Set 頭神器!捲髮器+隔熱梳+風筒 3合1 — 依莉詩試用 Multicurl 擰擰風筒

讚好此文:

十月 8, 2016 • 扮靚科技, 評測

每次洗完頭又要梳,又要風筒,仲要出動埋造型夾,手忙腳亂之餘,仲要有搞搞成個鐘。最近我依莉詩就搵到個 Multicurl 擰擰風筒,可以邊梳邊吹邊捲。聽落非常方便,依家就試下 work 唔 work 先。

multi

陶瓷棒+隔熱梳+風筒 3合1

其實 Multicurl 擰擰風筒 同之前試用過嘅 Philips StyleCare 自動旋轉熱風梳 原理好似,都係利用熱風打造想要嘅髮型,不過呢個風筒就更進一步,結合埋隔熱梳同雙層陶瓷棒,一次過做齊梳理、吹乾同定型。洗完頭,用一件工具就可以打造理想髮型,非常方便。呢個風筒比普通風筒重少少,把手有凹位都幾好揸手,但因為佢唔似普通風筒呈 90度,所以吹頭嘅時候要打直吹,手勢有啲怪,要重新學習。

 

dsc08354

▲ 風筒就好似一支好粗嘅掃把,出風口有多條黑色隔熱梳齒保護,就算握實梳齒都唔會熱。

dsc08363

▲ 隔熱梳入有多條陶瓷棒,加強定型效果。

360度無阻隔扭動

風筒有 3種模式,分別係 120度配強風、140度配弱風 以及 180度配無風,方便打造不同造型使用,可惜無冷風選擇,如果吹得太熱只好停一停。洗完頭,我會選擇用 120度配強風先吹至 8成乾,再轉用 140度配弱風決定吹彎定吹直,而瀏海會用 180度配無風 捲出空氣感。轉換模式都好簡單,一推就可以,就算去到強風,風筒都唔會特別嘈。另外,尾部嘅電源線可以 360度扭動,set 頭時點扭都唔怕電線糾結,變得更靈活方便。而手柄同隔熱梳中間有個可以轉動嘅圈,只要輕輕轉動就可以轉動隔熱梳,唔使隻手轉嚟轉去,用落更順手方便。

dsc08356

▲ 風筒可調校 120度配強風、140度配弱風 以及 180度配無風,方便打造不同造型使用。

dsc08358 ▲ 360 度可轉動嘅電線就唔怕轉手時出現電線糾結,變得更靈活方便。

dsc08372

▲ 只要輕輕轉動白圈就可以轉動隔熱梳,唔使隻手轉嚟轉去,用落更順手。

dsc08364

▲ 隔熱梳靠手動轉向,而非按掣轉動,唔怕一時按錯而轉錯方向。

實試 — 吹曲吹直無難度

借得番嚟梗係要試下好無用啦!今次就試下吹曲吹直係咪都做到。

 

dsc08390

▲ 將一束頭髮放係梳齒間,再轉動白圈,頭髮就會自動圈入風筒內,用 140度配弱風 hold 10 秒左右,就可以做出波浪效果。雖然好快就整得曲,但效果好似唔多好。
dsc08397

▲ 直髮比較容易吹,而且有梳齒 hold 住,單手都做到,頭髮唔會飛飛下,不過始終都係家用,吹出嚟嘅風無專業級風筒咁強,要吹 3至4下先會變直髮。
dsc083541

▲ 曲髮嘅效果相當明顯,而直髮就可以因為吹曲完再吹,所以未係 100%順直。

dsc08384

▲ 近睇頭髮變得好毛燥,睇嚟唔可以經常使用。

dsc08402

依莉詩:「又快又明顯,不過小心傷頭髮」

今次呢個風筒好方便,一次過做齊梳理、吹乾同定型,大大縮短造型時間,而且效果明顯,Keep 得耐。另外,呢個風筒靜過普通風筒,而且好揸手,單手就可以吹直髮。不過可能太強勁,如果吹曲髮會有明顯嘅毛燥,所以都係唔好日日用,怕傷頭髮呢!

Multicurl 擰擰風筒

售價:$450

查詢:Girlylane

• 不想錯過新科技 ? 請 Follow unwire.hk FB 專頁 http://facebook.com/unwirehk/
• 要入手生活科技潮物 即上 unwire store
https://store.unwire.hk/

讚好此文:


Comments are closed.

相關文章:



更多同類文章:

最新文章