往年，HTC 一年都推出最少六、七部機款，但今年卻一反常態，自年初推出 HTC 10 後，都一直無新機發佈，令人不禁懷疑他們是否打算退出手機市場。不過今日 HTC 終於再在香港推出新機款，主打中階市場的 Desire 10 Pro。究竟用落如何呢？而家就等 Edward 同大家試試啦。
手感唔錯！黑金配更勝白金
今次推出的 HTC Desire 10 Pro，以規格而言確實是主攻中階市場，不過整體設計卻毫不失禮，雖然它未至於好像 HTC 10 般採用全金屬機身，而只是採用塑膠機背，但整體設計上卻算不錯，機背採用了霧面設計，雖然會比較易黏塵，但摸上去都幾舒服。今次 Desire 10 Pro 有兩隻色選擇，分別為黑色及白色，配以金色的機邊及天線位，筆者就覺得黑金配比白金配更加吸引，最少睇起來比較型，不過有塵黏在機背就比較易看到，如果大家不介意這一點的話，黑金配肯定是首選。
至於單手操控方面，它的機背邊位有少少微弧設計，加上圓拱形的機邊，所以雖然配備了 5.5 吋熒幕，但單手操控都算勉強做到。不過要留意的是，雖然它的邊框不算幼，但如果握得太緊，邊位都會出現誤觸情況，建議大家拿機時機身與虎口位保留少許距離，那就比較穩陣了。
▲設有黑色及白色機身選擇，不過 Edward 就覺得黑色機款較有型及漂亮。
▲採用了塑膠物料作外殼。
▲機邊就採用了金屬質感邊框（即是不是金屬……）。
▲機背採用了霧面設計，係就係無咁跣手，但就易黏塵或污糟物。
▲機背頂部及底部均設有天線位，而且與機邊框位一樣採用金色設計，配合黑色機身都幾型。
▲單手操控上，雖然邊框不算幼，但由於機背邊位採用微弧形設計，所以即使有 5.5 吋大熒幕，都算勉強做到。
▲不過如果握得太緊，熒幕邊位仍會出現誤觸情況。
▲耳機插孔設於機底，而 Micro USB 插槽及其中一邊 BoomSound 喇叭就設於機底。
▲音量及開關鍵就設於機身右側，可見 Desire 10 Pro 的開關鍵仍然用上 HTC 慣用的有紋理按鍵，亦同樣用上金色設計，都幾靚。
▲值得留意的是，HTC Desire 10 Pro 是不支援速差功能的，所以跟機火牛都只支援 5V2A 電壓輸出。
熒幕質素不錯！細字都清晰
至於熒幕方面，Desire 10 Pro 採用了 5.5 吋 1080p 規格，雖然官方未有提及它的材質是什麼，但筆者估計應該也是屬於 IPS LCD，用來睇網頁顏色算偏自然向，而且細緻度都算高，即使睇電腦版網頁，不用放大都可以睇到細字。至於色溫方面，算是比較準確，未見有嚴重偏色，無論睇文字或者睇影片，應該都幾舒服。
▲採用了 5.5 吋 1080p 解像度熒幕，估計材質應是 IPS LCD。
▲清晰度都頗高，無論睇電腦版或者流動版網頁，不用放大都睇到細字。
▲可視角度都頗高。
▲Desire 10 Pro 的熒幕是偏自然向的色溫，當然如果大家想更白的話，不妨使用顯示內的色溫設定，將色溫調至冷調一點，但筆者就覺得這樣雙眼會睇得較吃力。
鏡頭素算算不錯！1,300 萬像素 selfie 啱哂
至於鏡頭方面，今次 HTC 在 Desire 10 Pro 上用上了 2,000 萬像素主鏡頭及 1,300 萬像素前置鏡頭，至於鏡頭模組方面，就採用了 Toshiba 的產品。可能大家第一時間會想起：會否像當年 One M9 般「災難級」？實際上筆者試過，看來今次在 Desire 10 Pro 用上的 Toshiba 鏡頭模組，應是改良過的設計，雖然影夜景時雜訊仍然十分嚴重，但如果亮度未至於太低的話，整體來說成像質素都算唔錯，最少與機價及定位是成正比的。當然，大家亦不要要求相片影了出來有沖哂質素，但如果不用放大，只是作網絡分享用途，整體來說都是不錯的。至於前置鏡頭方面，它設有 1,300 萬像素，還有美顏模式，對於喜歡 selfie 的 wire 民來說，不但像素夠，出來的效果應該都幾滿意。
另外，HTC Desire 10 Pro 亦用上了全新的相機介面，整體都算易用，即使新手亦可輕鬆在 5 分鐘內上手。它亦支援專業影相模式，影 RAW 相都可以，對於想玩後製相片的 wire 民，同樣合用。
▲鏡頭設於機背左上角，而且與天線位一樣，也有金色圈圈著。
▲介面全新設計，都算幾易用。
▲像素方面，主鏡頭拍照最高可影到 2,000 萬像素相片，拍片最高就支援 1080p。
▲它亦內建 Pro 影像模式，不但可以微調各項攝影設置，包括：模式、白平衡、EV、感光度、快門等之外，亦可以設定影 RAW 格式相片。
▲相質方面又如何呢？先講日間室外吧，可見影出來的效果，不放大睇來講都算幾好，但如果放大相片 100% 來「聞相」，就可以見到細緻度只屬一般。
▲之前 One M9 都用過 Toshiba 的感光元件，效果極度強差人意；今次在 Desire 10 Pro 上，HTC 再度用上此廠的感光元件，可見是進步了，但夜景上雜訊仍然頗明顯。
▲用主鏡頭影人像又如何呢？筆者見到細緻度都算不錯，髮絲都算睇到，但暗位都像黑色「一撻撻」般，攝力只屬中等水平。
▲近攝又如何呢？筆者在記者會中拍攝芝麻雞翼，在夠光的環境下，雞翼上的芝麻都算清晰可見，雞皮上的紋理都睇得清楚。
▲如果用來影色彩較鮮豔的食物，可見相機的分析力都還算可以，顏色都算與現實的蕃茄仔十分相似，未至於變了其他顏色。
▲再試影近物，可見如果顏色並非十分 sharp 的話，出來的效果並不是那麼好，但以中階手機的相機質素來說，還算可接受。
▲Desire 10 Pro 的另一鏡頭：前置鏡頭，表現又如何呢？
▲最高支援拍攝 1,300 萬像素 selfie 相片，另外亦設有美膚功能，但就只可開關，而沒有級數可供大家選擇。
▲由於有人臉辨識功能，所以 selfie 人臉都幾清晰，而且即使加入了美膚效果，但出來都算自然，未至於太造作太假。
效能中規中矩！唔窒已不錯
至於效能方面，HTC Desire 10 Pro 採用了 MTK Helio P10 八核心處理器，屬於中階級數的處理器，在效能上自然沒有 X 系列的款式那麼高，但如果大家只是用來上網、玩 Facebook、打打對圖像處理要求不是太高的遊戲、又或者睇最高 1080p 解像度的影片，基本上都足夠日常使用。它亦內建了 4GB RAM，多工作業上的表現亦算滿意。此外，它亦支援以 microSD 記憶卡作擴充儲存，但要留意的是，如果大家用了雙卡雙待功能，就不能放下記憶卡了，幸好內建都有 64GB 儲存空間，一般人來講都算夠用。
此外，它亦是首部 Desire 機款內建了指紋辨識功能，筆者試過解鎖速度都幾快，而且雖然設在機背，但指紋辨識器微微凹了進去，所以即使不用望著機背，都可以輕鬆解鎖。不過要留意的是，Desire 10 Pro 未有內建 NFC 功能，即是話如果大家採用的是 NFC SIM 卡，又或者想用 Android Pay 付費，在這部新機上就用不到了。
▲採用了 MTK MT6755V/W 八核心處理器，亦即是 Helio P10。至於記憶體方面，就內建了 4GB RAM。
▲圖像處理晶片方面，採用了 Mali-T860。
▲要留意的是 Desire 10 Pro 是不支援 NFC 的。
▲以安兔兔評測測試 HTC Desire 10 Pro，只獲得 54,306 分，只屬一般般。
▲介面方面，仍是睇慣睇熟的 HTC Sense 介面。
▲配擔的作業系統為 Android 6.0。
▲支援雙卡雙待功能，而且是 4G + 3G，而非有些廠商機款的 4G + 2G，都幾體貼。
▲不過卡槽方面，其中一個就只能選擇放入 SIM 卡或 microSD 記憶卡的其中一項，即是不能雙卡雙待及插記憶卡兩項功能同時使用，有點失望。
▲Desire 10 Pro 是首部內建指紋辨識器的 Desire 系列機款，但其實現時不少中階甚至入門手機都已有此功能，筆者也不覺得出奇。
總結：售價合理！整體表現可接受
總括而言，HTC Desire 10 Pro 作為主打中階市場的機款，相信大家都未有要求它的表現與旗艦的 HTC 10 那麼好，但作為一部 3 千頭的手機，它的表現算是可接受了，甚至如果大家要求不高的話，它都應能滿足大家絕大部分的需要。加上以此規格及表現，售價只是 3 千頭，算是合理，如果大家不急著入手的話，隨時過一陣子跌破 3 字頭，屆時才入手可能會更吸引！
售價：$3,298
查詢：HTC（3077 5588）
分享到 :
最新影片
