音樂係生活中不可或缺嘅一部份，相信冇乜讀者會反對依句說話。好多人每日等車、搭車、甚至做緊野都會聽歌，但睇緊依篇文嘅你又有冇諗過只要少少錢，以後都可以喺屋企錄製自己嘅音樂呢？其實籮文平時都會玩下音樂，依家我就以新手角度由零開始，教你將屋企打造成入門級錄音室 Home Studio。
第一步 : 貼隔音綿不能解決問題
打造 Home Studio，首先你要有一個 Home。唔係廢話，我講緊嘅 Home 係一個適合改造為 Home Studio 嘅屋企。對於你自己黎講，你聽嘅音樂當然唔係噪音，不過對於你屋企人又或者鄰居黎講，你播或者唱嘅歌就可能係一個滋擾。所以建立你嘅 Studio 之前請先諮詢屋企人嘅意見，同評估一下被投訴嘅風險。
除咗你會滋擾別人，亦都要評估一下將來錄音時會否有太多躁音傳入屋企錄入咪中。你或者會話：「癡隔音綿未得囉！」，雖然隔音綿有一定嘅功用，但住宅本身結構就唔係設計俾你做 Studio，所以隔音效能唔會太好，就算貼隔音綿亦唔可以隔走所有噪音，除非為屋企進行隔音工程，隔音天花板、隔音地板、隔音牆、隔音門等，不過咁就唔係低成本啦。
如果你屋企真係唔符合以上資格，唔怕，一陣會話你知一啲折衷嘅方法（留意第六步）。另外你需要一張枱用黎放置你嘅裝備，而張枱當然要夠大放置所有你嘅設備啦，市面上都有一啲專門為 Studio 設計嘅枱不過就比較貴。而籮文張枱就係同朋友一齊去買木板黎砌嘅，當然價錢平好多，尺吋又可以度身訂造 Fit 晒自己間屋，如果各位讀者唔怕攰唔怕煩嘅話都可以試下自己砌呀！
▲專業的 Studio Desk
▲籮文啱啱搬入依間房嘅時候，Home Studio 1.0 只係用一張百幾蚊嘅摺枱臨時搭建而成
▲音樂嘅熱誠驅使我推啲木材推幾條街，真係要俾返個 Credit 影張相同埋幫我一齊砌張枱嘅好朋友 Szelong。（籮文 D.I.Y Studio Desk 成本：大約 $1,000）
第二步 :Mac 機真係好 D ？係真係好D !
第二步，就係要有電腦一部，好多人都會問用 PC 好定 Mac 機好，我就覺得事實上 Mac 機的確係比較適合錄音和音樂製作，除咗一般人所講，Mac 系統係比較穩定之外，很多音樂製作軟件都於 Mac 上有更好表現，而且 Mac 機附送自家嘅音樂軟件 GarageBand，對於新手黎講，又慳返一筆。當然，如果你本身係用 PC 嘅話問題亦都不大，只要你部 PC 唔係文書機，配置唔係太低其實都負荷得到普通嘅錄音製作。
籮文電腦 成本：$0 （依個時代係人都有電腦啦！）
第三步：認識音樂製作軟件（DAW）
硬件之外，軟件是不可或缺嘅一部份，音樂製作軟件（DAW） 即是 Digital audio workstation。業界最為人熟悉嘅錄音軟件係 ProTools，而編曲作曲時則多數人用 Logic Pro (For Mac) 、 Cubase (Mac & PC)和 FL Studio(PC)。不過以上嘅軟件售價由幾百蚊至幾千蚊不等，不少入門玩家都會被嚇怕，所以以下介紹幾款免費嘅音樂製作軟件俾各位讀者。Mac 用家當然建議使用跟機附送的 GarageBand，除咗因為唔使錢之外，GarageBand 其實係 Logic Pro 嘅簡易版，所以讀者用熟咗 GarageBand 之後嘗試向專業級進發轉用 Logic Pro 亦可以好快上手。而 PC 用家唔想俾錢嘅話我就建議用 Cubase 的免費試用版 Cubase LE，雖然功能上有限制，不過都夠新手使用。
▲Cubase（Mac＆PC）：PC 平台上業界使用率相當高的編曲軟件
▲Protools（Mac＆PC）：業界通用的錄音軟件
▲而籮文就係用 Logic Pro （Mac）（$1,588）
第四步：選購 Audio Interface
電腦內置嘅音效卡多數只係設計俾你聽歌用，電腦咪插內置音效卡黎錄音好易就會因為負荷過重而出現 Delay 甚至 Hang 機，而且錄音用的電容式咪高峰是需要供電的，所以一個 Home Studio 就需要 Audio Interface，簡單來講就係一個專門為音樂製作而設嘅外置音效卡。
入門玩家揀 Audio Interface 主要視乎音效輸入和音效輸出的數量，如果你多數都只會錄人聲，就只需要買有一個音效輸入插口的 Audio Interface，如果你將來會有各種樂器和人聲同時間錄音，你就需要有更多音效輸入插口的 Interface，以 Home Studio 黎講，輸出只需要一左一右喇叭輸出和一個 Stereo 的雙聲道耳機輸出就足夠。當然就算同樣的輸入輸出數量亦有級數和價錢的分別。
▲籮文用緊嘅 Focusrite Scarlett 2i2，好多入門甚至中階玩家都係用佢，特點係慳位，同埋價錢平（$1,650）
第五步： 咪錢唔好慳，唔係唱 K
Mic 主要分為兩種，分別是動圈式與電容式。雖然多數動圈式 Mic 價錢都比較便宜，錄人聲的話多數採用電容式，因為電容式 Mic 結構上有收音膜較輕的優勢，對聲音更敏感，接收聲音會更細緻。當然，如果新手們想再慳一筆，改為買動圈式亦都係一個辦法。買邊種 Mic 都好，記得買埋線材同埋 Mic Stand，如果用手揸 Mic 嘅好容易就會錄到郁動造成嘅雜聲，另外亦都可以跟據情況選購俗稱口水擋嘅 Pop Filter，而用途就已經可以從中英文名中可以估到，除咗擋口水之外，Pop Filter 就係用黎阻擋錄音時噴咪做成嘅 Pop Pop 聲。
▲Neumann 嘅 U87 電容咪可以話係錄音界嘅工業標準，各大錄音室都係用佢，Eason 隻碟 U87 就係以佢黎命名架啦！
▲貫徹懶嘅本性，籮文就買咗 Rode NT1，因為 NT1 係包埋 Pop Filter 架！（$2,380）
第六步：走味精的監聽喇叭／監聽耳機
普通電腦喇叭的音質多數都經過廠商調教和潤飾，用依啲喇叭聽自己嘅音樂可能會好聽啲，不過如果你 Send 俾其他人用另一啲喇叭聽嘅話，就可能會聽到一啲你聽唔到嘅瑕疵，所以音樂製作上我哋會有專用的監聽喇叭，以作 Edit 或者 Mixing 時監聽之用。
除咗喇叭，Home Studio 亦需要一對監聽耳機，因為錄音時，歌手要聽住音樂去唱歌，如果用喇叭播背景音樂，咪高峰又會錄到喇叭發出嘅聲音，錄出黎就當然唔好聽，嚴重時更會出現 feedback 情況，此外使用監聽耳機可以阻隔其他外來聲音，可以更加集中地製作你嘅音樂。
文章一開頭講到，如果屋企情況唔容許使用喇叭，監聽耳機就可以發揮重要作用，代替監聽喇叭之位置。可能你會話：「咁用耳機得啦，使乜買喇叭呀？」，咁全日戴住耳機耳仔都攰啦，同埋當你想同你 Home Studio 嘅訪客分享你嘅音樂又點呢，梗係有埋喇叭得閒焚下先爽啦！耳機同喇叭亦可以做到互相補位作用，讓你更加清楚聽到音樂內的瑕疵。
▲ 如果錄音界電容咪嘅工業標準係 U87，咁 Adam 絕對係監聽喇叭嘅大佬
▲ KRK 嘅 Rokit 5 亦係價錢較為相宜嘅好選擇，唔少 Home Studio 都可以見到依對好有象微性嘅黃色喇叭皮
▲而籮文就選擇咗依對 Monkey Banana 嘅 Gibbon 5，點解？因為貪佢有顏色得揀、價錢又平同埋個牌子名夠騎呢囉！（$2,760)
▲耳機方面，籮文就趁減價入手咗 Audio Technica 嘅 ATH-M30。（$700)
最後連成一線！
最後一步梗係將所有野連成一線啦！
▲ 可以參考上圖黎 Setup，日後仲可以加埋樂器，豐富你嘅 Home Studio
籮文 Home Studio 的成本：
枱－D.I.Y Studio Desk 成本： $1,000
電腦－：$0 （依個時代係人都有電腦啦！）
軟件－Logic Pro X：$ 1,588
Audio Interface－Focusrite Scarlett 2i2 ：$1,650
Mic－Rode NT1 ：$2,380
喇叭－Monkey Banana Gibbon 5 一對 = $2,760
耳機－Audio Technica ATH-M30 = $700
———–
總共：$10,078
踏上音樂之路
建立好自己嘅 Home Studio 只係音樂之路嘅第一步，以後有機會，音樂新手籮文會再為大家進一步分享一啲關於音樂嘅資訊，音樂人嘅專訪，或者有機會帶大家參觀一下一啲音樂人嘅 Studio，睇下人哋個 Studio 同你個 Home Studio 有咩分別嘅！
▲籮文 Home Studio 2.0 完成！
