若然去麥當勞開餐而又唔想食得太飽，相信唔少人都應該會選擇食麥樂雞，而一般來說香港分店現時設有 6 件及 9 件裝，之前亦曾經短暫推出過 18 件裝的加大版，不過最高數量又可以去到幾多件呢？話說日本麥當勞稍後時間將會推出一款重量級麥樂雞，而當中竟然有 48 件麥樂雞咁多！
其實現時在美國大家最多可以叫到 40 件的麥樂雞餐，至於日本麥記本來最多只提供 15 件麥樂雞餐。不過為了宣傳 AKB48 姊姊組合 NGT48，於是日本新潟縣的麥當勞便決定於 12 月 1 日起限時推出 48 件麥樂雞套裝。值得留意的是 48 件麥樂雞加起來就有超過 2,000 卡路里，若然一個人真的能一次過食得晒，那就差不多已經吸收到一日所需的熱量。
此外，既然與 NGT48 合作，今次麥當勞當然不止推出 48 件麥樂雞那麼單調，因為除承載麥樂雞的桶會以 NGT48 作為主題外，同時每桶亦會贈送一張 NGT48 成員的特別卡（雙面印製，一共 25 款），而新潟縣各間麥當勞分店內亦會張貼 NGT48 成員親筆簽名海報。最後，資料顯示 48 件麥樂雞每桶售價為 1,800 日圓（約 114 港元），但試想像一下如想集齊 25 款特別卡，咁到時又要食幾多件麥樂雞呢？
來源：McDonald’s Japan
