最近依莉詩的 Facebook 幾乎都俾櫻花洗版，可惜就係無假去日本。咁啱又俾我見到白木屋出咗春季新 menu ，見到「櫻花」兩個字，當然狗衝入去試下啦！
櫻花蝦同櫻花有關？
雖然特選料理大多以紅色和粉紅色為主，但…原來料理所用的是「櫻花蝦」，而非「櫻花」，只係因為櫻花蝦係一種群聚性的浮游生物，而且身上滿布紅色素以及 160多個發光器，遠眺似日本櫻花而得名，所以同櫻花一 D 關係都無。就好似卡樂 B 推出的櫻花蝦鹽味蝦餅一樣，只係蝦餅的形狀是花形，但一點櫻花味都沒有。講到咁係咪好失望呢？唔緊要！其實櫻花蝦的味道甜甜地食落都幾好味架！
▲ 火炙鰹魚刺身 $68
大部份時候聽到鰹魚都係鰹魚湯，但係春天當然要食鰹魚刺身。皮經過火炙沒有了腥味，而鰹魚刺身的肉質比較厚實，非常有口感，不過就魚味，而唔係平時鰹魚湯的甜味。
▲ 春野菜櫻花蝦天婦羅 HK$68
平時食的天婦羅都係炸蝦炸蕃薯、南瓜咁，不過呢碟就用咗時令的櫻花蝦、竹筍 同 菜心，口感非常特別，配合搽茶鹽食用另有一番風味。
▲ 櫻花蝦滑雞炒青菜 HK $68
滑雞炒青菜睇落就係一碟普通家常小菜，但加咗櫻花蝦之後就多了一份甜味，變成很好的佐酒小食。
▲ 鰹魚搭三文魚之六色石頭飯 HK$78
石頭飯上面鋪滿味道清淡的鰹魚、三文魚同色彩繽紛的櫻花蝦，充滿春天的清新氣息，撈混一齊食有著不同的口感。食一個基本上已經唔洗叫其他餸了。
▲ 呢 D 就係傳說中的櫻花蝦，熟咗之後帶橙紅色，根本就唔似櫻花。
▲ 精選日式點心 櫻花餅HK $28
幸好甜品總算見到有櫻花的蹤影，櫻花餅係日本人一邊賞花一邊品嚐的和菓子。用櫻花葉包裹的櫻花餅甜而不膩，入口爽滑，淡淡的櫻花香氣和甜甜的紅豆充塞滿口，讓人再三回味。
▲ L’orient櫻花Wine HK$68杯/$268瓶
另一樣有真正櫻花的就係山梨縣釀造的櫻花葡萄酒，每瓶中放入 2朵精心挑選可食用山梨勝沼町八重櫻，以清甜的柑橘、青蘋果、蜂蜜為主調，以及優雅浪漫的淡粉紅色，散發著甜美浪漫的氣氛。
▲ 2朵櫻花係淡粉紅色的酒中飄浮，單單望住已經令人好舒服。
▲ KIRIN 啤酒
啤酒成日都有，但櫻花味的啤酒又試過味呢？粉紅色的櫻花味啤酒上面有高高的白色暖泡，令啤酒飲落更加豐富。不過食到櫻花味，好坦白講，聞唔到，亦飲唔出，就是啤酒味對了。
▲ 雖然啤酒無乜櫻花味，不過買兩杯 KIRIN 啤酒會送一塊印有櫻花花酒的膠片俾你玩 hologram，唔駛去日本都可以賞櫻了。
依莉詩點評
唔知有幾多人同我一樣，睇錯咗係櫻花入饌而被吸引咗呢？哈哈，其實今次春日 menu 都唔係太有櫻花的感覺，沒有櫻花粉的顏色，亦沒有櫻花的味道，不過用料都係春天當造食材，非常特別，萬萬都估唔到菜心可以做天婦羅，鰹魚可以做刺身。果然創意同暗黑只差一線。
美味指數 ★★★☆☆
食店：白木屋 (2457 7488)
地址：銅鑼灣登龍街28號永光中心1樓
