近年創意市集愈來愈多，幾乎每個星期都可以有幾個市集，而每個市集又有咁多檔主，到底手作人又點樣可以係眾多攤檔中生存呢？今日就請來 3位檔主分享下擺市集要注意 D 咩啦！
擺市集可以同客人交流
今次 3位檔主都有著不同背景，有學生，亦有全職手作人，不過佢地擺市集的原因都係一個，就係希望可以同更多志同道合的人交流，分享心得。
賣寵物飾品的阿 fa 係比較早開始擺市集的檔主，早係 4-5年就已經開始，「初初做全職手作人的時候要係商場開鋪，當時的人唔明白手作的價值，更覺得手作可以賣得再平 D。但因為租金貴，加上又要看鋪，又要係屋企做手作，分唔到身，所以轉去網上宣傳同擺市集，我覺得市集係好好的平台同本地人接觸，因為就算相影得幾靚都未必睇到手工好唔好。」
至於賣乾花飾品的 Joyce 因為係大學生，擺市集的次數唔多，不過就好享受將自己鍾意的嘢同更多人分享的過程，「本身都有 Online Store，不過因為押花手機殼係市面上比較多，所以主要的客源都係市集。聽到 D 客人細細聲係檔前面讚賞自己的作品，會覺得好開心，所以愈來愈有興趣擺市集時同客人交流。」
而年紀輕輕的中學生 Janice 原來已經係一個專業的靈性治療師，雖然只係擺過 3次市集，不過客人已經源源不絕，「我 IG店開咗接近兩年，儲了不少熟客，不過通常都係隔住電腦同客人做治療，希望可以有個地方同客人親身接觸。」
▲ 賣寵物飾品的阿 fa 係全職手作人，由開鋪到擺市集已經有 5年，睇住手作界係呢幾年的改變。
▲ 賣乾花飾品的 Joyce 雖然製作整押花飾品 2-3年，不過一路都純粹為興趣而整，擺市集都係想同更多人分享。
▲ 年紀輕輕的中學生 Janice 係一個專業的靈性治療師，主要係 IG店同人做占卜同靈性的清理，而擺市集就係希望同客人有更好的接觸。
定價包埋失敗同心機
講到市集，其實好多人都唔明白 D 產品點解可以賣到咁貴，特別係一 D 經常係格仔鋪見到的押花手機殼或者飾物。但原來係製作的背後，包含著佢地好多的辛酸同失敗。
一個細細個的匙扣賣幾百蚊好似好貴，不過阿 fa 就坦言好難靠手作維持生計，「其實失敗率好高，我做咗咁多年， 10% 都未必賣得。如果有個泡泡係寵物的面度，我都接受唔到，所以要不斷重做。有時一個就要整 3-4日，可能到最後先發現個滴膠有問題，全部唔要得。」
經常見到的押花手機殼製作都唔容易，Joyce 試過好多唔同材料，發覺如果 D 滴膠唔好會好易搞到 D 花變黃，唔耐用。「最後我選擇咗去花墟買真花自己押，不過就要花好多時間，而且有 D 花押完要染色，好容易失敗。好多時鮮花要一束束咁買，但無可能係枯萎之前用晒，每次只能係一束入面揀最靚幾朵做乾花，就算菊花同繍球花最易做，但都要係一個星期之內，整乾得幾多就幾多，始終個有浪費，所以有幾個已經做到好出名的押花手作店，都成 4百幾一個手機殼。」
原來手作的製作過程一 D 都唔簡單，加上手作人對自己作品的執著，可以賣的成品大多都係從無數失敗品挑選出嚟，但點解 Janice 的靈性治療又咁貴呢？ Janice 就解釋「每一次都要好專心，一對一咁做專業治療，雖然表面上似占卜，不過其實係幫人解決緊問題。」
▲ 市面有好多押花手作，但好多都賣得好貴，而 Joyce 就覺得唔需要將 handmade 變成賺錢的工具，選擇用較低的價錢同人分享成果。
▲ 雖然價錢無咁貴，不過 Joyce 用的係自已押的鮮花，所以成本同失敗率都好高，而換來的就係更好質素。
▲ Joyce 最好嘗試用微波爐叮乾花，雖然望落好簡單，但佢笑言已經整壞咗兩個微波爐。
淘寶拉低整體質素
講到依家手作風氣愈來愈熱，唔少人手工未夠好，甚至入淘竇貨擺檔，拉低市集的質素，佢地都不約異同覺得可惜，不過對於佢地自己的作品仍然有信心。
阿 fa 的寵物飾品可能大家都見過，市面亦有唔少人模仿，不過佢都覺得係好事，「我之後都有打算開班，亦唔介意人地抄個技術，因為大家有唔同的創意，而我的作品都會係獨家，亦會以質素取勝。」
而為興趣而賣押花手機殼的 Joyce 就輕鬆地說，「我整手機殼純粹興趣，所以係市集賣的只會係 iPhone，如果我賣唔出就自己用。」
▲ 阿 fa 的寵物飾品發展了唔少款式，有頸鏈、耳環、頸鏈等等。
▲ 客人可以來相訂製自己寵物的匙扣。
Join 市集最緊要揀地區
對於近年一個星期同時有好多個市集，佢地係揀市集擺檔都有一封心得。除了市集的地區同租金，仲要睇主題同其他活動。集合各人的經驗，佢地發現觀塘多數係上班族，而葵芳反而學生比較多，荔枝角就咩年紀都有，而且人流較多，所以多數會揀荔枝角。
另外，阿 fa 覺得主辦單位的事前溝通同準備都好緊要，「如果預早通知，有晒藍圖，交待清晰的話都會預計到市集的質素。我見有 D 主辦單位會事先講明唔可以賣淘寶貨，咁就更加有信心。」
至於 Joyce 就覺得好睇主題， JCCC 比較大型的市集會吸引多 D 鍾意手作的人，而 K11 的市集就會多 D 鍾意行商場的人，「如果市集有表演、有熟食檔、Workshop 就更加好。」
不過大多做熟客生意的 Janice 就唔多怕人流少的問題，「因為我需要靜的地方同人傾計，所以會先揀室內同坐得舒服的場。」
▲ Janice 每次同人做治療都要一至兩個鐘的時間，所以環境比人流更重要。
▲ 另外，Janice 亦有售賣香薰同蠟燭等用品以增加收入。
週末市集好去處
適逢 2月14情人節與3月14白色情人節之間，Joyce、Janie 同阿fa 三位都會係今個星期去「期待是：」市集擺檔，藉著愛情故事氣氛，為大家帶來一個不一樣的市集。如果未買回禮的朋友可以去睇下啊！
期待是：
日期：3月5 – 6日（星期六及日）
時間：12:00nn – 8:00pm
地址：荔枝角長義街9號 D2 place 2/F The Space (大 hall)
分享到 :
最新影片
