下星期就到端午節，又係食糭的好時機。唔知大家會選擇係屋企自己包定出去買呢？今日就等我依莉詩教大家包鹹肉糉，雖然都未係好熟手，不過都可以分享少少秘訣俾大家。
材料：
荷業
草
糯米
綠豆
鹹蛋
瘦肉
瑤柱
▲ 糭的材料其他好隨心，想放咩入去都得，不過事前功夫都幾多。例如要事先浸軟荷葉，並要兩塊併埋一齊剪頭剪尾，再將剪下來的頭尾部份剪成長方形，而糯米、綠豆、瑤柱要預先浸 1-2小時，瘦肉要用五香粉奄最少 1-2小時，至於鹹蛋亦要隔走蛋白備用。
▲ 開始包的時候，要先揀兩塊差唔多大細的葉，交叉疊埋，並打橫拮一枝大頭針
▲ 之後扭轉，摺成三角形，再打橫拮另一枝大頭針固定，而荷葉滑需要向內。
▲ 整好糉的初型，就可以按次序放材料，分別是糯米、綠豆、鹹蛋、瘦肉、瑤柱、綠豆、糯米。
▲ 之後就用長方形的荷葉壓平，同時夾實兩則，唔可以有米漏出嚟。
▲ 最後用草紮實兩邊就完成。
▲ 最後將成品放落大煲，加水加同糭一樣高度，烚 2-3小時。
▲ 我個人就鐘意加糖食，唔知大家會加糖定加豉油呢？
端午節 5 款特色靚糭推介
整完傳統風味的鹹肉糭，介紹下今年有咩特色糭啦！
1) 矜貴之選 — 至尊鮑魚瑤柱裹蒸糭
節日送禮當然要矜貴有體面，呢隻裹蒸糉入面包含原隻六頭鮑魚、原粒瑤柱、原隻日本花菇及脆皮燒鴨，還有少不了的油潤鹹蛋黃、五花腩肉及綠豆，每一口糉都充滿材料的精華。
售賣點：逸東酒店逸東軒
售價：$168
2) 潮食之選 — 紅腰豆和牛糭
鹹肉糭多數都係用肥豬肉，轉用鹿兒島A5和牛肉又試過未？紅腰豆和牛糭採用了鹿兒島A5和牛肉、紅腰豆、糯米、邊豆、鹹蛋黃、沙薑粉 ，和牛的精華與油香滲透到每一顆糯米中，香氣四溢，食落滋味難忘。
售賣點：香港會議展覽中心紫荊廳
售價：$108
3) 肉汁之選 — 砣砣東坡肉糭
雖然糭係好肥，不過一年食一次唔怕吧！呢隻砣砣東坡肉糭選用四両五花腩肉，加入花雕酒及八角等調料紅燒，入口即溶，肥而不膩，而糯米則吸收了紅燒肉的香氣及肉汁，軟糯又入味。
售賣點：翠亨邨
售價：$98
4) 健康之選 — 藜麥肉鬆糭
唔想咁肥都可以揀健康的藜麥肉鬆糭。紅藜麥外層纖維較多，口感像芝麻但帶煙韌，配以蝦米、紅蔥頭、栗子同肉鬆，使本身味淡的藜麥能充分吸收不同配料的精華。
售賣點：奇華餅家
售價：$62
5) 甜食之選 — 沖繩黑糖紫薯蓉紫米糭
除咗鹹食，甜的糭都有支持者，香甜軟糯的紫米加入紫薯同沖繩黑糖，食落香甜味美又具嚼勁。
售賣點：帝苑酒店
售價：$118
分享到 :
最新影片
