蛋白加入椰皇原身的椰水和3.6北海道牛乳製成，特別香滑。
▲ 奶奶頭 Cappuccino
厚厚的奶泡上灑上奶奶頭圖案，十分抵死。
必影！醜比頭列隊歡迎
之前去 DIM SUM ICON 的 Pop-up Cafe 都只有點心唔同咗，裝飾一 D 都無變，今次「醜比頭小精靈 」Pop-up Cafe 就非常有驚喜，一入到中環店就有一隻立體「醜比頭小精靈」等你同佢影相，而店內更有一幅幅醜比頭畫，氣氛很好。最正的是門口有一部自動影相機，可以拎住自己鍾意醜比頭 props 扮醜比頭影相啊！
▲ 門口有一部自動影相機，可以拎住自己鍾意醜比頭 props 扮醜比頭影相啊！
▲ 立體的奶奶頭超可愛。
▲ 仲有粉屁桃啊！
▲ 牆上有一幅幅醜比頭畫，氣氛十足。
▲ 啊！粉屁桃好肥！
必買！醜惡餐具帶回家
除咗食品，店內仲發售多款「醜比頭」周邊商品，包括：盆栽、時裝、餐具及公仔等，好醜啊！
▲ 真‧盆栽入面有一個個醜比頭守護植物生長，應該唔會被醜死掛？
▲ 仲有一隻隻公仔，等你帶番屋企。
▲ 每個裝住食品的餐具都印有醜比頭，如果睇岩可以買走啊！
依莉詩 :「愈醜愈愛！」
唉～我知大家一路睇我 D 文，心入面都有句「這麼醜的妞…」，唔緊要，今次終於有嘢醜過我。睇嚟呢樣就係「醜比頭」吸引人的地方，夠醜但夠平凡。講番餐廳，之前都介紹過，所以食物水平就唔多講，不過食物造型比之前認真咗，粉屁桃鮮奶流沙包 同 黃金寶炸饅頭 好抵死呢！另外，今次多咗影相位，感覺上更似 Pop-up cafe。而「醜比頭」精品唔多地方有得賣，粉絲就算唔食都要去掃貨啊！
DIM SUM ICON
中環店 (2807 1682)
地址：中環德己立街1-13號世紀廣場B/F
營業時間： 11:00am-11:00pm
尖沙咀店 (2885 1345)
地址：尖沙店The ONE3樓L308號店
營業時間： 11:00am-11:00pm
相關影片:
