MOSHOW 推出的暴君終於由最初設想為精英級合金骨架拼裝模型，升級成為今次嘅卓越級成品，實物到手，究竟有乜新意思？今次就同大家開箱看看。
首先講規格，呢款 MOSHOW 推出的暴君保持卓越級一貫水準，身高約20厘米，比第一彈甲斐之虎略高少少。三款單體重量都係480克左右，雖然同小虎比重咗100克有多，但彼此之間差別唔大。機體主要關節位，例如肩膀、手肘、胯部、大髀根、膝蓋同腳踝，依然有一定比例嘅金屬結構，加上暴君外甲設計偏向厚實無咁多突出裝甲，拎上手感覺好穩陣，手感唔錯。三款暴君分別定位為遠程攻防嘅標準型、肉搏刺殺嘅近戰型，同埋近戰破甲嘅破陣型，有啲似自護軍黑色三連星。
單機未配上任何武器，已有502g的重量，用料十足
三機的分別
單論機身外甲，三款型號主要分別在於肩甲、裙甲同腿甲設計。例如標準型肩甲略為稜角分明，邊緣仲有條橫樑框架；近戰型就似龜殼咁隆起，加強防護；破陣型則喺隆起裝甲上加咗散熱口。
標準型
有大火箭炮，分色簡單，握柄可動；光束突擊步槍三機標配，藍色彈倉強調，中距射擊，可收納身後；近距用巨型塔盾內藏手槍，塔盾厚實可彎曲。
近戰型
除光束步槍，配巨型格斗爪，前端爪尖可動，內藏能量罐或液壓系統（腦補），貼合度同自由度稍弱；熱能短刀橙色刀刃簡單，可收後裙甲，底端仲有手雷可拆。
破陣型
有突擊盾加破甲錐，重型震擊棍前端轉動順滑（爆破筒設定），同熱能戰斧，斧面橙色加藍色能源機構。武器設計偏簡單，少特殊機構。
軍事風格外觀
暴君整體造型偏厚重裝甲軍事風格，作為量產機，漆面用咗半光塗裝，外甲有分色強調結構，散熱口同噴口用咗金屬色點綴，胸口外框分層處理幾靚。不過銀色出氣口有啲漆面不均；外露管線同動力管就用紅藍色跳tone，唔會太單調，但腰部高飽和金屬藍同主體一比略為搶眼，小隊機必備嘅警示標誌、隊徽同機體編號都有，細節表現相當唔錯。三部機機身部位基本通用，作為量產機配色一致，外甲外觀大同小異。如果可以喺某些部位加啲特別配色，單體辨識度會更加高，亦可減少雜兵的感覺。
頭部配咗磁控燈組，需玩家自備兩粒AG1電池，裝好後用模型地台磁吸牌開關，眼部條形傳感器會亮起，有常亮同呼吸兩種模式，亮度適中。眼部紅色件有金屬漆，就算唔開燈，某啲角度都有反光效果。頭側單天線略鬆，咁幼長嘅天線要小心處理。
可動方面，雖然外甲覆蓋多，體型壯碩，但可動表現唔差。頸部用雙段結構，抬頭低頭無問題，左右轉同側擺都得。胸口飽滿，兩側出氣口搶眼，腰部中段分段可彎腰，幅度算可接受，胸口同下端無太大干涉。背部內部分段簡單，固定液壓桿同武將機嘅龍蝦背差別明顯。
手臂外拉範圍大，側面關節略單薄，按需要拉出長度就好，支援大幅前伸同平抬，肩甲獨立關節加持，手肘三段式曲肘達150度，小臂護甲有聯動位移。手型除咗握拳，仲有開掌、握槍、握刀、握斧等多款選擇。三款暴君手型配置一致。裙甲方面，前裙甲大尺寸，根部關節支援側擺同平抬，內襯有簡單刻畫；側裙甲有裝備接口可收納武器，支援平抬同旋轉；後裙甲獨立可動，內襯單層加細節，厚實可靠。
大髀根部L型關節配合裙甲讓位，前踢後踢都過90度，側踢關節稍緊，要加點力才拉得出來。屈膝150度，膝蓋背面噴口有收納動作，正面關節面板有少少聯動，大髀下端液壓桿隨腳掌上下擺動有抽拉油壓效果，腳踝裝甲獨立可動，腳掌分段支援多向擺動，底部有磁鐵配合金屬地台站得更穩。
今次支架用可自由屈曲的設計，取代傳統鐵棍，調角度更方便。背部平直，少咗弧度變化，背包接口有蓋遮擋，裝上背包後同胸口呼應，輪廓完整。背包三個大噴口搶眼，橙色半透明內芯無燈組，配咗噴溅特效件，但唔適用小腿噴口。
Action Pose
總結：性價比超高
整體而言，暴君作為量產機，造型務實厚重，重軍事風格，無浮誇元素，可動性及手感甚有驚喜。三款分別在裝甲細節及武器不同，三套裝版價錢為$960相當抵玩，即除開即每隻為HK$320，以這種質素及體積的合金Figure來說性價比相當高，更加可體驗到小隊玩法，喜愛這類軍事風格的玩家不妨入手，一定不會令你失望。
分享到 :
最新影片
