之前講過先達有舖賣緊 $380 山寨機，差唔多係全先達最平o既手機，今次輪到講o下我o係先達見過最貴o既手機，其中之一就係呢部二手o既 Vertu Ascent Ti，舖頭開價 $35,800！
部機o係 07 年推出果陣，定價係 $47,000，Vertu 手機黎講，已經唔算貴！唔知咩人居然會去先達放呢部機，呢間舖又居然肯收喎，但老細可能好後悔，因為我大大話話見部機擺o係櫥窗入面，已經擺左大半年，擺到而家都仲未賣出！老細咁就責左收機o個兩、三皮o野o係度，真陰功！當初佢應該諗住轉一轉手就賺到幾千蚊，以為好筍，點知捉蟲啦~
其實先達會買呢 D 名貴手機o既大豪客根本唔多，就算有，既然俾得起三皮幾，都唔爭在俾多萬幾買全新機啦！我仲記得部機個 $35,800 二手價，一直都冇減過，間舖話部機有 95% New，大半年前可能係真o既，但o係櫥窗曬住燈擺o左咁耐，折舊都有排計啦，更加唔抵買。
其實上年年頭都有間手機舖幫客代購過原價 $45,000 o既 Dior 手機，賣出價更高達 $48,000，比呢部 Vertu 手機更貴，係咁多年來我見過出現o係先達最貴o既手機！
分享到 :
最新影片
