歐洲各國聯賽已經結束，只剩下歐聯、歐霸兩場決賽，去到而家相信大家都更期待六月在法國舉行的歐洲國家盃吧？LeEco 早前就暗示了擁有歐洲國家盃的播映權，今日就正式宣佈月費，在記者會他們更宣佈唔洗錢已經可以睇到！點解咁筍？就等 Edward 同大家講講！
唔洗錢？只益舊客！
今次 LeEco 拿到播放歐洲國家盃播映權，其實並非獨家，但最少可以睇足 51 場，都算唔錯。此外，究竟係咪真係唔洗錢有得睇？好簡單：如果大家之前已經購買了一年或以上的「超級體育組合」，今次就唔洗加錢可以有得睇，都幾唔錯！但如果之前係買樂視盒子而獲贈的體育組合（一般來說是 6 個月），就要另費才能睇到了。
▲實際新客或者之前沒有購買了一年或以上「超級體育組合」的 wire 民，就要俾 $249 先可以睇足 51 場樂視 EURO 2016 比賽。
▲如果付出 $599 就可以加送樂視 4K 盒子連同睇足 51 場歐國盃賽事。
新客一樣唔洗錢？真係有計！
正如前文所講，對於街客或者之前未有購買一年或以上「超級體育組合」的 wire 民，最少都要付出 $249 先可以睇到今年的歐國盃直播賽事。但要「免費」睇係咪都無計？又唔係！LeEco 方面表示，只要在 7 月 31 日或之前購買一年或以上的「超級體育組合」，之前俾了的 $249（純睇歐國盃賽事）/ $599（歐國盃賽事 + 樂視 4K 盒子）就可以「回水」，變相唔洗錢。但當然，咁就要縛住一年，係咪抵玩？見仁見智了。但最少可以睇完歐國盃，睇完覺得畫質同評述都滿意，先至再科水，都算抵吧？
