AIA 歐陸嘉年華今日就正式開幕，除咗上年都有嘅機動遊戲，今年仲多咗幾部新嘅機動遊戲，想知邊個攤位最易中獎？邊個機動遊戲又最刺激呢？琴日籮文同 Billy 就到咗現場為大家實試一下，想知結果就繼續閱讀啦！
基本攤位資料
攤位遊戲數量：全場 25 個攤位遊戲
代幣價錢：每個為 $10
遊戲所需代幣：除了夾公仔機，大部份每次 2 枚代幣有 4 次機會。
獎品等級：每個遊戲都設有細、中、大、特獎，都是不同大小的公仔。
最易中攤位：保齡球
一入場記住要觀察多數路人手上拿住啲咩公仔，琴日籮文入到去見得最多就係毛毛同大眼仔，之後籮文試過，果然依個攤位係最易中獎！玩家有 4 次機會用波去撞冧啲樽，就好似打保齡球咁。秘訣就係有幾大力就打幾大力，當然要盡量打正中央位置啦。如果一球就打冧所有樽就可以得到特獎，兩球先打冧晒就得大獎，如此類推，只要四個機會之內可以打冧所有樽都可以有獎品拎走！
▲最緊要大力！不過工作人員可能會要求你貼住張枱面去碌
最易中攤位：別有洞天
另外一個易中獎嘅攤位就係依個推波波嘅遊戲，將個波推出去落到不同分數嘅窿，4 球嘅分數加埋就係總分，只要高過 100 分都可以有獎品。而窿窿嘅分數分別有 5、10、20、50、100、同埋 0 分，最緊要嘅秘訣就係要細細力，只要避免到波波跌落最大嘅 0 分窿窿，中獎機會就大好多。籮文第二球就中到 100 分窿窿。
▲嘩第二球就中100分！
最難中攤位：投幣王
即使公仔有幾吸引都千其唔好玩依個「投幣王」遊戲，玩家需要將代幣投到碟上停留先為之中獎，籮文同 Billy 用咗半小時無間段不停地投幣先成功中到一次，所以難度係十分高。之後用咗足足一小時去研究個竅門，全程用上差不多一千個代幣，由天光玩到天黑發現都係冇竅門，全靠彩數。如果你真係好鍾意依個攤位嘅公仔，又有幾千至一萬蚊 Budget，不妨可以試下。
▲Billy 玩到天黑，終於成功啦
最刺激（而且最靚風景）機動遊戲：MACH5
MACH5 其實上年就已經有，今年繼續冧莊成為最刺激機動遊戲。MACH5 係全場最高嘅機動遊戲，頭尾兩端都有座位，成座 MACH 5 公轉同時，整排座位亦會不由自立自轉，個種 Free Fall 嘅感覺比跳樓機更加似跳樓。值得一提就係坐上去可以從嘉年華最高點一覽維港兩岸美景，不過記得著多件衫呀，因為上面都幾凍。
今年新增一批全新機動遊戲：
▲Xtreme 刺激度未及 MACH5，但係催嘔度一定係數一數二
▲Wave Swinger 係比較小兒科，同時可以睇到嘉年華內嘅景色
▲Das Fun Schiff 海盗船刺激度就唔高，不過好有夏威夷風情，上去影下相都好呀嘛
▲一系列意大利巴洛克風格彩燈建築
籮文：「今年好多靚嘢睇，唔玩機動遊戲都可以黎影吓相」
▲溜冰場外燈飾勁浪漫
▲上年都有嘅舞台表演
▲Beatles 影相裝置
今年除咗新增一批全新機動遊戲之外，仲有唔少靜態啲嘅娛樂，就例如有舞台表演、燈飾等，有啲新增嘅機動遊戲仲好靚架添，就好似 Das Fun Schiff 海盗船，好有夏威夷風情，就算唔玩都可以去外圍影下相，啱晒怕玩機動遊戲嘅人！
友邦歐陸嘉年華2015
日期：17/12/2015 – 21/2/2016
時間：11am – 11pm (大除夕將開放至凌晨 1am)
地點：中環新海濱
票價：成人$125(包10個遊戲代幣)；小童及長者$90（包7個遊戲代幣）
分享到 :
最新影片
