數碼同學會：同學仔訪史丹福取經有咩得著？

早前講過，數碼港同史丹福大學商學研究院（Stanford Graduate School of Business）推出咗「數碼港 – 大學合作夥伴計劃」，以金融科技（Fintech）作為重點，培育有志創業嘅年輕人成為科技同創業人才。去完呢個 Trip，究竟呢班同學仔學咗咩返黎呢？小編就同其中一隊算係獲得「最佳有進步獎」嘅同學仔傾過計。

SmartPOS 自助付款 APP

九月尾嘅時候，數碼港請咗 18 支大學生隊伍前往位於矽谷嘅史丹福大學（Stanford）學師，期望一班有意創業嘅同學仔能夠學習到各種 FinTech 嘅實用技巧，再應用到佢哋嘅產品雛型。其中，來自香港理工大學嘅 Cathy、劉杰及李國旭，就憑佢哋嘅 SmartPOS 獲得史丹福大學嘅導師大讚「進步神速！」。SmartPOS 係一個自助購物付款應用程式，主要希望可以喺超級市場同埋一 D 零售舖頭入面使用，等客人揀好貨品之後，自己用手機付款，慳返喺收銀處等待嘅時間，既方便又快捷。佢哋一開始 Present 嘅 Idea 就被批評話有好多唔完整嘅地方，於是就跟住導師比嘅意見，晚晚改到深夜時分。結果，到課程最後一日做 Final Pitch 嘅時候，大家都好 Impressed，佢哋個 APP 嘅雛型比開頭真係完善咗好多 ！

 

「Stanford 好 Chur 呀！」

佢地咁犀利，小編梗想知道佢哋點解可以喺短時間之內學到咁多嘢啦，點知佢哋第一句就答我:「Stanford 好 Chur 呀！」佢哋每天 6 點鐘就要起身準備全日嘅活動，7 點食早餐，8 點就開始上堂，連食 Lunch 都有 Guest Speaker，夜晚仲有 Study Group！小編聽到都嚇親，仲記得讀大學嘅時候，「8 半」堂好多同學都會走，喺 Stanford 仲要 8 點就開始上堂？你哋得唔得架？

佢哋話可以喺 Stanford 上堂係個非常難得嘅機會，再辛苦都值得。佢哋總共喺 Stanford 上咗一星期堂，課程重點教授同學點樣做好個 Pitching，再加一 D 講創業家心理嘅內容，以「老闆」嘅角度睇盤數啦，同埋點樣吸引「天使」投資你盤生意等等。最好笑係 Cathy 話：「佢哋用咗一個上晝，就教晒我一個 Sem 要學嘅會計喇！」因為喺 Stanford 上堂，老師唔會逐張 Powerpoint 照住讀，而係叫你自己準備好第二日要學嘅資料，上堂時只會提吓重點，目的在於培養學生嘅自學能力。

 

「想發達就要有人投資！」

其實個 Trip 都唔係淨係去 Stanford 上堂嘅，佢地仲參訪咗幾間矽谷嘅科技企業同 Accelerator。 但總括嚟講，佢哋就覺得最實用嘅係可以了解到投資者嘅取向，繼而點樣做好個 Pitch。「想發達就要有人肯投資我哋！」因為佢哋幾個同學都算係無本創業，當然想有投資者支持啦。

其實參與計劃嘅18 支隊伍返嚟香港之後，數碼港就已經準備咗個機會俾佢哋搵第一筆資金喇！聽日(11月17日)，呢 18 隊就會參加「數碼港 – 大 學合作夥伴計劃」Demo Day 做 Pitching，勝出嘅 10 隊可以各得港幣 10 萬，之後仲有機會直接進入數碼港培育計劃嘅面試添！所以佢哋就話而家正努力備戰中，完善緊好多去 Stanford 之前冇見到嘅細節，希望聽日可以突圍而出。

見到佢哋學到咁多野，小編都好想去一次矽谷，感受一下當地嘅創業氣氛。唔知數碼港下次會唔會贊助埋小編去觀摩一下呢？（笑）

 

延伸閱讀：金融科技限定！大學生參觀矽谷 Startups 到史丹福上堂

分享到 :

最新影片