穿戴式裝置愈出愈多，但要揀一隻可以時時刻刻戴住，又要襯到衫的就唔係隻隻得。主打女性市場的智能配飾品牌 Misfit 今日正式推出全新設計的 Misfit Ray，我依莉詩今日就到咗發佈會率先試戴啦！長長的外型似足銀雞，唔知啱唔啱各位姊妹心水呢？
設計簡約似銀雞
Misfit Ray 同第一款的智能配飾一樣係可拆卸式設計，可以配搭項鍊或手帶使用。其簡約設計以航空級別鋁質物料，修長的圓柱形似足銀雞，而玫瑰金色或碳黑色都相當好襯衫。無論做運動定出席宴會都可以輕易襯出優雅或活力的感覺。尤其說是科技產品，我覺得更似一隻飾物。
▲ 修長的圓柱形似足銀雞，而玫瑰金色或碳黑色都相當好襯衫。
▲ Ray 帶上手都幾輕，同平時手扼差唔多，不過因為長度都有 38mm，戴係好似我呢 D 手比較幼的女仔度就會有少少長。
▲ Logo 放係 背面，咁就唔會太突兀。
▲配合頸鏈就可以當鏈咀用，銀色睇落就更似銀雞。
▲ 雖然呢幾隻色未推出，不過發佈會中都有展示出嚟，不過我都係覺得玫瑰金色比較易襯。
新增自動睡眠監察
既然係智能穿戴式裝置，Ray 當然唔止得個樣，同上一代一樣，可以追蹤步數、運動同睡眠狀況，更可以透過震動提示及可變色LED燈，提供久坐、短訊與來電提醒及無聲鬧鐘等功能。而今次的睡眠監察更更新成自動監察，唔駛再每晚瞓之前自己調，方便唔少。雖然相比係其他智能手鏈，Ray 的功能唔算太突出，不過好在唔駛充電，內置可替換式的電池壽命長達6個月。當然啦，亦代表咗無電時要諗辦法換電了。
▲ Ray 同其他穿戴式裝置一樣，可以偵察步數同消耗咗幾多卡路里。
▲ 而且可以自動偵測睡眠狀態，唔駛日日臨瞓前都要記住襟掣。
同場推出 Misfit Shine 2
發佈會同時推出了 Shine 2，不過設計同上一代幾乎一樣，引入了電容感測技術及將 LED燈改成 12色顯示，係日光下可以睇得更清晰。
▲ Misfit Shine 2 同樣備有玫瑰金和碳黑兩種顏色以供選擇。
▲ Shine 2 除了 LED 燈改成 12色顯示，外型上同上一代幾乎一樣，所以對已經買咗的 wire民嚟講吸引力不大。
依莉詩：「做手帶、頸鏈一樣靚」
對於女仔嚟講穿戴式裝置最緊要襯到衫，而今次的 Misfit Ray 設計簡單，長長的外型似足銀雞，當手帶、頸鏈都得，比起上一代更易襯，所以都係一個唔錯的選擇。至於 Shine 2 除了 LED 燈改成 12色顯示，外型上同上一代幾乎一樣，所以對已經買咗的 wire民嚟講吸引力不大。
Misfit Ray
玫瑰金色/碳黑色 + 運動手帶 $899
玫瑰金色/碳黑色 + 皮革手帶 $1049
Misfit Shine 2
玫瑰金色/碳黑色 $899
查詢：3188 1319 / 2849 8915
分享到 :
最新影片
