話咁快又就嚟到聖誕！各大商場嘅裝飾又開始出爐啦！我依莉詩今年會繼續走訪港九新界搵定影相位，等大家打卡都打得快啲，高質啲嘛！真係估你唔到，今年第一炮竟然係一向懶懶閒嘅蛋黃哥 GUDETAMA，而且佢仲戴晒聖誕帽準備同大家開甜品派對！
▲ 未到聖誕，懶洋洋嘅蛋黃哥今日已經出嚟同大家合照。
蛋黃哥影相位逐個數
同唔到蛋黃哥真身影相唔緊要，蛋黃哥已經化身成不同聖誕造型嘅立體裝置，喺皇室堡同東角俾大家慢慢影。無論皇室堡中庭嘅巨型金黃奶黃噴泉、薑餅屋 定 聖誕禮物車都隱藏蛋黃哥嘅蹤影。而東角亦有趣緻梳乎蛋鹿車同兩隻破蛋而出嘅聖誕版 GUDETAMA 係半空中大賣萌樣，可愛指數爆燈！
▲ 蛋黃哥走入禮物盒唔知等緊邊個呢？
▲ 蛋黃哥浸係奶黃噴泉入面好梳乎咁啊！
▲ Cupcake 上嘅忌廉裝飾成聖誕樹，好有聖誕氣氛呢！
▲ 聖誕當然要有禮物，蛋黃人就推住禮物車準備出發啦！
▲ 三層架上嘅甜品都有蛋黃哥嘅萌樣。
▲ 除咗皇室堡，東角門前都有兩隻破蛋而出嘅聖誕版 GUDETAMA 係半空中大賣萌樣架！
▲ 另一邊仲有梳乎蛋鹿車，準備將新鮮出爐香甜美食及聖誕禮物運送至皇室堡梳乎盛宴。
獨家精品有聖誕 feel
除咗影相位，各位蛋粉千萬不要錯過今次嘅商場換領精品，當中嘅地毯、兩用式咕臣頸枕 同 茶壺套裝都係聖誕版蛋黃哥，靚得嚟又實用，仲好有聖誕 feel ，做聖誕禮物定自用都好吸引！另外，仲有兩個互動小遊戲，玩完仲有機會免費得到 GUDETAMA 聖誕造型杯墊 同 GUDETAMA 聖誕版電子心意咭 及 GUDETAMA 精美文件夾添！
▲ 只要係場內消費滿 $800 、$1200 及 $1500 就可以免費換領「GUDETAMA限量版地毯」、「GUDETAMA兩用式咕臣頸枕」或「GUDETAMA聖誕精美茶壺套裝」。
▲ Pop-up Store 外設有「梳乎聖誕拋拋樂園」擲球遊戲，擲中就有機會得到 GUDETAMA 聖誕造型杯墊。不過球嘅黐力有限，都唔係咁易中架！
▲ 另外，只要係於皇室堡、銅鑼灣地帶及東角 LAFORET指定位置集齊 6個 GUDETAMA 造型 QR Code，更可以免費獲得 GUDETAMA聖誕版電子心意咭 及 GUDETAMA 文件夾添！
薑餅期間限定屋
嫌商場精品唔夠，蛋粉們仲可以去薑餅屋購買日本官方 GUDETAMA 精品，部份精品更係首次於香港率先發售，平時嘅 Sanrio 無咁齊架！
▲ 薑餅屋入面其實係限定店，齊集大量蛋黃哥精品。
▲ 呢個迷你垃圾桶係會場限定，第二個地方無得賣。
▲ 呢塊魔鏡唔單止有蛋黃哥萌樣，仲會發聲讚你 Kawaii 添！
▲ 呢兩個咕臣冬天用就最啱，左面嘅可以打開變座墊，右面嘅拆開仲係被嚟添！
▲ 玉子壽司拆開後係被呢！
▲ 新出嘅精品仲有蛋黃的新衣系列，蛋黃哥個樣超級搞笑！
▲ 修女系列都好得意架！
依莉詩點評
以小編目前收到嘅消息，今年聖誕好多商場都唔再以卡通人物做主題，甚至縮減了規範，所以大家都可能會失望。而今次皇室堡用蛋黃哥做佈置，雖然影相位唔多，而且光線不足，白平衡好易錯，但銅鑼灣夠方便，都算係值得打卡嘅商場之一。雖然 Pop-up Store 大部份精品 Sanrio 都有得賣，不過今次商場獨家換領精品靚得嚟又實用，仲好有聖誕 feel ，做聖誕禮物定自用都好吸引，蛋粉們絕對唔可以錯過！
聖誕氣氛 ★★★★☆
必影指數 ★★★☆☆
必買指數 ★★☆☆☆
GUDETAMA Merry Egg’s mas梳乎滋味
日期：2016 年 11 月 6 日 至 2017年 1 月 2日
地點：皇室堡、東角
相關影片:
分享到 :
最新影片
