之前 LG 舉行記招，宣佈推出嘅唔係 G Pro 系列，而係全新 V 系列嘅 V10。昨日 V10 韓水終於極速抵達香港，首次加入雙前鏡頭同埋多咗個細熒幕，究竟用落感覺係點？好唔好得過 G4？而家 Edward 就同大家一齊睇睇。
手感都算幾好‧機背少許膠
之前 G4 採用真皮機背，筆者真係讚不絕口，今次 V10 就一改之前 G4 的設計，用番膠製機背殼，感覺係膠咗啲，好彩係機背殼都有少許凹凸紋理，補回無咗皮革個種手感。另外機背呢種膠係稱為 DuraSkin 嘅塑膠，其實都有助強化機身耐用度，都算係解釋得來嘅原因。此外兩側機邊仲採用咗 316L 鋼金屬中框，符合 MIL-STD-810G 軍用防撞規格，理論上就算跌機落硬地，都無咁易跌爛熒幕（除非熒幕邊位直接撞擊硬物），對於手機耐用度都大有提升。唔知呢種設計，可唔可以補得番大家心目中 V10 設計無 G4 咁靚仔嘅遺憾呢？
▲機背用番塑膠設計，不過今次採用嘅係 DuraSkin 技術，有助強化耐用度，可以話係非一般塑膠。
▲機背有凹凸花紋，摸上手手感都算唔錯。
▲兩側機邊採用咗 316L 鋼金屬中框，符合 MIL-STD-810G 軍用防撞規格，理論上就算跌機落硬地，都無咁易跌爛熒幕。
▲另外 V10 同 G4 一樣，採用可換電池設計，電池容量為 3,000mAh。
▲另外亦一樣可以插 microSD 記憶卡擴充容量，想買插卡換電機，V10 都係一個選擇。
▲由於係水貨關係，跟機火牛係雙腳插頭，不過輸入都有 1.8A，支援 LG 自家嘅快充功能。
▲至於跟機耳機就仍係 Qual Beat 3 入耳式耳機，而且還由著名音響品牌 AKG 調較過，音質理論上應該唔錯。而設計上亦係耳機殼同埋線控位採用金光閃閃嘅金屬質感物料，感覺比 G4 嘅跟機耳機更靚。
▲音質素上支援 32-bit HiFi DAC 功能，可提高音效質揀同減少音效中嘅噪音。
單手操控都仲 OK‧特別設計強化操控
此外，V10 嘅熒幕雖然同 G4 一樣都係 QHD 2K 解像度，但熒幕尺寸就大啲，達到 5.7 吋（G4 熒幕為 5.5 吋）。至於大細方面，筆者就拿來 iPhone 6s Plus 比過，其實大細幾乎一樣咁滯，厚度都差唔多，不過 V10 機背有少許弧度，所以摸上手手感差唔多。另外，V10 係單手操控方面，其實都係勉勉強強，始終機身有番咁上下大，除非你嘅手掌特別大啦。不過 LG 為咗加強 V10 係單手操控嘅體驗，加入咗迷你檢視功能，只要係設定開啟咗佢，之後用左手拿機，就係返回鍵向右一滑；又或者右手拿機，係程式切換鍵向左一滑，就可以將熒幕顯示縮細並靠左或靠右擺放，咁樣就算機身較大，單手操控都無問題。此外縮細後嘅尺寸都可以自行調較，要回復至全熒幕只要點按一下角落嘅「X」鍵即可，十分體貼。
▲機身大細方面，V10 其實同 iPhone 6s Plus 差唔多。
▲不過由於 V10（左）採用少許弧形嘅機背，所以整體厚度會比 iPhone 6s Plus（右）厚少少。
▲單手操控方面，V10 其實都係勉勉強強。
▲不過 V10 就加入迷你檢視功能，左手拿機個時係底部向左一滑，就可以將熒幕顯示縮至左下角。
▲而用右手拿機個時，底部向右一滑就可以縮至右下角，方便大家用單手操控手機。
▲縮細之後，仲可以拉動角位調整大細，手細嘅用家如果想再縮細啲都無問題。
雙熒幕實用過曲熒幕
今次 V10 嘅一大特別，就係係機頂右上角位置加入一個 2.1 吋 106 x 1,040 解像度嘅副熒幕，其實設計就好似 Samsung Galaxy Note Edge 嘅側熒幕咁，唔止可以顯示日期時間、天氣、訊息等，仲可以顯示最近使用過嘅 APP 嘅捷徑，俾大家一按即開。此外，唔止開芒個時可以用，就算主熒幕關閉個時，都仲可以睇到日期時間同埋訊息，功能好齊全。其實佢同 Samsung 舊年推出嘅 Note Edge 比，兩機的副熒幕功能其實差唔多，唯一係 V10 嘅副熒幕唔似 Note Edge 咁可以擴充功能，顯示第三方程式嘅訊息提示；不過如果講起實用程度同埋拿係手上嘅手感及操控，V10 嘅副熒幕設計實在比 Samsung 手機的雙曲面側熒幕設計實用得多，最少唔洗驚唔覺意誤觸，呢一點確係 V10 優勝之處。
▲V10 嘅副熒幕位於右上角，可以展示最近使用過嘅程式嘅捷徑。
▲亦可以瀏覽推送嘅送息。
▲而係某啲 APP 入面，仲可以作為功能切換嘅目錄。
▲就算關閉熒幕嘅時候，都可以快速開啟相機、手電筒、開關 Wi-Fi 或設定為鈴聲、震動或靜音功能。
▲而平時亦可以睇到日期、星期幾、時間同埋手機電量。
雙鏡頭自拍夠 wide！groupie 都 easy job
V10 嘅另一特色，就係內建咗雙前鏡頭設計。大家唔好誤會呀，好多以前配備雙鏡頭嘅手機，一係就拿來影 3D 相片，一係就拿來影「先影相後對焦」嘅相片，今次 V10 就教識大家第三種功能：就係令前鏡頭攝影角度大大加闊。原來一個鏡頭直向自拍個時，可以影到 80 度，當使用雙鏡頭自拍個時，就可以影到 120 度超廣角，大家唔洗打橫部機影都可以影到超闊角度 selfie 相，就算影 groupie 都一樣 easy job！不過相比 G4 前置鏡頭有 800 萬，V10 嘅雙前置鏡頭，每個就得 500 萬，而且質素仲比較差，基本上如果係較暗地方自拍，會變得幾油畫化，呢個缺點就睇大家接唔接受到了。
▲V10 採用雙鏡頭設計，每個鏡頭拍攝角度為 80 度，像素為 500 萬，兩個鏡頭合起來可以拍攝 120 度超廣角度嘅 selfie 相片。
▲用家可以自選係用一個定雙鏡頭影 selfie，上面筆者試相，左邊係用單鏡頭影，右邊就係用雙鏡頭影，可見雙鏡頭真係可以影到闊好多嘅景像。不過質素方面就只屬一般，相片無論有無用美顏，都有明顯油畫化情況。
另外，佢亦加入特別嘅影相模式，內建類似拼相功能，但唔少 APP 拼相只係影完之後將幾張相拼為一張大相，而 V10 嘅拼相功能，唔止可以將兩張至四張大相拼為一張大相，仲可以俾大家逐張影。而且影個時，會盡用一個前鏡頭、雙前鏡頭及機背主鏡頭 3 個鏡頭，拍下 2 至 4 張相片並拼合在一起，萬一要影 groupie 又搵唔到人揸機，又或者要影盡影相地方嘅所有景像，呢個功能就好啱用了。
▲內建可以玩拼相功能，而且可以逐張影並即時合拼，唔似其他拼相 APP 要事先影完事後先合拼。
▲實際出來效果，可見右上角係用單前置鏡頭影，左上角就用雙前置鏡頭影，而下方相片就用機背主鏡頭影，真係用盡 3 個鏡頭架！
4K 拍片都有手勢模式！指向收音收音更清晰
除咗影相，今次 V10 同 G4 一樣，都支援 4K 30fps 拍片功能，但 V10 相比 G4，就唔止影相有手動功能，連拍片都有手動功能！此外，拍片個陣仲可以調整機身 3 個咪高峰嘅靈敏度，達到指向收音嘅效果，咁樣拍片個陣就可以更清晰收到來自唔同方向嘅各種聲音。
▲V10 唔止影相有手動模式，連拍片都有手動模式，大家用手機第日都可以影到半專業影片了。
▲拍片最高可支援 4K 30fps 質素，大家亦可以選擇 HD / FHD CINEMA 模式，拍攝 21：9 比例影片。
▲拍片時仲可以調整機身 3 個咪高峰嘅靈敏度，達到指向收音嘅效果，咁樣拍片個陣就可以更清晰收到來自唔同方向嘅各種聲音。
▲另外仲有一個全新拍片模式，可以拍攝一段一分鐘嘅影片。最特別嘅地方係每次按下拍片鍵，都會拍攝一段 3 秒影片，令大家可以逐段逐段 3 秒短片慢慢拍，當完成時按下儲存，就會自動連結為一條完整嘅影片，呢個模式用來拍攝活動花絮真係好啱用。
此外，有一項新功能都值得一提，就係大家開啟 V10 嘅相機功能後，會係右下方發現一條拉出式目錄，打開後可以見到幾項設定，包括：藍牙、記事、Gmail、訊息、YouTube 等，令大家影完相或拍完片之後，可以即刻透過唔同方式同朋友分享，唔需要進入相簿先做到，呢一項設計真係幾體貼。
主鏡頭質素依然唔錯
至於主鏡頭方面，V10 仍然同 G4 同級，採用 1,600 萬像素，亦同樣支援鐳射輔助對焦及 OIS 光學防手震功能，就算係較暗地方影相，都可以清晰影到靚相。以下就等筆者為大家展示部分試相吧。
▲V10 主鏡頭像素仍然係 1,600 萬，亦仍然支援鐳射輔助對焦功能。
試相區
2K 熒幕質素依然高
至於熒幕方面，今次 V10 熒幕繼續採用 QHD 2K 熒幕，質素同 G4 相比可以話係同級，細緻度依然好高，唔洗放大顯示睇 unwire.hk 桌面版網頁，都可以清晰睇到細字。不過熒幕似乎仍有 G4 嘅偏藍情況，而且由於仍是採用 IPS LCD 熒幕，雖然亮度都幾高，但可視角度依然及唔上採用 Super AMOLED 熒幕嘅機款（例如：Samsung Galaxy S6 edge+）。不過整體來講，對於一般用家來講，應該仍會覺得幾滿意。
▲V10 嘅 2K QHD 熒幕，質素依然幾高。
▲就算睇桌面版 unwire.hk 網頁，都唔洗放大顯示一樣清晰睇到細字。
▲用來睇片，顏色算係幾鮮艷，不過都係有偏藍情況。
▲亮度雖然夠，但可視角度依然不及 Super AMOLED 熒幕嘅機款，不過對於一般用家來講，應該都會收貨吧？
4GB RAM 系統操作暢順
最後一項 V10 相比 G4 優勝嘅地方，就係雖然都係採用 Qualcomm Snapdragon 808 六核心處理器，但 RAM 就由 G4 嘅 3GB 加至 V10 嘅 4GB。如果大家之前有用過 G4，應該都會感受到用咗一段時間之後，可能因為本身 UI 比較食 RAM，所以都會間唔時窒下窒下咁。而 V10 上面，LG 就再進一步，將 RAM 加至 4GB，筆者就試玩過一陣，發覺無論係頁面切換、程式之間切換、又或者係 APP 入面開啟各項目錄，都超級暢順。就連開機都好快，基本上 10 零秒就完成開機過程，真係好爽。當然，會唔會用一排之後又會有窒機情況，筆者只係試用咗一、兩個鐘，確實試唔出會唔會仲有呢個情況，唯有等待下星期港行記招個時，先同大家試真啲啦。
▲V10 仍然係採用 Qualcomm Snapdragon 808 六核心處理器，繼續避開 810 處理器過熱問題。
▲V10 亦係首部 LG 內建 4GB RAM 嘅旗艦機款，閒置時有超過 2GB RAM 俾大家用，足夠保持 V10 系統暢順。
▲透過安兔兔評測，V10 獲得 51,900 分數，比起 G4 時嘅 49,000 分微升少許，應該都係多得多出來嘅 1GB RAM。
總結：設計差咗但講求「內在美」
老實講，Edward 覺得今次 LG 推出 V10，同 G4 有好明顯嘅取向分別：G4 相比來講以外貌、手感取勝，而 V10 就相比捨棄外表，改為實而不華嘅設計，但內建功能就比 G4 更為實用，唔止拍片、selfie 方面，最特別就係佢嘅副熒幕，既實用又唔影響手感，仲可以令大家睇到訊息之餘，又唔驚郁唔郁就要開主熒幕浪費電力，LG 今次呢項設計，筆者真係好鍾意。當然，如果大家買手機係外貌先訣，可能 G4 先係大家杯茶；但如果大家比較著重「內在美」，V10 大家應該會用得好滿意！
售價：$5,980
查詢：三禾電氣（2374 0618）
分享到 :
最新影片
