自從 YouTube 同社交網絡平台興起，每一個人都有機會成為網絡紅人，影響力甚至乎比 Media 更利害。但機會還機會，要突圍而出都唔喺一件易事，而 unwire 今次就訪問咗用無厘頭方式煮嘢食殺出一條血路，目前有超過 30萬人訂閱佢新片嘅人氣 YouTuber － Hay Wong (黃俊熙) 同經常喺片中客出嘅 Hay嫂，分享成為成功網絡創作人心得。
煮嘢食都要有個性
面對每日數以億萬計嘅新影片，要觀眾俾 like 甚至 share ，影片嘅質素同內容都好重要。以「Cooking Hayhay 」系列闖出名堂嘅 Hayhay 就覺得影片一定要原創、有個性，唔可以人做你又做。「平時 D 烹飪節目都喺話你知幾時倒 D 咩落去，都幾悶，所以我地會加 D 搞笑元素入去，例如 Hay嫂會畫 D 簡單公仔、圖案落去做動畫，等成件事無咁悶。」另外，剪接同拍攝技巧都好重要，「煮野食好多時間都要等，剪走呢 D時間，條片節奏就可以快 D。同埋，最好唔可以一鏡過，要剪多 D 唔同角度，俾大家睇到幾個唔同角度嘅你，咁畫面就會豐富 D。」
人氣喺用心機、時間換番嚟
要喺網上人氣持續高企並非易事，就算偶然有一兩條片能夠取得極大迴響，但唔喺成日有片出，粉絲就好快會流失。Hay Hay 就建議以固定時間表上載影片，等觀眾有所期待，持續收看自己嘅頻道。不過，要做到持續性就需要付出無數時間同精力去製作，「好似拍一段 5分鐘嘅片，就需要全日時間去做。每個菜式都要預先試過，而網上食譜唔係百分百可信，試過跟食譜煮好幾次但都失敗，要將幾個食譜混合再去試，例如之前整豆腐花，整左 4、5次都唔成功，原來用嘅豆漿一定要無糖，呢 D 細節網上就無講，要自己試出嚟。成功之後先開始拍，又要用 2-3小時，之後剪片同加字幕又再花幾個鐘，真喺少 D 熱情同心機都未必做到。」另外，就算捉到路知道觀眾鍾意睇 D 乜，但都唔可以次次一式一樣，所以要不斷增值自己，諗更多觀眾鍾意嘅元素。Hay Hay 除咗談煮嘢食，有時仲會講下車同科技產品，間唔中仲會搵自己隻愛貓愛犬客串，令影片頻道內容更豐富。
為拍好片不惜工本
事實上做創作唔止喺靠熱情就可以拍到好片，以前一支腳架接上一部單反就可以喺屋企拍片，但隨住手機拍片像素愈來愈高，大家對 YouTube 片質素要求亦愈來愈講究，無論器材、道具、環境都決一不可。「喺開始自己頻道呢 4、5年已經花咗 6位數字添置器材，一開頭最簡單一部單反，之後買咪收聲，買燈光，慢慢 upgrade 上去，器材亦愈來愈專業。除咗器材，整嘢食仲要買材料買工具，好似之前整雞蛋仔就要買夾板，不過唔洗好貴，幾百蚊就有。雖然一路洗咗唔少錢，不過試到想煮嘅嘢，又拍到吸引嘅片俾大家睇，絕對喺值得嘅！」
同路人互相支持
好多人對 YouTuber 都不理解，覺得佢地發明星夢、不務正業，有好多負面睇法。 面對這些困擾，Hay Hay 唔會理會太多，「好多時 D 人會貪有趣去用語言攻擊你嘅外表，又講晒粗口咁，與其晒時間去理會希望將你撃倒嘅人，不如花更多時間去聆聽支持者意見，做好下一條片。」除咗一群默默支持自己嘅粉絲，Hay Hay 最近加入了 VS Media，不但提供專業器材、場方同人手可以借用，可以專心創作自己想拍嘅影片，仲有一班諗法差唔多嘅網絡創作人，互相鼓勵，令佢覺得行呢條路一 D 都唔孤單。
▲ VS Media 大本營有專業嘅直播打機房。
▲ 仲有 Band 房同樂器俾創作人錄音。
▲ 亦有不同嘅場景佈置，協助網絡創作人專注佢地嘅創作。
分享到 :
最新影片
