今日下午小米就係北京發佈了以高性價比為主的紅米系列新作：紅米 Note 2，799 人仔就可以買得到一部大芒手機，究竟用落係點？而家就等身在現場嘅 Edward 同大家分享一下。
更輕薄繼續「膠」
今次推出的紅米 Note 2，既然走平價大芒手機路線，大家都唔好太期待佢會用咩特別物料。事實上紅米 Note 2 繼續採用塑膠背蓋，而且繼續有多種顏色俾大家揀。至於機身方面，相比第一代紅米 Note 實在係細部咗同埋輕、薄咗好多，拿係手度感覺更加舒服，單手操控亦再輕鬆啲。
▲雖然繼續用 5.5 吋熒幕，但係就大幅「纖體」，令紅米 Note 2 拿上手更加舒服。
▲單手操控都絕無問題。
▲從呢張相大家可以見到機邊做到好薄。
▲另外值得一提嘅係今次紅米 Note 2 都內建咗紅外線連接埠，可以配合智能家居 APP 遙控操控家居各電器。
▲而機背就設有多種顏色俾大家選擇。
▲另外背蓋都有磨砂同拋光兩種物料選擇，筆者就比較鍾情於磨砂，因為無咁易痴指紋。
採用陽光屏熒幕比上代黃
至於熒幕方面，紅米 Note 2 採用了 5.5 吋 1080p 全高清熒幕，另外繼小米推出了小米 Note 後，再係紅米 Note 2 上採用陽光熒。係顯示上，Edward 覺得紅米 Note 2 熒幕表現算係唔錯，清晰度高之餘可視角度亦高。不過相比紅米 Note 一代，Note 2 熒幕就有明顯偏黃情況。
▲紅米 Note 2（左）熒幕有 1080p 解像度，而且採用了陽光屏技術，令它係細緻度上表現好好。不過色溫上就明顯比紅米 Note 一代（右）偏黃。
▲用來睇片，紅米 Note 2（上）效果相比紅米 Note（下）真係細緻唔少。
▲可視角度都好高。
Samsung 鏡頭表現不錯
另外，今次小米亦係紅米 Note 2 上改用了 Samsung / OV 製，具備 PDAF 相位對焦功能的 1,300 萬像素鏡頭，標榜對焦夠快，但其實筆者覺得同上代紅米 Note 相比，唔算明顯快好多。但係相質方面，Note 2 確實有好大提升，最少相片油畫化情況改善咗勁多，即使 Edward 放大相片至 100% 都唔太覺，只係雜訊仍然唔少（預咗）。有咗紅米 Note 2，大家就唔洗再覺得一千蚊樓下手機影相唔慌靚啦。
▲小米今次係紅米 Note 2 上採用了具備 Samsung PDAF 相位對焦技術的 1,300 萬像素鏡頭，雖然 Edward 覺得對焦同上代相比唔係明顯快好多，但相質就明顯強化咗唔少。
▲相片質素確實唔錯，甚至可以媲美千零二千幾蚊的其他手機機款。
▲就算 100% 放大相片，大家都可以見到無明顯油畫化情況。
▲唯一係影夜景或者身處較暗環境又唔開閃燈影相個時，相片雜訊會好明顯而已。
▲另外前置鏡頭亦提升 500 萬像素。
▲而且都有美顏功能，Edward 只係開咗美顏模式中級，效果都算既自然又唔錯。
效能唔錯跑分近 5 萬
至於效能方面，今次紅米 Note 2 都有好大提升，重點係採用了 MTK Helio X10 八核心處理器，令唔洗一千蚊嘅手機，效能都有千幾二千幾蚊手機嘅水平！筆者測試過，基本上無論跑分定係打緊機，紅米 Note 都唔覺會窒，而且機身散熱做得幾好，就算跑緊分機背都唔覺熱，又或者係達到 34 度的北京熱天氣於室外玩紅米 Note 2，都唔覺手機發熱，呢一點係值得一讚。
▲用安兔兔測試紅米 Note 2 跑分，獲得接近 50,000 分的極高分數，真係好厲害。
▲至於溫度方面，就算 full load 跑分時，機背溫度最熱都係 34 度以內。
▲另外紅米 Note 2 亦支援雙卡雙待功能，亦支援插 microSD 記憶卡擴充儲存空間。
▲至於電池方面，就有 3,060mAh 容量電池，好夠一般人用了。
Edward：「超抵玩 2nd phone 之選！」
整體來講，紅米 Note 2 賣得 799 人民幣呢個價，大家都預咗佢會用番塑膠物料做機身，但機身在設計上做得比上代輕薄咗好多之餘，效能同埋影相質素都有好大提升，加上散熱亦做得好好，雖然熒幕係有偏黃情況，但作為一千蚊港紙唔洗嘅智能手機，紅米 Note 2 確實係暫時超抵玩 second smartphone 之選！
分享到 :
最新影片
