海港城的 FAUCHON 幾年前開業風頭一時無兩，Eclair 法式閃電泡芺應該唔少人食過。今日 FAUCHON就係沙田新城市廣場開咗新店，唔單止有多款法式甜品，仲推出鹹食，可以坐定定享受法式風情。胃食的我依莉詩今日就率先去試下味啦！
坐底慢慢嘆法國餐
今次 FAUCHON 新店係香港第一間 FAUCHON Paris LE CAFE，唔單止提供 Eclair 法式閃電泡芺等多款法式甜品，仲推出鹹食，可以坐定定享受法式風情。店內的裝修以黑色同桃紅色為主，遠望就好似一間高級的護膚品專門店。而用餐區有兩邊，一邊以簡約清新的白色餐桌為主，簡單舒適，另一邊係商場中央，比較開揚，配合藤椅就更有嘆下午茶的休閒感。
▲ 2000平方呎的店內有 116個座位，如果繁忙時間應該都幾逼。
新增鹹食注入本地元素
至於食物方面，除咗 FAUCHON 主打的 Eclair 法式閃電泡芺、蛋糕、朱古力 外，餐廳係鹹食上加入本地文化元素，當中的菜式有煙肉芝士批拌沙律、鵝肝沙律、蘆筍忌廉燉飯等等，主食大約百幾至二百蚊，係沙田嚟講算係中上的價錢。
▲ FAUCHON 的花茶都幾出名，而堂食有幾款茶係門市無得賣，所以一定要試下。
▲ 鵝肝沙律 $112
清爽的豆角配合鬆脆的麵包粒同軟軟的鵝肝，口感十足，夏天食好清新。
▲ 香煎三文魚扒配香草汁伴雜菜 $168
平時食三文魚扒最怕煎太耐，硬韌兼無味，而今次三文魚煎得啱啱好，外皮有少少脆，魚肉嫩滑，加埋下面的香草汁，非常開胃。
▲雲呢拿牛奶朱古力蛋糕 $65 (前)、白朱古力紅莓撻 $65 (左)、特濃朱古力泡芺 $55 (右)
甜品今次我只食咗雲呢拿牛奶朱古力蛋糕，朱古力濃得嚟唔太甜，軟滑唔太膩。
不可少的門市產品
有得坐係度食之後，店前面都一樣擺咗 FAUCHON 的 「Made in F — FAUCHON 出品，法國製造」系列的甜品、朱古力、花茶、咖啡等，唔駛去海港城都一樣買到。
▲ 朱古力係 FAUCHON 主打，大部份朱古力都印上一個號碼，有果味、杏仁味等等。
▲ 另一主打產品就係花茶，一罐罐裝好，送禮非常高貴。
依莉詩：「三文魚扒好好味！」
估唔到做開甜品的鋪頭，整鹹食都有咁上下質素。雖然今次試的菜唔多，不過今次的三文魚煎得啱啱好，外皮有少少脆，魚肉嫩滑，加埋下面的香草汁，非常開胃。最後食埋法式甜品就係完美的一餐。不過，要由前菜到甜品，full set 食晒價錢上都有 D 貴，而且呢度氣氛又未到酒店咁高級，似乎適合平民大時大節的慶祝活動。
FAUCHON Paris LE CAFE
地址：香港新界沙田新城市廣場一期 408 及 410 號鋪
電話：2237 1515
