上星期講緊小學玩過的電子玩具，其實未講完。去到六年班，學校就多左堂電腦堂，學一啲非常基本的常識（例如開機熄機…），唔使考試，上堂都係當玩。玩咩呢，小朋友齊打交呀，同埋一啲網絡小遊戲，例如 kutar 個啲，電腦室的真正身份係打機室，哈哈。當年仲會去朋友屋企玩電腦，玩叮噹大富翁，夢幻遊樂園，便利商店等等一啲要入碟玩的遊戲。當年的電腦「功課」仲係用 floppy 交，一隻好似得 2MB 到，而家連一張相都擺唔落。因為唔使成日用，差唔多小學畢業屋企先有電腦， 個部腦係行 Windows ME，一用就整埋寬頻上網，可以裝埋 ICQ，同啲三唔識七的人傾計，我亦都係個時學打中文。

上到中學已經睇少左好多卡通片（都仲有睇 XD），改為聽流行歌，同睇日劇，個時可能仲細，唔係好熱衷，但感受得到日本文化盛行：屋企人鐘意睇日劇，晚晚開 VCD 睇完又睇，睇到識背；我有個表姐好鐘意 KinKi Kids 個啲，我見住佢由最初期的 CD 機，變 MD 機，仲有好多海報、相同閃卡。以前聽歌，係真係聽，冇咁多 MV，有一輪仲可以打電話聽歌仔，我仲記得個冧把係 2625 2626，趁媽媽唔得閒，扮打電話問功課。

^（網上圖片）左起：悠長假期（睇左不下 10 次），流星花園（F4 係所有人的模仿對象），天國的階梯（誠俊哥～韓靜書～無限 LOOP）

中學個陣亦都多左好多軟件，以前學校有用 Aero Drive 同 e-Class 網上平台，有啲似而家的 Dropbox 同 Google Drive，可以擺文件上去，但實際上我讀個幾年都係冇乜用。另外，中學的硬件亦都年年新鮮，由開頭咩都冇，到裝左電腦連 Projector（但係好多老師唔識用lol），後來再裝埋紅外線廣播器，真係愈整愈多野，而家只需一部電話就搞掂晒。

學校以外，同學間除左用 ICQ 傾計，仲有樣野叫 HKFlash，算係我個時的 Facebook，畫下畫，留下言，其實好無聊 XD 後來大家都唔用 ICQ 轉用 MSN 傾計，仲會用 Xanga 寫 blog，亦會上網煲台劇、日劇同韓劇。手提電話亦愈來愈普及，上堂會send下SMS，數碼相機同手指更成為重要用品。

時移世易，呢兩篇文入面講過的電子用品不少都已經退役，成為歷史，留下的只有一去不返的往事（望遠方）。我只係寫左啲印象較深刻細個時用過的「科技」野，如果你地有更多可以再補充，一齊懷緬下舊日時光～

未睇過上篇的可以呢度睇返 ~

數碼港女週記：那些年，我們有的電子娛樂 （上）

分享到 :

最新影片