最近港女同幾個有一段時間無見的朋友食飯，大家都叫半個同行，工作都係同科技野有關，有好多共同話題，所以都幾好傾。食食下飯，傾到咁上下，港女提議做個實驗：「我地有咁多 Common Friends，工作又咁相關，我覺得我地一定係接觸開差唔多嘅資訊，不如我地互相交換睇下大家 Facebook 個 News Feed，驗證下咯！」港女啲朋友好順攤，一句「好啊」我地就開始呢個實驗，信任度極高，滿足我呢個八卦的心態。
雖然港女叫港女，但我個 Facebook News Feed 並唔淨止有《太陽的後裔》、宋仲基 Oppa、晉久 Oppa 等資訊，仲有其他韓劇資訊，哈哈哈！交換睇 Facebook，傳染 《太陽的後裔》病毒，毒害朋友（奸笑）。
第一輪交換，港女見到朋友睇個啲野，同我睇個啲好唔同，雖然係朋友 A 的News Feed 上偶爾會見到 Common Friends，但其他 Feed，取向好唔同。首先當然無《太陽的後裔》，因為朋友 A 係男仔，唔會明白我地呢啲少女心 sosad。另外，同港女好唔同嘅係，佢成個 Feed 都係朋友的 Post，證明佢啲朋友喺 Facebook 非常活躍，而佢地亦都會有互動，例如 Like 及留言等。
港女個 News Feed 大多數都係專頁發出的 Post，其中一個原因係港女啲朋友好唔熱衷玩 Facebook，正常的，識玩一定係玩 IG（笑）；又或者唔玩，因為佢地同港女一樣咁低調（好似係），有朋友同我講過，覺得玩 Facebook 好空虛，呃 Like 又冇用，唔想為左自我感覺良好而浪費時間落去－理性到一個點。
第二輪交換，朋友 B 個 News Feed 內容同我好相似，睇黎大家都係食開花生，有好多行業資訊、新聞、連消閒娛樂類都好似，最唔同就係我啲《太陽的後裔》同 Oppa 變左做足球，無錯佢係一個球迷！
玩左兩輪，我諗明左一樣野，就係點解我地同某啲人特別容易「打開話匣子」，有啲就完全唔啱 Channel。除左同 Background 有關，亦都同你接收開的資訊有關。就好似你同阿爸阿媽有代溝的原理一樣，大家關心嘅野都唔同，接收的資訊南轅北轍，咁好難開個頭傾計架嘛。
呢個實驗真係幾好玩，碌多兩碌仲可能發現新鮮野，港女建議大家試下同朋友玩下，最好同啲傾唔埋的朋友玩，睇下人地關心緊啲乜，話唔定咁樣會發掘到共同話題呢～
