港女喺啱啱呢個周末去咗深圳採訪，適逢深圳舉行「2016 年全國大眾創業萬眾創新活動周」（個名真係好長，以下簡稱「雙創周」），好奇嘅港女當然順便去觀摩吓呢場大型活動啦！
喺分享港女嘅見聞之前，同大家解釋一下「雙創周」嘅由來。「雙創」其實係「大眾創業 萬眾創新」嘅簡稱，呢八個字最初係由中國總理李克強喺 2014 年出席一個論壇嘅時候提出，故名思義就係鼓勵大眾發展新技術及產品，進而推動經濟發展。
自此之後，李克強就頻頻喺唔同嘅公開場合多番提及呢樣嘢喇，仲放埋入去 2015 年嘅中國政府工作報告入面，可以睇得出佢十分重視呢個想法。而今次以深圳為主場嘅「雙創周」，李克強都有出席參觀，非常重視。
港女去參觀嗰日係星期日，帶路嘅朋友話，平時條路人都唔多個，車都唔多架，但偏偏嗰日就水泄不通，又封路又人潮管制，十分誇張。
▲ 人潮管制之下，港女要由街頭行到街尾先過到對面馬路，這麼近那麼遠呀！
入場係唔使錢嘅，但要用身份證登記，香港人就畀張回鄉證保安睇睇就入得。因為嗰日我地做完嘢成三點先入去，所以條龍唔係好長，好快就入到場。但港女我真係太天真，因為入到場並不代表埋到去啲攤位度睇。一入到去只係見到到處都人頭湧湧，唔係打卡就棟晒喺度自拍，人勁多都照影無誤，而港女不知道有乜好影。
▲ 每個機械人都有圍欄欄住，同貼咗紙叫人「文明啲，唔好掂」，但大家都係照樣無視。
但 Fair 啲，入面啲展商真係有嘢畀你睇嘅，有唔同主題區域、創客工作坊、大量 Seminar 等，其實模式同一般香港搞的展會差唔多，只係規模大咗好多咁解。
其中有啲主打嘅 section－如機械人、航拍機、AR/VR 等，都有實物 demo，好多人都有興趣去試去睇㗎，只不過因為真係人太太太多，港女又唔夠霸氣，逼唔到埋去睇同試玩之嘛。
▲ 有冇覺得佢好熟口面呢～～？
▲ 部分展品唔單止欄住，仲有保安人員看守，可能係怕參觀者太粗暴啩？
講真當日都真係幾氣餒，難得去深圳一趟又遇到有大型創科活動，但港女竟然敗走收場，覺得自己晒咗啲時間。事後睇返啲報道，話有成 50 萬人入場，咩大部分係硬件工程師、工業設計愛好者喎，er… 港女真係要講返一句「I don’t think so」。其實中國硬件上嘅實力真係不容忽視，但人文質素呢一項軟件上真係追唔上，好地地一場高新科技展會，最後係逼入場，逼離場，中間度度都不准停留，點睇？
唔知係咪同星期日有關啦，港女淨係見到好多小朋友跑來跑去，我真心懷疑入去究竟有幾多人真係睇到同體驗到新科技。下次如果再有呢啲活動，港女一定要揀平日去睇，同啲人交流下，希望成個觀感會唔同晒。
