劇集《新聞編輯室》主角 Don Keefer 是這樣形容紐約時代廣場倒數的：「100 萬人等待年度最大型的反高潮活動」。其實除夕慶祝從來都只係搵藉口一班人聚下，但自從社交網絡嘅興起，更變成發相發 status 呃 like 藉口。以下就總括五類新年臉書必定遇到嘅人，可能你未必全部見過，但都肯定有熟口熟臉嘅感覺。
1. 大事回顧人
每次見到呢類人做大事回顧都不禁抽一口涼氣，Come On，你又唔係解決資源短缺糧食危機，有咩值得大事回顧？結果就只係講下自己去左邊到旅行食左咩和買左咩名牌好威威咁。最後更例牌兩句「2014 真係好開心呀，希望 2015 都可以一樣咁開心啦。」收場，真係當正自己哈姆太郎？
最近兩年有可以自動整理你今年 timeline 內容自動生成做成報紙那樣的 app 後情況就更加慘烈，個 app 除左回顧下年中邊個 status 多人like可以自 high 外就個個月就都係食物照。搞到好似四季美食博覽咁，但係個四季美食博覽就淨係得魚生囉（丫！今年仲有個炸雞叫做無咁悶囉）。
2. 新年突然發奮人
即係「新一年我要_ _」嘅 status，填乜都得，大路野有儲下錢、早d訓、戒菸/酒，而最熱門緊係 keep fit。咁當然唔會淨係得文字啦，之後梗係附加幾張好似唔知真係汗定係用水壺噴濕面嘅流汗照，重點係咩？緊係嗰個化好晒嘅全妝啦，唔係點顯示下我幾 sporty 點收兵。
▲拿拿拿，我無話志明男神扮做運動，但就完美示範左流汗照點影囉，你睇下幾 man，hehe (圖片來源 : 佢 fb, ig)
3. 睇 show 人
年年都總有人 tag 下自己去左時代/廣東道/紅館睇 show。今年就得返紅館有 Sammi 演唱會。有飛嘅仲唔即刻 check-in 又放相。叻喇叻喇,知你買到出面成萬五蚊一張嘅倒數 Sammi 演唱會飛喇，明你開場前梗係要合照打卡曬下命。我只係想問：有無多張飛？因為其實我都好想睇。嗚～
4. 屋企 party 人
呢類通常都係一大班人係一個豆潤咁細嘅屋企到迫埋食餐飯，咁例牌開飯前當然要相機食先影返張食物加人嘅大合照放上 facebook，唔係就好似食到周身唔聚財又食唔飽咁囉。
好嘅 party host 就會自己下廚煮幾味又或者成班人打返個邊爐，但更多機會係食 KFC 同 pizza 囉。但千奇唔好唔記得要配上 759 購入平價白酒/紅酒/香檳一支以收「丫！我地好 High Class 屎」嘅效用。
5. 扮消失人
最後呢類其實都唔知算遇唔遇見好，因為通常呢班人其實都係屋企上緊網但又驚人地知佢無人約咪扮哂消失囉。其實呢個傳統由 ICQ 年代已經開始，但而家係 Facebook 真係幾難扮，記得唔好就咁熄左個 chat 就算，拎返個手機出黎熄左個 GPS 但開返個 chat 佢，咁就無咁假喇。（唔好問我點解咁清楚。。。。。）
睇完呢一堆投訴後，聰明嘅讀者可能會反駁「你咁叻咁你新年出左咩 status丫？」。我其實放左岩岩過數嘅學生貸務 screen cap，當然啦，咁真嘅野搵鬼 like，所以話「人無 PR 真係食得屎」呢句真係至理名言。
分享到 :
最新影片
