港女趁長假期去咗北歐嘅芬蘭、瑞典及挪威旅行觀光，三個國家用三種不同嘅貨幣，出發前港女真係搲晒頭，因為除咗歐羅，唔係度度都咁容易兌換到挪威克朗（NOK）及瑞典克朗（SEK）。不過，港女聽人講，北歐好多地方都已經轉晒用電子貨幣同埋信用卡，更加有新聞報道過，北歐有啲大銀行為咗防止黑市同金融犯罪，而呼籲啲國家全面停用現金，於是港女就準備咗一張漫遊上網卡同信用卡，同埋兌咗少少歐羅現金就膽粗粗出發。
到埗之後，果然不出港女所料，真係周街都用電子貨幣同埋信用卡，連去個廁所同用 Locker 都可以碌卡，我真係笑咗?。而一般嘅長途交通工具，如機票、火車飛、長途巴士，全部都係用網上預購的形式買票。如果你好似港女咁，喺 peak season 去呢啲國家，我建議你早一個月買定飛喇，Early bird 有得平之餘仲唔使擔心買唔到。
▲ 碌卡去廁所，10 kr 即係港幣 8.5 左右
順帶一提用電話上網的重要性。例如搭火車，係會 check 飛㗎。火車上的 9 成乘客都係就咁喺個電話度 show 張飛個 QR code 出嚟畀乘務員嘟，唔使 print 出嚟都得㗎。佢啲飛全部都會 email 一個 soft copy 畀你，當然你可以 cap 圖、save file 啦，但何不直接上網開個 email 出嚟？既方便又快捷。同埋千祈唔好以為「火車（或巴士）上實有 WiFi 上網啦，唔使自備 SIM 卡啦」，其實交通工具上嘅 WiFi 有好多時都會窒機同唔穩定，連唔到線又 load 勁耐會好尷尬㗎嘛，港女真心建議自備 SIM 卡。
▲ 其實搭飛機搭船都係咁樣嘟 code 就得，冇人幫你，自己搞掂，搞唔掂就睇下人地點做。
不過，港女都有失手的時候。話說港女由芬蘭飛去挪威個陣太過老定，以為真係「一卡在手，世界通行」。結果一落機，要去買機場巴士飛嘅時候，發現用信用卡買唔到飛，因為部買票機要求我入 pin code（香港嘅信用卡係冇呢樣野，直接撳 OK 係唔得，求其入個密碼都唔得㗎，唔好亂試！）。而同時，成個機場都冇得用現金兌換外幣，只得一部提款機，又咁啱我張卡係撳唔到錢… 搞到淨係得歐羅喺身嘅港女「捩咁棄」? 。最後，港女發現，原來可以喺巴士上直接同車長用歐羅買飛，真係好彩。
除咗呢個比較特別嘅 case 之外，大部分都問題不大，有部分商店仲有得畀你揀碌港紙還是當地貨幣，而家匯率日日都變，其實碌卡真係幾抵。嚟緊又有長假，如果有讀者朋友準備去歐洲旅行的時候，不妨參考一下港女的做法喔。
分享到 :
最新影片
