我諗大家個電腦同電話應該都有 set 密碼吧，因為入面有好多個人資訊㗎嘛，例如有各個社交平台的戶口、信用卡資料、商業秘密、鹹片、閃卡、艷照、出軌證據… 唔會想俾人睇到囉！但大家有冇諗過自己死咗之後，呢啲咁重要嘅資料就會變成「電子遺物」，係會變成身後事的一部分，即係會交俾人處理㗎…
日本新聞網站 MyNavi 早前就分別同男網民及女網民做咗個問卷調查，了解佢地死後最唔想俾人睇到嘅物件，結果並唔出奇，男士就話係：
1、個人電腦
2、手機
3、收埋咗嘅漫畫同書；
而女士就話係：
1、手機
2、日記
3、個人電腦。
港女都係咁話，我都唔想俾人睇到我部手機，因為我收埋好多男神嘅靚仔相喺入面㗎嘛，俾人睇到咪 GG，set 咗密碼都冇用，因為唔識自動消滅內容。
日本服務完善就路人皆知啦，善終服務都唔會例外。日本 PC Service 公司同最大的喪葬服務公司燦控股（SAN Holdings）就同旗下的公益社合作，喺佢地嘅善終服務入面，加入一個新項目，就係「電子遺物處理」，因為有好多人都想知道已故親人曾使用的電子裝置的密碼，想幫已故親人名下的網上銀行和股票解約等。呢個服務包括破解電腦登入密碼、提取或刪除數據等等。另外，數據恢復公司 Data Salvage 亦提供電子遺物整理服務「LxxE」，因為好多人提出委托，話想攞到手機入面嘅相喎。
其實，部分社交網站都有提供服務俾人親人處理佢地嘅戶口，例如 Twitter、Facebook、Instagram 等就容許親人提供相關身故證明之後刪除賬戶、變成「永遠懷念」賬戶等。
除咗男神嘅靚仔相，港女其實都冇乜秘密（好似係），唔怕俾人睇到嘅。最緊要係個人走咗之後，唔好留低負擔啫。
分享到 :
最新影片
