仲有兩星期就復活節，應該唔少媽媽都煩惱緊整咩派比小朋友 D 幼稚園同學仔。今日我依莉詩就去咗港燈家政中心向導師 Kinson 學整復活節捧捧馬卡龍，唔洗用火，小朋友一齊整都得架！
Stage 1 ：準備材料
之前我都同大家分享過點整馬卡龍，不過上次揀咗用蟹粉做餡，如果一班廿幾個同學仔，每人送兩粒成本都幾高，所以今次就選擇咗用朱古力軟心做餡，加埋蛋白糖霜做裝飾就夠晒可愛，小朋友一定鍾意。
馬卡龍材料：
杏仁粉 ………………………….27g
糖霜 ………………….………….27g
砂糖 ……………………………..36g
蛋白 ……………………………..22g
色素……………………………..少許
朱古力軟心材料：
朱古力 …………………………30g
淡忌廉 …………………………30g
蛋白糖霜材料：
蛋白 …………………………….33g
糖霜 …………………………….250g
色素……………………………..少許
Stage 2 ：攪拌材料
雖然馬卡龍一粒係出面買都幾貴，不過材料其實好平，只係整的時候要有 D 技巧，如果學識點整，絕對係經濟又得睇的禮物。
▲ 其實做法同上次差唔多，首先用電動攪拌器高速打起蛋白，打到倒轉都唔跌落嚟，就可以加砂糖。當蛋白糖霜變得幼滑就可以加色素並攪勻，然後加入糖霜同杏仁粉，用好似整海綿蛋糕嘅方法，將刮刀以貼著碗底，摺疊方式攪拌，直至全部材料混合沒有粉粒。 (呢個方法同上次將打好嘅蛋白加入粉有少少唔同，大概係唔想洗多食碗吧！)
Stage 3 ：唧出形狀
去到呢個步驟就係考小朋友的創意。將粉漿倒入唧袋，唧口垂直向著焗盤，慢慢唧出想要的形狀，可以係兔仔、雞仔或者復活蛋。不過記得每次要唧兩個差唔多的形狀。因為今次的粉漿比較稀，所以唧好唔洗點拍焗盤，只要放置 10分鐘，馬卡龍自然會變平面，等到手指掂佢唔黐手就可以入爐。
▲放置 10分鐘後，表面會開始變啞色，等到手指掂佢唔黐手就可以入爐。
Stage 4：入爐
上次講過馬卡龍焗唔焗到蕾絲邊，除咗睇粉糊整得好唔好，風乾夠唔夠之外，焗爐對熱度均唔均勻都好重要。不過未必個個屋企都有個咁好的焗爐，所以今次就教大家一個比較常用的焗法。
▲ 首先以 160度焗 7分鐘到有蕾絲邊。
▲ 然後再轉到 100度焗 8分鐘，要係佢未上色之前就要取出。
▲ 取出後放 2分鐘，脫離烘焙紙放涼。
Stage 5：製作朱古力軟心
係焗緊的時候可以製作朱古力軟心，只要將淡忌廉煲滾離火，加入朱古力拌溶就得，非常簡單。
▲ 放涼之後，朱古力漿就會自然變軟。
▲ 放入唧袋就可以唧朱古力軟心到蛋白餅上。
▲ 之後放捧捧係中間夾實。
Stage 6：製作蛋白糖霜
基本的馬卡龍已經完成，不過送比小朋友，個樣又點可以咁普通。最後就係要整蛋白糖霜就裝飾，將蛋白同糖霜打至發白，再分到細碗並加入唔同色素均勻。分別放入唧袋後，就好似一支支畫筆咁，比小朋友自由發揮畫咩上去 D 馬卡龍上面了。
▲ 最後加上裝飾就完成架啦！
馬卡龍心得分享 :
1) 環境保持清涼
製作馬卡龍過程中要盡量保持環境清涼乾爽，唔係就要等好耐都未風乾到。
2) 蛋白預先放回室溫
蛋白需預先從雪櫃取出，放回室溫備用。如果環境太冷可以隔著熱水用打蛋器打蛋白，好讓蛋白更快打起。若果打起嘅時間過長就代表蛋白已經失去彈性，馬卡龍表面有機會出現龜裂。
3) 砂糖同蛋白比例 1:1
砂糖同蛋白嘅比例最好係 1:1 ，咁打好嘅蛋白會更企身，馬卡龍亦會升得高 D。
4) 色粉色差較 Gel 大
馬卡龍愈少水狀態會愈穩定，所以落色粉會比較好。不過色粉嘅 Gel 嘅色差大，要落到好深色，焗出嚟先有想要嘅效果。而今次用的是水溶色素，因為落幾滴已經好深色，容易製作色彩繽紛的馬卡龍。
5) 使用純糖粉表面更光滑
糖霜同純糖粉唔同，市面上糖霜多數會為咗防潮而加入玉米粉。如果用咗防潮糖霜焗出嚟嘅馬卡龍表面就會好易有裂痕或者變得粗糙。如果買唔到純糖粉可以將砂糖放入攪拌機磨成粉。不過今次選用糖霜，因為材料比較平同易搵。
6)壓拌混合麵糊到柔順帶光澤
若果提起刮刀，粉漿會慢慢流下，就要用刮刀輕輕壓 10下將氣泡走掉，直到拉起嚟柔順帶光澤。如果粉漿攪拌唔夠，焗出嚟嘅馬卡龍會比較粗糙，但攪拌太多，粉漿會缺乏光澤，焗出嚟嘅會馬卡龍變得扁平。
7) 黐底需用餘溫燜熟
從焗爐取出後，取起一塊睇一睇，如果底部黐住矽膠板上或牛油紙上，就立刻放回焗爐最底層用餘溫繼續燜焗，但唔好再開爐，唔係會好易上色，影響外觀。
8) 夾馬卡龍要捉旁邊
馬卡龍中間比較脆，將佢組合的時候要輕輕捉住旁邊，微微轉，就可以夾實。
依莉詩感言
今次嚟到港燈家政中心學整馬卡龍同平時去廚具 Workshop 好唔同，始終家政中心的廚具無咁新同靚，所以整出嚟的成品會有差別，不過亦相對接近係屋企整的成品。就好似整馬卡龍咁，用嵌入式焗爐焗，火力均勻 D ，失敗率都低 D ，用家用焗爐就未必做到同樣的效果。另外，呢度的課程價格都比較親民，仲有示範班同實習班分，適合我呢 D 入廚新手。
▲ 實習班的廚房都幾大，不過焗爐同打蛋器等的廚具都比較家用式。
▲ 示範班就齋聽無得整，就好似現場睇李錦聯咁，應該都幾搞笑。
相關影片﹕
分享到 :
最新影片
