之前報導過 薯蛋頭夫婦 今年聖誕到咗 MCP 新都城中心同大家影相玩遊戲，原來唔只咁簡單。佢地仲邀請咗 3大「薯」牌包括: 本土薯片代表「Jack’n Jill Chips珍珍」、米芝蓮2016年香港街頭小食入圍食店「Three Potatoes 叁薯」及「Top Pot Bakery胖達人」薯包創作達人，為大家帶來一系列「薯」不簡單薯味小食，我依莉詩今日就食飽飽啦！
1) 最搶眼街頭小食－紫薯偽雪糕
冬天望見雪糕想食又怕凍？食呢個偽雪糕就唔怕啦！Three Potatoes 叁薯的焗薯早前得到米芝蓮香港街頭小食，依家更上一層樓推出聖誕期間限定的薯味 Gelato，將薯蓉放係雪糕筒內，加上各種 toppings ，睇落十足雪糕咁，賣相同口感都一流！
▲ 花心紫薯 $38
浪漫紫色的紫薯蓉放係花形窩夫脆碗上，再加棉花糖同彩色朱古力碎，淡淡的香甜，雪糕的口感，但就一 D 都唔凍，好啱我呢 D 氣管唔好，又想冬天食雪糕的人。
滋味度：★★★★★
抵食度：★★★★☆
▲ 薯蓉 Gelato 單球(小)珍寶筒 $28、單球(大)珍寶筒 $35、雙球(大)珍寶筒 $43
另一款偽雪糕同樣可以自選煙肉、粟米粒或雞蛋沙律口味的薯蓉放在雪糕筒上，再配上選擇煙肉碎、果仁麥片彩色朱古力碎等 7種配料及芝士醬、千島醬或蜜糖芥末醬等醬汁，好唔好食就睇你配搭啦！小編就試咗煙肉、粟米粒薯蓉配煙肉碎、芝士醬，我就覺得係 perfect match 啦！
滋味度：★★★★★
抵食度：★★★☆☆
▲ 美式手撕豬肉焗薯 $45
叁薯既然整得間 pop-up store 係商場，又點會無最耍家的焗薯賣呢？除了最出名的重量級芝士酸忌廉原隻焗薯外，今次仲獨家推出咗新口味美式手撕豬肉焗薯。肉絲、茄汁豆同蔥鋪滿薯面，香噴噴的肉汁流入薯仔，吞吞飽滿。
滋味度：★★★★☆
2) 台灣過江龍－足料薯包
過江龍「Top Pot Bakery 胖達人」係台灣大受歡迎，今次就帶咗 5款「薯」味麵包係商場賣。薯仔、蕃薯、紫薯樣樣都有，大大個睇到都覺得飽。
▲ 火腿薯蓉燒餅 $30、蕃薯核桃 $35、玉米薯蓉 $30、蘑菇薯蓉 $30、農夫紫薯乳酪 $25
火腿薯蓉燒餅味道同口感都有 D 似胡椒餅，充滿台灣風味。農夫紫薯乳酪包夾住紫薯同忌廉芝士，甜度適中，又充滿奶氣，非常特別。而我最鍾意玉米薯蓉，香口的芝士粉加埋包內粒粒粟米，口感豐富。
滋味度：★★★☆☆
抵食度：★★★☆☆
▲ 雖然 D 包用料十足而且大大個，不過成 $30個飽我會揀食熱辣辣的焗薯。
3) 任加任配－DIY 薯部屋
依家俾你揀卡樂 B 定珍珍薯片，你可能會揀前者，但小學的時候珍珍薯片應該係你首選。只要係商場以電子貨幣即日消費滿$300，憑最多 2張不同商戶發出之即日有效發票(每張發票最少$50)，就可以換領「Jack’n Jill Chips珍珍」薯片一盒，仲有十多種口味醬料同味粉，比你任加任配童年的味道。
日期︰12月5、6、12、13、19、20、31日 及 2016年1月1日至 3日 (1:00pm-9:00pm)
▲ 小編加咗三文魚粉、蜜糖芥末醬、蛋黃醬同大量煙肉碎，真係好好味架！(我覺得係)
滋味度：★★★★☆
▲ 10款調味粉包括蜜糖雞翼、龍蝦湯、三文魚壽司、章魚小丸子及鰻魚味粉等等，都係平日買到的薯片口味啊！
▲ 醬汁有甜有鹹，都係蛋黃醬同蜜糖芥末醬保險 D。
▲ 煙肉碎、棉花糖、、花生碎、粟米粒，好想全部加晒落去啊！
▲ 另外，12月24日至 26日期間只要以電子貨幣即日消費滿$500，憑最多2張不同商戶發出之即日有效發票(每張發票最少$50) 就可以換到「薯加薯」一盒，除了有珍珍薯片，仲有埋叁薯薯蓉，同樣可以加入不同味粉同醬料，一樣咁好玩。今次我就轉玩甜味，加咗朱古力醬、m&m 、棉花糖同花生碎，味道好似唔多夾，哈哈。
滋味度：★★☆☆☆
▲ 現場仲有部夾薯片機，不過要夾起好似有 D 難道。
聖誕限定薯味專區
日期：2015年12月5日至 2016年 1月 3日 (1:00pm-9:00pm)
地點：MCP新都城中心2期L1 (Shop No. 1017 McDonald 對出位置)
